المرسيدس فئات 200 و 230 و 280 موديلات من 76 حتى 85
أحد أخر الرجال المحترمين وأحدى سيارات الزمن الجميل , قبل الفايبر و البلاستيك و الحساسات و الكرتات و الفحص بالكمبيوترات
حنتكلم عن ال W123 الخنزيرة المتعدلة أو المرسيدس معدل زي ما بيسموها ف السوق
سنوات الإنتاج : من 1976 إلى 1985 مع ملاحظة أن ال 85 نادر جدا ف مصر لان السنه دي نزلت معاها مرسيدس موديل ال W124 أو الزلمكة
من وجهة نظر الاغلبية ف سوق سياراتنا المستعملة العجيب أن أحسن موديلاتها و أغلاها ثمنا ال 84 و ال 85 النادر عشان فيهم الخلاصة بتاعة الموديل من التكنولوجيا و الأوبشن مع إن الكلام ده مش صح طبعا لان زي م حنوضح في حاجات كتير أضيفت للموديل من سنة 80 و حاجات تانية من سنة 82
ده بأه أكتر موديل إتباع منه عربيات ف تاريخ مرسيدس , إتباع منها 2.7 مليون عربية
2.4 مليون سيدان , تم إنتاجهم ف ألمانيا و إنجلترا و جنوب أفريقيا
100 ألف كوبيه , تم إنتاجهم ف ألمانيا فقط
200 ألف إستيشن واجن , ألمانيا بس
عدد محدود من ال ليموزين ( شاسيه طويل شوية )
ف التصنيف الدولي لفئات السيارات ال W123 من فئة ( فارهة متوسطة الحجم )
كل عربيات مرسيدس من أول م قالوا يلا نعمل عربيات لحد إنهاردة ليها كود حروف و أرقام للبودي الخارجي ( شكل الموديل) و للموتور , دي حاجة تانية غير أرقام الموتور و الشاسيه خالص , وكود الموديل أللي بنتكلم عنه النهاردة هو W123 و نزل ف مصر بمواتير كتير هي كالتالي :
M115 بيسموه ف السوق الموتور الأبيض وده ف موديلات السبعينات وفي منه 2000 سي سي قوته 93 حصان و في منه 2300 سي سي قوته 108 حصان و الموتورين 4 سلندر بنزين
M102 وده بيسموه ف السوق الوتور أو المكنة السوداء وده ف موديلات الثمانينات وبرضه في منه 2000 سي سي قوته 108 حصان زي ال 2300 الأبيض , وفي منه 2300 سي سي قوته 134 حصان و الموتورين دول برضه 4 سلندر
الغالبية العظمي من العربيات أللي ف مصر فيها الموتورين دول
M110 ده بأه العنتيل بتاع الموديل 2800 سي سي 6 سلندر وعلى حسب سنه الإنتاج بتختلف قوته لان ف موديلات السبعينات و أوائل الثمانينات كان كاربيراتير و ف الموديلات الأخيرة نزل إنجنكشن و قوته 154 و 175 حصان ف موديلاته الأولى و 182 حصان ف أخر موديل ليه, والعربيات أللي فيها الموتور ده فابريكة أو مغيرة موتورها الأصلي بالموتور ده عددها عندنا ف مصر محدود شوية بس لما بتنطلق ع طريق مافيش حد بيشوف ديلها
وفي كمان مواتير ديزل نزلت في الموديل ده عندنا ف مصر 4 و 5 سلندر تحمل كود OM6 بس مش منتشرة زي البنزين
بخصوص الجير بأه نزلت بأربع جيربوكسات 2 مانيول 4 سرعات و 5 سرعات , و 2 أوتو 3 سرعات و 4 سرعات
نخش بأه على حاجة تانية .
