استكمالا للجزء
الاول عربية اوتوماتيك بتكييف بسعر 50 الف جنية
والجزء الثانى
اللى اتكلمنا فيه عن عربية اوتوماتيك بتكييف بسعر من 50 الى 70 الف جنية وجبتلكم
10 عربيات واتكلمنا عن مواصفاتها ومميزاتها وعيوبها وسعرها
ده الجزء الثالث
وهنكمل باقى العربيات فى الفئة السعرية من 50 الى 70 الف
وإن شاء الله
هنكمل مع بعض باقى الفئات السعرية لحد ما الاقى
التفاعل قل مع الفيديوهات وساعتها هعرف انى وصلت للجزء الأخير
جبتلكم كل
العربيات الاوتوماتيك وفيها تكييف من اسواق السيارات والمعارض واخر تحديث سعر لشهر
ديسمبر 2021
كل عربية هقولكم
سعرها من كام ل كام ومواصفاتها وللعلم الفرق ده فى السعر هو فرق الحالة مش سنة
الصنع
ونصيحة بقولها
دايما اشترى عربية حالتها محترمة وبلاش تسترخص
الحاله هى اهم
حاجه اهم كمان من سنة الصنع
بنشوف عربيات
موديل قديم افضل حالا من موديل احدث
وياريت تتعب
وانت بتشترى علشان ماتتعبش بعد كده واكشف على العربية فى مركز صيانه او محطة بنزين
ولازم تكون
العربية رخصتها سارية ... واوعى تجيب عربية رخصتها منتهية
واشترى العربية
بعقد مسجل شهر عقارى والدفع على رأس العقد فى مقر الشهر العقارى
ولو دفعت عربون
وكتبت عقد ابتدائى خلى العربون مبلغ رمزى واكتب العربون فى العقد الإبتدائى
كل عربية هجيبها
هقولكم شوية معلومات عنها ومميزاتها وعيوبها
وفى نهاية
الفيديو زى ماتعودنا هجيبلكم الزتونة
هقولكم احسن
عربيات من كل الانواع اللى ظهرت فى
الفيديو
الجزء الثالث هيكون
فيه 9 عربيات
بلاش نطول المقدمه وندخل فى الموضوع علطول
عربيات اتوماتيك
بتكييف بسعر من 50 الى 70 الف جنية
اول
عربية معانا
نيسان صنى 1994
حتى 2000 بسعر من 50 الى 65 الف
امكانيات العربية
هتلاقى فيها باور ستيرنج ممتاز تكييف محترم سنترلوك مرايات كهرباء والتحكم فيها من الداخل فتح الشنطه والتانك من الداخل.
الموتور كاربراتير 1300 سى سى وعلى فكره موديل 99 و2000 واحد فى كل شىء
المميزات
العربية ناعمه جدا والفتيس نقلاته
سلسه . العفشه ممتازه وبتتحمل خشونة الطريق .
صوت الموتور هادىء . الخامات الداخلية والخارجية ممتازه فى تصنيع العربية والتقفيل يابانى يعنى مش هتلاقى غلطة.
التصميم حديث . قطع الغيار متوفره وسعرها معقول .
فى السفر ثبات ممتاز على السرعات العاليه بس آخرك 140 كم/س وهتحس ان العربية ريشه
استهلاك البنزين معقول الصفيحه بتعمل حوالى 300 كيلو متر على الطرق السريعة
عيوب العربية
التسارع متوسط يعنى ماتحاولش تشد
مع اى عربية علشان شكلك هيبقا وحش .
سحب الموتور بيتأثر بتشغيل التكييف .
ارتفاع العربية قليل عن مستوى سطح
الارض وده بيتسبب انها بتحك فى المطبات ولازم تستخدم جنوط 14 بوصه او علايات.
