كشف خدعة السيارة إم جى MG الصينية 100% والتى ليس لها علاقة بإنجلترا
Ehab Bakr
كشف خدعة السيارة إم جى MG الصينية 100% والتى ليس لها علاقة بإنجلترا
مرحبا بكم من جديد في موضوع هام عن الغش التجاري
اليوم مع السياره الصينيه العاديه والعلامه التجاريه الصينيه اللي بيحاولوا يسوقوا لها علي انها ماركه انجليزي السياره الصينيه ام جي
السؤال اللي هنجاوب عليه النهارده هو هل ام جي سياره بتاريخ انجليزي زي ما بيحكي عنها توكيل منصور
ولا من الآخر العربيه صيني وحكاوي التوكيل عنها دي مجرد اشاعات للتسويق وزياده المبيعات وتبرير زياده السعر
الكلام اللي هقوله مش تاليف من عندي لكن من مصادر زي ويكيبيديا وموقع الشركه الرسمي في الصين ومصادر ثانيه اخباريه كثير وموقع يورو ان كاب هحطلكم كل المصادر دي في الوصف اسفل الفيديو علشان اللي عاوز يتاكد من المعلومات
بعد ما ينزل الفيديو ده انا متاكد ان ناس كثير هتكتب تعليقات سخيفه اغلبهم يا اما موظفين في التوكيل او ملاك عربيات ام جي وبيحاولوا يحافظوا على سمعه سياراتهم علشان تحتفظ بسعرها
انا بالنسبه لي الموضوع ده مش فارق خالص و حصل قبل كده في كشف خدعه السياره فيرنا وجات لي اتصالات كثير وتعليقات علشان احذف الفيديو
فيديو كشف خدعة السيارة فيرنا
انا مش بشهر بتوكيل او بنوع سياره معين انا بكشف خداع وغش تجاري في تجاره السيارات في مصر
موضوع التعليقات السخيفه والناس اللي بتغلط حلها بسيط خالص وهو حذف التعليق و منع المستخدم من التعليق في القناه نهائيا
وللعلم فيديوهات كشف الفساد في مجال استيراد وتجميع السيارات في مصر مستمره
وبالمناسبه الموضوع لا هو سياسي ولا وطني ولا اي حاجه خالص
القصه كلها اننا بقينا فريسه للوكلاء في مصر و بيتعاملوا معانا على اننا هنود وهنشتري اي حاجه حتى لو مفيهاش امان ولا كماليات وحتى لو سعرها ضعف السعر اللي بتتباع به في الخارج
كامل الاحترام لحمله المقاطعه خليها تصدي والقائمين عليها اللي وصلوا كثير من الوكلاء انهم ينزلوا عشرات الآلاف في اسعار السيارات
الحمله اللي تستحق الدعم الكامل من جميع فئات الشعب المصري غني وفقيرلان فعلا الحمله جايبه نتيجه محترمه وكله في الاخر في صالح المواطن المصري المطحون اللي بيستلف و ياخذ قرض و يدفع نصف مرتبه قسط علشان نفسه يركب عربيه تنقذه هو واسرته من بهدله المواصلات
قبل ماندخل فى تاريخ وكلام كبير
هسألكم كام سؤال ونجاوب عليهم
مصر وقعت تحت الاحتلال الانجليزي 74 عام من سنه 1882 حتى سنه 1953 بعد توقيع اتفاقيه الجلاء
هل بعد 74 سنه انتوا شايفين ان الشعب المصريبقوا انجليز؟
هل بنعرف نتكلم انجليزي هل شوارعنا وثقافتنا وتقاليدنا بقت انجليزي؟
في احد فينا تاثر بالاحتلال ؟؟؟؟؟؟؟
الإجابة طبعا
لا يا فندم ………. ابسليوتلي!!!