طبعا الموديل ده كان قبل حكاية تقسيم الموديلات عند مرسيدس ل C CLASS و E CLASS و S CLASS و الهري ده , بس ف الوقت ده كان ف برضه حاجات بتميز كل موديل زي مثلا :
العربيات أللي فيها موتور 2000 سي سي كنت بتلائي على الشنطة رقم 200 بدون حروف قبله و نفس الحكاية لو 2300 سي سي بتلائي مكتوب 230 ولو 2800 مكتوب 280 والكلام ف موديلات السيدان البنزين
لو العربية إستيشن واجن حتلائي بعد الرقم حرف T ولو العربية ديزل حتلائي بعد الرقم حرف D ولو العربية كوبيه حتلائي حروف CE
طبعا الكلام ده لو العربية فابريكة , أما بأه العربية لو أتعمرت و دخلت سمكرة و دوكو ف بتلائي حطين عليها الأرقام و الحروف الجديدة أللي بيكون فيها الحرف فبل الرقم زي مثلا E200 أوE280 من باب التماحيك أو أللي موجود ف السوق
_الموديل نزل منه نسختين واحدة أوروبي ودي أللي نزلت عندنا ف مصر والتانية أمريكاني ودي م نزلتش عندنا بس المستورين بتوع قطع غيار الإستعمال جابو عربيات متقطعة من النسخة الأمركاني وفي ناس كتير بتحب تعدل عربياتها للشكل الأمريكاني ده أللي بيكون إكصداماته عريضة حبتين و كمان الكشاف الدائري الأصفر ف الفانوس الأمامي
_على مدار سنوات الإنتاج لم يتغير ف الشكل الخارجي غير حاجات بسيطة جدا زي مثلا :
.الجنوط كانت حديد عليها طاسات بلون السيارة عليها علامة مرسيدس كبيرة , وبأت ألومنيوم عليها علامة مرسيدس صغيرة (الخرشوفة) زي م بيسموه ف السوق
.ثلاثة أشكال للإكصدامات ( حديد داير على أطراف الرفارف , أبو دوفر كاوتش على الأجناب , أمريكاني عريض )
.شكلين بس للشبكة ( حلق النيكل .وحلق بلون السيارة ودي نادرة شوية ف موديلات 84 و 85) بس موضوع الشبكة ده ف ناس عاملين فيه إفتكسات كتير ( أللي حاطط نجمة كبيرة ف النص زي الموديلات الحديثة , أللي عاملها ف النص كلها أسود ... ألخ ألخ ألخ )
.الكشافات الدائرية ف الفوانيس الأمامية أصبحت مستطيلة بدل دائرية بدأ من موديلات 82
.في كمان شكلين للتابلوه الأختلاف الأختلاف الوحيد بينهم أن فيه تابلوه من غير هوايات التكييف الوسطية مكانها فاضي و بارز لفوق شوية و ده كان بينزل ف العربيات أللي مش حتكون ملاكي زي التاكسي عشان يطحط العداد ف مكان الهوايات أو ال لاسلكي ف عربيات الإسعاف ... إلخ
.أكبر تعديل حصل للموديل هو تغيير المحركات ال 2000سي سي وال 2300 سي سي ف سنه 80 من الموتور الأبيض ال M115 إلى الموتور الأسود ال M102 الأكثر قوه و الأعلى ف التقنية الميكانيكية والذي أستمرت شركة مرسيدس تستخدامه حتى عام 1992 في موديلات أخرى مثل W124 أو الزلمكة وال W201 المعرفة ف مصر ب المرسيدس 190 مع إدخال بعض التعديلات عليه في منظومة حقن الوقود
وكمان سنة 82 لما إتغيرت الجيربوكسات المانيول من 4 سرعات ل 5 والأوتو من 3 سرعات ل 4
_نيجي بأه للتجهيزات أو الأوبشن
على فكرة رغم أن الموديل من إنتاج مرسيدس إلا أنه لم يكن كامل أو فول أوبشن أول م نزل كان باور و سنتر ( ضغط هواء مش كهرباء زي بتاع اليومين دول ودي على فكرة ميزه مش عيب لانه مش مربوط بكهرباء السيارة ...قصة كبيرة مش موضعنا دلوقتي) أما باقي التجهيزات كانت إختياري بفلوس زي الزجاج الكهرباء و التكييف و فتحة السقف والفتيس الأوتو
بس كان في تشكيله جامده من ألوان الصالون و التابلوه تختار منها زي م تحب , أسود طبعا , بيج موجود , أزرق شغال , نبيتي لو حابب , وكمان أخضر زيني تخيل , وطبعا مش محتاج أوضح أن الأسود و البيج أكتر لونين ف عربيات مصر أما باقي الألوان فنادرة جدا إدا كان موجود أصلا عندنا ف مصر
من سنة 80 بدأت مرسيدس تستخدم تقنية ال ABS ف أنظمة الفرامل و مثبت السرعة وكانوا أختياري برضه , كمان دللعت الصالون بشوية خشب أبانوس ف التابلوه والكونسول الأوسط بدل الحليات أللي كانت فبل كده فيبر أو جلد بس برضه كله بحسابه يا معلم
من سنة 82 بأه بدأت مرسيدس تستخدم تقنية ال AIR BAGS الوسائد الهوائية بس برضه عد فلوس لو عايزها ف عربيتك , وكمان عملوا مساحات للفوانيس الأمامية
موديلات 84 و 85 نزل فيها كمان كراسي مدفأه عشان م يحرموش حد من حاجة و يخلوا العربية فيها أوبشن زي أللي موجود عربيات كتير غالية إنهارده بس من 35 سنه فاتت