السرعه المثاليه اللى هتلاقى عليها ثبات عالى 120 كم/س بعد كده الثبات بيقل
ثانى
عربية معانا
رينو كليو موديل
2004 و 2005 بسعر من 60 الى 70 الف
العربيه في منها كذا موديل كل موديل بمحرك مواصفاته مختلفه
منها 1200 سى سى
16 صباب قدرته 75 حصان
ومنها موديل بمحرك
1400 سى سى 16 صباب قدرته 98 حصان
الموديلين نزل منهم اوتوماتيك ومانيوال
السيارة عالية عن الارض بالرغم انها عالية فثباتها ممتاااز
مناورتها داخل المدن حلوة جدا و هتشدك للجرى
الباور بتاعها ناشف شوية مش ناعم زى الكورولا بس الميزة انة بيديلك تحكم كامل فى المناورة
وكمان قطر لف دوران الدريكسيون واسع بيخليك تناور و تركن كويس
يعنى ممكن فى الشوارع الداخلية عندنا فى مصر تلف حولين نفسك من غير ماترجع
و لا تطلع بظهرك و دى ميزة بحبها جدا
ثباتها عالى لحد سرعة 140 كم/س
العفشه بتاعة العربيه ناشفه شويه
اسعار قطع الغيار تعتبر معقولة بس قليلة يعنى هتلف علشان تلاقى اجزاء من قطع
الغيار وخصوصا العفشه والفايبر الداخلى
بالرغم ان العربية 1200 سى سى بس
سحبها كويس جدا لانها عربية خفيفة
الصالون ضيق وخصوصا الكنبه اللى ورا يعنى لو انت طويل وبتحب ترجع الكرسى من الآخر
محدش هيعرف يعد وراك وسبب الموضوع ده انهم زودوا فى مساحة الشنطة الخلفية على حساب
الصالون
هتلاقى سعة الشنطه 510 لتر
الدريكسون مبيتحركش فوق وتحت يعنى متعرفش تظبط ارتفاعه علشان تشوف لوحة
العدادات كويس او علشان القعده تبقا مريحه
يعنى لا انت ولا اللى قاعد ورا هتبقوا مستريحين لكن لو انت يابانى واللى
ورا صينى هتبقا العربية مناسبة جدا
استهلاك البنزين كويس جدا وبتعمل على الطريق السريع 350 كم فى الصفيحة اللى
هى 20 لتر بنزين
من عيوبها مش اى ميكانيكى يعرف يشتغل فيها علشان محدش بيفهم فيها وبيخافو
يتعاملوا معاها
العربية
الثالثه معانا
رينو ميجان موديل
من 2002 لحد 2006 بسعر من 60 الى 70 الف
العربية دى هى
السهل الممتنع
عربية كلها
امكانيات وكماليات هتلاقى فيها اوبشنز مش موجوده فى عربيات موديل 2021
وسريعة وثابته
وواسعه والعزل مثالى وفيها كل المميزات
محركها 1600 سى سى
16 صباب قدرته 115 حصان عند 5500 لفة فى
الدقيقة
وعزم الدوران 152
نيوتن متر عند 4200 لفة فى الدقيقة
المحرك بيشتغل
بنظام الحقن الالكترونى متعدد النقاط
المالتى بوينت انجيكشن
والفتيس بتاعها
حكايه من حكايات الزمن
تقريبا العربية دى
جربوا فيها كل الانظمة الحديثه وبعد كده الشركة فلست
عربية محترمة لكن
للأسف زى حاجات كتيرة مالهاش حظ فى مصر
الميجان مش من العربيات اللى تتهان.........لو اتهانت ...تزعل وتزعلك وتقف
خالص..........لكن بالمعاملة الحسنة....تمشى معاك كويس
لان عيبها الاساسى ان الحساسات كتير جدا ومربوطة بدوران المحرك
وموديلات ما قبل 2005 مختلفة تماماً عن ما بعد 2005 شكلاً و مضموناً
انا شخصيا ببعد عن العربيات المستعملة اللى مليانه حساسات وكمبيوتر ويكون
عدا عليها اكثر من 15 سنه
من ناحيه علشان التكنولوجيا كانت قديمة وفيها مشاكل وتطورت بمرور السنين
فهتلاقى فى القديم اعطال كتير لكن الموديلات الجديدة مافيهاش الاعطال دى
ومن ناحية تانية كل الحساسات دى وكارت الفتيس والكمبيوتر ماحدش فى مصر
بيعرف يظبطه والمشكلة الاكبر ان مافيش حد هيقولك معرفش لكن هيشتغل ويخرب وتقعد
رايح جاى من ميكانيكى لكهربائى وتصرف فلوس على الفاضى وممكن فى يوم تروح تشترى وماتلاقيش
حساس من الحساسات الكتيرة دى وساعتها العربية هتتوقف تماما
رابع
