لو معاك من 400 لـ 500 ألف جنيه ونازل
سوق المستعمل، فإنت أكيد محتار. تشتري حاجة موديل عالي بس صيني؟
ولا تشتري "وحش" ياباني أو
كوري بس موديل قديم شوية؟
وهقولك في
الفيديو سعر كل عربية فيهم ومميزاتها وعيوبها .. والأسعار دي هي "متوسط السوق" وقت تصوير الفيديو والحالة الفنية هي
الفيصل في السعر النهائي اضغط اللايك واشترك في القناة ويللا بينا!"
1. نيسان صني N17 موديلات من 2015 الى 2018
المحرك 1500 سي سي
القوة 108 حصان
الفتيس أوتوماتيك 4 سرعات تقليدي
وسعرها النهاردة بيبدأ من 420,000 وبيوصل لـ 480,000 جنيه
مميزاتها صالون واسع جداً (كنبة خلفية مريحة)،
تكييف تلاجة، توافر قطع غيار في كل مكان (جديد واستيراد)، وإعادة بيع في لمح البصر.
عيوبها ثبات
ضعيف على السرعات العالية (فوق الـ 120 كم/س)، خامات داخلية فقيرة (بلاستيك)، وعزل
صوت ضعيف.
ليه تشتريها؟ عربية منتشرة جدا وكل الصنايعية
بيفهموا فيها , قطع غيارها هتلاقيها في السوبرماركت، إعادة البيع في يومين، ومساحة داخلية
واسعة جداً.
2. ميتسوبيشي لانسر شارك موديلات من 2010 ل 2013
المحرك1600 سي سي
القوة 117 حصان
الفتيس أوتوماتيك 4 سرعات تقليدي
وسعرها في السوق حالياً من 440,000 لـ
495,000 جنيه
مميزاتها اعتمادية يابانية ، ثبات ممتاز على
الطريق مقارنة بالمنافسين، شكل رياضي لسه ليه هيبة، وموتور بسيط وأعطاله نادرة.
عيوبها استهلاك
بنزين عالي شوية، عزل الصوت الأرضي مش الأفضل، والصالون من جوه تصميمه قديم وفقير
في التكنولوجيا.
ليه تشتريها؟ عربية حمولة لأقصى درجة صاج من حديد. موتور وفتيس يعيشوا العمر
كله، وشكل لسه له هيبة.
3. رينو لوجان الشكل الثاني موديلات من 2016 ل 2019
المحرك 1600 سي سي
القوة 110 حصان
العزم 148 نيوتن متر
الفتيس أوتوماتيك 4 سرعات AL4 المطور
سعرها من 410,000 لـ 475,000 جنيه
مميزاتها أفضل وسائل أمان في فئتها (ABS, EBD, 2 Airbags)،
عفشة ناعمة جداً ومناسبة للمطبات، واستهلاك بنزين اقتصادي.
عيوبها الفتيس
الأوتوماتيك (AL4) حساس جداً وبيحتاج تغيير زيت بانتظام،
وأسعار قطع الغيار (الأصلية) أغلى من الكوري والياباني
ليه تشتريها؟ أمان أوروبي (ايرباج و ABS)،
توفير بنزين ممتاز، وعفشة بتستحمل الشوارع المصرية.
4. هيونداي إلنترا HD موديلات من 2010 ل 2012
المحرك1600 سي سي
القوة 121 حصان
العزم 156 نيوتن متر
الفتيس
أوتوماتيك 4 سرعات تقليدي
سعرها لسه ماسك نفسه جداً من 460,000 لـ
510,000 جنيه
مميزاتها عربية "عملية" لأقصى درجة،
محرك قوي ونشيط، صيانة سهلة عند أي ميكانيكي، وسعر إعادة بيع هو الأقوى في القائمة.
عيوبها وسائل
أمان شبه منعدمة في الفئات الأولى، تصميمها بقا قديم ومكرر، والعفشة بتاعتها ناشفة شوية.
ليه تشتريها؟ عربية بسيطة جداً، الميكانيكا
بتاعتها مفهومة لأي ورشة، وقطع غيارها أرخص
من أي منافس في فئتها.
5. شيري أريزو 5 موديلات من 2020 ل 2022
المحرك1500 سي سي
القوة 114 حصان
العزم 141 نيوتن متر
سعرها من 450,000 لـ 495,000 جنيه
مميزاتها أحدث موديل ممكن تركبه بالسعر ده، شكل
عصري جداً، كماليات كتير (شاشة، كاميرا، فتحة سقف)، وثبات معقول.
عيوبها صوت
الموتور عالي مع فتيس الـ CVT، تقفيل داخلي "متوسط"، وقيمتها
بتقل في إعادة البيع أسرع من الياباني.