ملحوظة : ال ABS و الكروز كونترول موجودين ف مصر ف الموديل ده بس مش كتير , أما الوسائد الهوائية و الكراسي سخان تقريبا مافيش منها عندنا
وحكاية التواريخ بتاعة التعديلات و التجهيزات دي لمجرد العلم بالشيء و المعلومات العامة فقط ليه ؟ لان 99.9% من عربيات الموديل ده بحكم السن لما دخلت عمرات أصحبها زادو عليها أوبشن ما كانش فيها و بالأخص الزجاج الكهرباء و التكييف و تغيير الفتيس من مانيول ل أوتو و كمان الموتور من الأبيض لل أسود الأحدث و الأقوى , عشان كده ممكن تلاقي عربيات سبعينات فول أوبشن أوتو مكنة سودة زي عربيات 84 و 85 بظبط
مميزات الموديل :
_عربية متينة متينة متينة جدا أخر حاجة مافيش كلام , يعني خش ف الحيطة و أطلع من الناحية التانية و أنت سايب إيدك
_عالية عن الأرض يعني أنسى أن المطبات و الشوارع المكسرة تزعلك
_عفشة قمة ف الراحة و الخدمة الشاقة
_قيادة الموديل ده لها مزاق خاص غير أي مرسيدس تانية وأكيد غير أي ماركة تانية , بتحس أنك راكب مركب مش عربية , عشان كده ف ناس كتير بيسموها السفينة بس الأسم ده خنيئ شوية مش موضوعنا
_ناعمة جدا ف السحب و الجري زي العربيات الجديدة مع أن وزنها تقريبا ضعف وزن أي عربية من بتوع اليومين دول
_حتى لو هيه مش فول أوبشن بس برضه بتحس فيها بالفخامة و الرفاهية
_الموديل ده بالزات لما بتكون العربية واقفة وشده حيلها و بتلمع من النظافة بتلاقي الناس كلها ف الشارع بتبص و بتتفرج عليها , جذابة بطبيعتها مش عارف ليه , بس ده طبعا بيخلي صاحبها محسود دايما و ربنا يستر علينا كلنا
سلبيات الموديل :
_السعر الغالي عموما و الغالي جدا لدرجة المبالغة ( ف العربيات السليمة أو الفابريكة النادرة أو موديلات 84 و85 ) بالمقارنة بعربيات السبعينات و الثمانينات إن لم تكن أغلاهم على الإطلاق
_ الإسهلاك العالي للبنزين ( حتى مع ظبط الموتور ع الشعرة ) بالمقارنة بباقي سيارات هذه الفترة , أما بالمقارنة بالسيارات الحديثة بتاعة اليومين دول فهي حوت بنزين بمعنى الكلمة
_مع إن ميكانيكا الموديل مش حديثة بس في أعطال كتير ماينفعش غير ميكانيكي متخصص ف المرسيدس هو أللي يصلحها ( و دول طبعا غاليين جدا ف مصنعيتهم ), زي أعطال الكاربيراتير و الجير الأوتو و ضبط الموتور عموما , أما لو الموضوع شيل قديم بايظ و ركب جديد سليم ف أي ميكانيكي فهمان دايس
_ الفبريكة و السليم من هذا الموديل نادر جدا في السوق لان الغالبية العظمى أتعملها عمرات ف الكامل و تغيير مواتير و إضافة أوبشن الموديلات الحديثة الثمانينات لموديلات السبعينات
_ إنتشار المضروب منه كثيرا ف السوق (الذي كان ف الأساس نصين أمامي و خلفي و دخل على أنه قطع غيار إستعمال خارج و تم إعادة لحامه و تجميعه مرة أخري , كذلك السيارات التي تم تهريبها إلى داخل البلاد من الدول المجاورة لانها تعتبر زخيصة جدا في هذه البلاد بالمقارنة بأسعارها عندنا مع تزوير أوراقها و إنزالها السوق و بيعها بعشرات الألوف من الجنيهات)
_إنتشار قطع الغيار المضروبة غير الأصلية لان الموديل قديم فبل تطبيق نظام رقم القطعة لدى مرسيدس ف الموديلات الأحدث لمحاربة قطع الغيار المغشوشة التى تضر السيارة
_كما بدأ الموديل يواجه مشكلة ندرة بعض قطع الغيار وأرتفاع أسعار أخرى خاصة التي لا يتم تصنيعها ف الداخل أو الخارج و التي يجب أن تأتي من سيارة أخرى لدى تجار قطع الغيار الإستعمال ك الكرونة و الكردان و وشوش السلندر ... ألخ ألخ ألخ
_نيجي بأه للأسعار:
من 25 إلى 65 ألف جنيه مصري على حسب الحالة و الموديل والأوبشن, يعني المتوسط 45 , مع وضع حاجتين ف الإعتبار لو حد حيفكر يشتري العربية دي
1-ال 200 أغلى موديل لان ضريبة تجديد الترخيص عادية حسبة 200 جم كده ولا حاجة, أما باقي الموديلات تقل ف السعر 10 ألف جم عن ال 200 لو نفس الحالة لان ضريبة التجديد السنوي زيادة عن ال ألف جنيه بشوية مثال ( لو عربية 200 ب 50 ألف تبأه ال 230 نفس الموديل و الحالة ب 40 ألف بس )
2-لازم حوض الموتور بتاع العربية يكون بوية فابريكة مش مرشوش نهائيا لان ده بيعمل مشكلة عند تجديد الترخيص للأسباب أللي قولنا عليها ف السلبيات , لان مهندس الفحص بيشك على طول أن العربية مضروبة و بيحولها كشف شاسيه و قصة طويلة مش موضوعنا دلوقتي
. معلش طولت أوي عليكوا بس الموديل ده يستاهل إنك تتعرف عليه كويس