لسه طباعنا واخلاقنا وعاداتنا وشوارعنا زي ما هي حتى لما بنتكلم انجليزي بيطلع هندي
اللي قصدي اقوله ان موضوع العربيه ام جي لها تاريخ انجليزي اللي قاعد يلحنها الوكيل معناه ان الصناعه و بلد المنشا والايدي العامله والخامات ومراقبه الجوده والتفتيش وكل حاجه في العربيه انجليزي من الالف للياء او على الاقل اغلب اجزاء السياره من انجلترا انما الواقع عكس كده تماما
وهنتعرف على تاريخ العلامه التجاريه ام جي من يوم ميلادها حتى الان
وللتوضيح لو كان الوكيل استورد عربيه محترمه بسعر مناسب ومافيهاش كل العيوب دي وقال عليها انها الماني ولا حتى من المريخ ما كنتش هتكلم انما انجليزي وهي في الاصل صيني وعربيات كلها مشاكل وعيوب يبقى لازم نتكلم
قبل ما نبدا في تاريخها لازم نعرف ان في عيوب فنيه خطيره ظهرت في كل موديلاتها وكثير من مالكي السياره اشتكوا
واهم العيوب اللي ظهرت تتعلق بالفرامل والعفشه بالاضافه الى عدم اتزان السياره على الطرق السريعه وضعف الموتور و اللي بيظهر في السحب البطيء والعيوب ما وقفتش لحد كده لا ده كمان هيكل السياره ضعيف جدا والصاج ضعيف حتى الخامات المستخدمه في التابلوه والكراسي وضفيره الكهرباء خامات رخيصه رغم ان العربيه اقل فئه فيها سعرها 250 الف جنيه و اعلى فئه ب 370 الف جنيه يعني ارقام كبيره جدا بالنسبه لكونها عربيات صيني
وعلشان اللي بيتفرج على الفيديو يتاكد من كلامي انا حطيت كل المصادر في الوصف اسفل الفيديو وكمان حطيت مصادر اخباريه فيها فضيحه ام جي وتحويل الشركه للنيابه بتهمه تزوير بلد المنشا و تزوير تاريخ العلامة التجارية من وقت دخولها مصر سنه 2012 وكمان مصادر اخباريه فيها شكاوي من جهاز حمايه المستهلك و نيابه 6 اكتوبر لما دخلت مصر تحت رعايه الوكيل إبا اختصارا ل
ايجيبشن بريتش اوتوموتيف سنه 2012 قبل ما يخسر ويدخل ياخدها منصور ويبداء رحله التسويق علي انها علامه ذات عراقه انجليزية
المهم انه اتعلم من درس شركه ابا ومش بيقولها صريحه انها سياره انجليزيه لكن بيتكلم عن التاريخ الانجليزي للعلامه ام جي واللي هتلاقيه مكتوب في كل بروشورات منصور ام جي
وللاسف بيتخدع فيها كثير من اللي بيشتري العربيه ويفتكرها فعلا ليها علاقه بانجلترا وعراقة السيارات الانجليزيه انما في الواقع هي صيني تعبانه مليانه عيوب اقل من اقل سياره صيني في السوق المصري
مع كامل الاحترام لجميع الوكلاء والموزعين وخصوصا توكيل منصور
عموما نقول تاريخ شركه إم جي MG
كان يا ما كان سنه 1924 واحد اسمه ويليام موريس وكان عنده قطعه ارض وعامل عليها جراجات ومركز صيانه صغير
كان تاجر سيارات ولد في مدينه اكسفورد في بريطانيا والمكان كان اسمه جراجات موريس علشان كده عمل شركه سيارات وسماها ام جي
في مارس 1928 الشركه كان وشها حلو عليه علشان كده فلس واضطر يبيع المكان و يسدد ديونه للبنوك واتباعت الشركه والجراجات وتقريبا ويليام موريس شخصيا واصبح اسمها ام جي كار كومباني ليمتد
واصبحت شركه مستقله انتجت عربيات بباب واحد وكرسيين وشغلتها في سباقات عربيات وللاسف ما كنتش ناجحه رغم محاولات عديده للبيع داخل انجلترا وخارجها الا ان المنافسه كانت شديده
سنه 1952 علشان ضعف المبيعات وخوفا من الافلاس للمره الثانيه اندمجت شركه بريتش موتور اوبريشن (بي ام سي) و شركه اوستن موتور كامبني واستحوزوا على ام جى فى محاولة لانقاذ مايمكن انقاذه وبرضه ما فيش فائده
في عام 1966 اندمجت (بى ام سي) مع شركه جاكوار وسموها (بي ام اتش) او بريتيش موتور هولدنجز ليمتد في ديسمبر وبرضه ما فيش فائده
راحت مندمجه مع الشركه البريطانيه القابضه للسيارات سنه 1968 و بقا اسمها بريتش ليلاند موتور كمبانى
سنه 1986 غيرت شركه بريتش ليلاند موتور اسمها الى روفر جروب في محاوله منها لتغيير الواقع المرير من ساعه ما اشترت الشركه المنحوسه ام جي علشان تعرف تبيعها وتخلص منها
المهم باعتها لشركه بي ام دبليو سنه 1988 و بقا اسمها بي ام دبليو ام جي بدل ام جي روفر جروب
بي ام دبليو حست بالخراب بدا يدخل على منتجاتها راحوا عاملين (ان دو) ورجعوا في البيع ورجعو شركه ام جي مره ثانيه سنه 2000 وبقا اسمها ام جي روفر جروب ليمتد