وبالنسبة للفتيس الـ CVT محتاج "سواقة هادية"، ولو قرصت عليه صوته بيعلى وتجميعه بيبقى بطيء، كمان اعتماديته على
المدى الطويل أقل من الياباني، ومحتاج محافظة شديدة على مواعيد تغيير زيت الفتيس
في التوكيل
ليه تشتريها؟ لو بتدور على "موديل عالي" ومواصفات حديثة (شاشة، سنسور،
فتحة سقف) بالسعر ده فهى الاختيار المناسب.
6. هيونداي فيرنا موديلات 2018 و 2019
المحرك 1600 سي سي
القوة 106 حصان.
العزم 144 نيوتن متر.
الفتيس
مانيوال أو أوتوماتيك تقليدي
لو حالتها ممتازة بتعمل من 385,000 لـ 425,000 جنيه
مميزاتها
صاروخ" على الطريق بسبب قوة
الموتور بالنسبة لوزنها، قطع غيار ببلاش تقريباً، وسهولة تامة في البيع والشراء.
عيوبها بتفتقر
تماماً لعوامل الأمان، والفرامل
ضعيفة، وغير مريحة في السفر، وثباتها شبه
منعدم بعد سرعة 100 كم/س.
ليه تشتريها؟ لو عايز عربية مدينة "زيرو مشاكل" قطع غيار
بملاليم، وموتور قوي جداً بالنسبة لوزنها.
7. تويوتا ياريس بيلتا موديلات من 2008 ل 2012
المحرك1300 سي سي.
القوة 92 حصان.
الفتيس أوتوماتيك 4 سرعات تقليدي
سعرها من 390,000 لـ
450,000 جنيه
مميزاتها
توفير بنزين خيالي، نعومة في القيادة،
واعتمادية تويوتا المعروفة (بتمشي سنين بدون أعطال)، وحجمها مثالي للركن في الزحمة.
عيوبها
الموتور
(1300 CC) أداءه هادي ومش بتاع جري، صالونها ضيق
شوية، وأسعارها مبالغ فيها بسبب علامة تويوتا.
ليه تشتريها؟ رغم قدم الموديل وصعب تلاقي حالة "فبريكا"
بسهولة ، بس دي تويوتا. موفرة جداً في البنزين، وموتورها "ما بيقلش
بأصله".
8. كيا سيراتو موديلات
من 2010 ل 2012
المحرك 1600 سي سي.
القوة 124 حصان.
العزم 156 نيوتن متر.
بتعمل النهاردة من 465,000 لـ 505,000 جنيه
مميزاتها انها أجمل
تصميم في القائمة (وده مش رايي لوحدي لكن رأي
أغلب الناس)، موتور قوي وسحب ممتاز، صالون واسع وخامات جيدة جداً.
عيوبها
العربية "واطية" على الأرض
وبتحك في المطبات لو محملة، وعفشتها ناشفة (رياضية) وده بيخليها غير مريحة في
الشوارع المكسرة بس طبعا عفريتة على الطرق السريعة وقطع غيارها أغلى سنة بسيطة من الهيونداي والنيسان
ليه تشتريها؟ تصميم لسه شبابي وجذاب، ثبات كويس جدا، وقيمة مقابل سعر وسرعة البيع ممتازة حالياً.
9. شيفروليه أوبترا - الشكل الجديد موديلات من 2014 ل 2017
المحرك1500 سي سي.
القوة 110 حصان.
العزم 146 نيوتن متر.
الفتيس
أوتوماتيك 6 سرعات تقليدي
سعرها النهاردة من 400,000 لـ 460,000 جنيه
مميزاتها
مساحات داخلية ممتازة للعائلات، شنطة
واسعة، سهولة في الصيانة وتوافر قطع الغيار
عيوبها
ان أداء الموتور "كـسول" شوية
في التجميع، استهلاك بنزين مرتفع نسبياً داخل
المدينة ، وتقفيلها الصيني بيظهر فيه بعض الاصوات من الابواب والتابلوه والصاج مع الوقت.
ليه تشتريها؟ عربية "حمالة أسية"، صالون
واسع، ومريحة جداً في المشاوير اليومية.
10. فيات بونتو ايفو موديلات من 2012 ل 2015
المحرك1400 سي سي.
القوة 77 حصان.
العزم 115 نيوتن متر.
سعرها
بيعمل من 380,000 لـ 440,000 جنيه
مميزاتها
تصميم إيطالي شيك جداً، توفير بنزين
ممتاز، ثبات رائع، وصاج قوي ومحمل (أمان أوروبي).
عيوبها
فتيس الـ
"Dualogic" محتاج
تعامل خاص وفهم لطبيعته، وقطع غيارها مش منتشرة بره القاهرة والإسكندرية زي الباقي.
بس ايه حكاية
فتيس فتيس Dualogic ده علشان الناس اللي هتسأل في التعليقات
ده واحد من أكثر أنواع الفتايس "المظلومة" في الفهم عند الناس،
وهو اللي بينزل في عربيات فيات زي بونتو ايفو، جراند بونتو، وفيات 500
طيب سريعا كده بيشتغل ازاى ببساطة، هو مش "أوتوماتيك" بالمعنى التقليدي، بس اسمه تقنياً AMT
Automated Manual Transmission
تخيل إن
العربية فيها فتيس مانيوال عادي (دبرياج وتروس)، لكن بدل ما أنت اللي تدوس على دواسة الدبرياج برجلك وتنقل العصاية بإيدك، فيه "روبوت" أو "وحدة
تحكم هيدروليكية" هي اللي بتعمل المهمة دي بدالك
طيب ليه الناس مش بتحبه .. لأن الفتيس ده في أصله مانيوال، فلو سقتُه زي
الأوتوماتيك العادي (دواسة بنزين وخلاص)، هتحس بـ "نترة" أو "هبدة" بسيطة بين الغيارات.
التريكة
فين بقا .. وأنت سايق، أول ما تحس إن العربية
هتنقل، شيل رجلك من على البنزين "سنة" صغيرة زي ما كنت بتعمل في
المانيوال، هتلاقي النقلة بقت ناعمة جداً وارجع دوس تاني.
مميزات الفتيس ده
توفير بنزين خيالي: لأنه مانيوال
في جوهره، فمفيش هدر في الطاقة، وبيخلي العربية موفرة جداً.
بيديك أداء رياضي: تقدر تقلبُه مانيوال وتتحكم في الغيارات بنفسك، وده بيدي متعة في
القيادة.
تكلفة إصلاح الأجزاء الميكانيكية رخيصة لأن التروس نفسها هي تروس
مانيوال بسيطة واعتمادية.
طيب عيوبه بقا اللي لازم تاخد بالك
منها
وحدة الـ Actuator وده الروبوت اللي بينقل الغيارات. لو باظت، تصليحها او تغييرها بيبقى مكلف ومحتاج ميكانيكي "بروفيسور" في الفيات، مش أي حد
يمد إيده فيه.
وكمان الفتيس ده بيكره "الزحمة" أو المشي ببطء شديد في الزحمة لفترات
طويلة، لأن الدبرياج بيسخن (زي المانيوال بالظبط).
وبالنسبة
لإعادة البيع في مصر، الناس بتخاف
منه وبتقلق من أعطاله، فبيخلي بيع العربية أبطأ شوية من الهيونداي والنيسان.
طيب ليه تشتري الفيات بونتو ايفو؟
لو عايز عربية "شيك" بمتعة قيادة أوروبية، واستهلاك بنزين هو الأقل في
القائمة تبقا هى دي.
العربيات دي إحنا اخترناهم على أي أساس. المقارنة
كانت بين (كيا، هيونداي، نيسان، رينو، ميتسوبيشي، وشيري). والنتيجة طلعت
كالتالي:"
العربيات الاوفر في البنزين رينو لوجان ونيسان صني
الاكثر اعتمادية ميتسوبيشي لانسر شارك وتويوتا ياريس
القيمة مقابل سعر هيونداى النترا اتش دي وشيري اريزو 5
توافر قطع الغيار بسعر رخيص النيسان صني وهيونداى فيرنا
في النهاية، الميزانية دي (400-500
ألف) بتخيرك بين طريقين:
- طريق
الراحة: نيسان
صني أو هيونداي HD (قطع غيار رخيصة وسهولة بيع).
- طريق
القوة: لانسر
شارك (اعتمادية وموتور يعيش).
نصيحة أخيرة: مهما كانت العربية اللي اخترتها شكلها نظيف، الكشف الفني في مركز معتمد
أهم من الفلوس اللي هتدفعها. وما
تشتريش بكلمة "فبريكا" من غير ما يطلع تقرير فني يقول الكلام ده!" وسيبك من الجهاز والقلم اللي بيتباع على الارصفة بتاع
كشف الفابريكة كل ده بلح واشتغالات
لو عجبك الفيديو ما تنساش اللايك والسبسكرايب، وانتظرني في
الفيديوهات الجاية علشان نكمل باقي السلسلة .. وقولي في التعليقات: لو معاك 500 ألف جنيه، تركب إيه من الـ 10
دول؟
اشوفكم على
خير ... سلام