وقتها كانت الصين في اوج النهضه الصناعيه و شركه ام جي روفر كانت مفلسه و خسرانه وفي 23 يوليو 2005 استحوذت الشركه الصينيه نانجينغ اوتوموبيل جروب على العلامه التجاريه ام جي لانها كانت مديونه للبنوك وكانت فرصه كبيره للشركه الصينيه لانها اشترت الارض والمصانع والمكن والعلامه التجاريه ب 53 مليون جنيه استرليني وده طبعا مبلغ صغير جدا لاي شركه سيارات وسمتها نانكى (ان ايه سي ام جي يوكي ليمتد)
حاولت شركه نانجينغ انها تعمل اي حاجه مع العلامه التجاريه ام جي ولكنها فشلت وخسرت للمره السابعه على التوالي ولما شركه نانجينغ فلست وخسرت كل حاجه اتباعت علشان تسدد ديون البنك وسنه 2007 استحوذت عليها الشركه الصينيه سايك اختصار شنغهاي اوتوموتف اندستري كوبريشن
وبدا بيع السيارات ام جي التي اصبحت تبع شركه سايك في الصين
سنه 2007 استخدمت شركه سايك مصنع ام جي لمجرد تصنيع سيارات سايك بتصميمات بعيده عن ام جي يعنى كأنها عملت خط انتاج ثانى لعربياتها واستخدمت المكن اللى فى المصنع فقط
وفي 26 مايو 2008 تم اطلاق النموذج ام جي اس ام
وكان عباره عن مقعدين بباب واحد و للاسف فشل النموذج ده و تسبب في خسائر فادحة
في سنه 2011 توقفوا عن تصنيع النموذج في الصين
وفي سنه 2012 تخلت شركه سايك تماما عن العلامه التجاريه المنحوسه ام جي واختفت تماما سيارات ام جي الجيل الاول
ثم عادت مره اخرى في الجيل الثاني ام جي 3 الهاتشباك اللي جابتها مصر شركه ابا ايجيبشن بريتش اوتوموتف سنه 2012
واللي حصل عليها قلق كبير لان شركه ابا قامت بتسويقها علي انها سياره انجليزيه
ده على اعتبار ان الشعب المصري مش هياخد باله لكن طبعا اتقدمت البلاغات لجهاز حمايه المستهلك و للنيابه العامه وبعدها تدخل منصور لدعم وشراء توكيل ام جي
وللاسف بدا منصور في تسويق السياره ام جي علي انها صاحبة التاريخ والاصاله والعراقه واجيال من النجاح في انجلترا وده طبعا كله غلط
هو صحيح ما قالش انها سياره انجليزيه او صناعه انجليزيه زي ما غلطت قبله شركه ابا
لكن تسويق سياره فاشله وكلها عيوب و الاستعانه بماضي مغلوط عن العلامه التجاريه ام جي علشان يبيع باسعار مبالغ فيها والناس تطمن وتشترى العربيات على انها بجوده انجليزيه او تاريخ انجليزي الكلام ده ما يصحش طبعا من توكيل محترم زي منصور
خلاصة الفيديو ان العلامه التجاريه ام جي هي صينيه تبع شركه سايك الصينيه علاقتها بانجلترا او باي حاجه انجليزي تتلخص في الحرفيين الانجليزي ام جي فقط
غير كده العربيه صيني فى جميع تفاصيلها (تصميم وخامات و صناعه و بلد منشا و مراقبه جوده وتكنولوجيا و ايدي عامله) كله صيني والتاريخ والعراقه وسنه 1924 اللي بيتكلموا عنها كل ده فنكوش
العربيه صيني ميه بالميه
بالنسبه للامان في سيارات ام جي اخر اختبارات الامان بواسطة يورو ان كاب وهو معهد اختبارات السلامة الاوروبية كان في موديل 2017 ولم يتم اختبارها في موديلات 2018 و 2019
تم اختبار السياره ام جي زد اس وحصلت على ثلاث نجوم من خمسة
حصلت على 71 في المئه لتامين البالغين
وحصلت على 51 في المئه تامين الاطفال
وحصلت على 59 في المئه لتامين المشاه
وحصلت على 29 في المئه مساعدات الامان والفرامل والسائق
و بناء على طلب شركه سايك قام برنامج توب جير اللى كلنا عارفينه بعمل ريفيو عن السياره ام جي 6 ماجنيت
وللاسف خبير السيارات الانجليزي الشهير جيرمي كلاركسون قال رأيه بصراحه وقال ان العربيه ماتستاهلش التجربه و انها سيئه للغايه وصينيه ولا تمت للصناعه الانجليزيه بأي صله وانها عار على الصناعه الصينيه
الكلام ده زعل شركه سايك واخذت مجموعه من الصحفيين علشان يتفرجوا على مصانع ام جي ورفعت قضية على برنامج توب جير ولكن طبعا تظل السيارات ام جي سيئه للغايه ولا تستحق الشراء
لينك تقييم برنامج توب جير موجود في الوصف اسفلالموضوع
في نهايه الفيديو اتمنى يكون الموضوع مفيد للي بيفكر يشتري عربيه ام جي
وده كان رد على اسئله كثيره جدا عن رايي فى سيارات ام جى
ده مش رايي انا بس لكن رأى ناس كتيرة جدا فى مصر وخارجها