عربية
بيجو 405 موديل من
1994 حتى 1998 بسعر من 55 الى 65 الف
ال 405 عربيه ممتازه و محترمه جدا و لو عاوز فرنساوي يبقي قبل موديل 93
انما بعد كده كله مصري
مميزات ال 405
اتساع الصالون
الاعتماديه
القدرة والعزم
سهوله الصيانه و توافر قطع الغيار
الثبات العالي علي السرعات العاليه
اتساع الشنطه الخلفيه
خامات السياره جيده جدا بالسبه للفرنساوي و معقوله بالنسبه للتقفيل المصري
عيوب ال405
ضعف عزل السياره
ارتقاع صوت المحرك و بالاخص في الطراز الثاني و الثالث
صوت مروحه التكييف المرتفع
التكييف بيأثر علي سحب العربيه
المشكلة الكبيرة بتاعة السخونية فى فصل الصيف سواء فى النسخ الفرنساوى والمصرى
لكن دى طبعا ليها حلول
لو عاوز تعرف معلومات اكثر عن البيجو 405 هتلاقى لينك هيظهر دلوقتى فى علامة الآى فوق الفيديو ده
خامس
عربية
ميتسوبيشى لانسر
كريستالة موديل1996 حتى 2000 بسعر من 55 الى 70 الف
“الكريستالة“ استمر إصدارها من سنة 1996لحد 2000
تتوفر لانسر بمحركات 1300 و 1500 و 1600 سى سى
لو عايز تعرف معلومات اكثر عنها هيظهر دلوقتى فيديو فوق فى علامة الآى
هتلاقى تفاصيل التفاصيل
الكريستاله بتتميز بشكل رياضى وموتور قوى ونظام توجيه محترم
فرامل قويه وثبات عالى فى الملفات وعلى السرعات العاليه وده بسبب قربها من
الارض ويعتبر ميزه وعيب فى نفس الوقت لان انخفاض العربية بيثبتها على الارض لكن
عيبها فى المطبات
العربية صالونها واسع وقعدتها مريحة وآداءها رياضى
أما عن العيوب، فالعربية منخفضه إلى حد ما، وعداداتها مختصرة، والتابلوه
بسيط وخاماتها الداخلية متوسطة.
بتنتشر شعبية الميتسوبيشى لانسر الكرستالة في السوق المصري، فهي من السيارات الاعتمادية،
حيث تم تزويد النسخة المصرية المشهورة بموتور
1300 سى سى بقوه 75 حصان وعزم 108 نيوتن متر وهو موتور
متواضع جدا وبدائي لكن كان اعتماديا جدا وبيحقق المعادلة الصعبة للمصريين، ورغم
أنها عربية فقيرة فى الكماليات لكن خامات الصالون تعتبر معقولة لما تعمل مقارنة مع
العربيات التانية واللى من جيلها وفى نفس
الفئة السعرية.
وبتتميز الكرستالة بأدائها الرياضي وتوجيهها المميز، اللي بيعزز من ثباتها
رغم انخفاضها من الارض، وانخفاض وضعية الموتور اللي تعد ميزة وعيب في نفس الوقت، لان
ميزته انه يخلى العربية ثابتة علي الطريق،
أما العيب فبيتمثل في اصطدام بدن العربية فى المطبات خاصة لما تكون العربية محمله.
سادس
عربية معانا
سبرانزا ايه 620
موديل من 2007 لحد 2011 بسعر من 55 الى 70 الف
من السيارات اللى مالهاش حظ في السوق
المصري اسبرانزا A-620 الموديل
ده مليان مزايا وامكانيات، وبالرغم من كل ده بيتجاهلها زبائن المستعمل بحجة أنها
صيني وحجمها كبير وبتستهلك بنزين مع ان العربية دى والايه 516 والايه 113 والبرليانس
جالينا من اول العربيات الصينى اللى نزلت مصر وايامها وكلاء العربيات الصينى فى
مصر كانوا بيستوردوا احسن حاجه من الصين علشان يحاولوا يقنعوا الشعب المصرى
بالعربيات الصينى لكن طبعا بعد ما الشعب اقتنع وكالعاده بعد كده بقوا بيجيبوا زبالة المصانع فى الصين
لكن بالمقارنة بين سعر ايه 620 واللى بتوفره
من إمكانيات
بصراحه تستحق عناء التفكير في اقتنائها،
خاصة أنها مزودة بمحرك بقوة 124 حصان وناقل حركة INVESC II AMT ميتسوبيشي، يعنى من الاخر أهم الأجزاء
الميكانيكية فيها صناعة ياباني.
والعربية فيها باقة من الكماليات المحترمة
هتلاقى الفرش الجلدي الفاخر وتكييف الهواء
الديجيتال الأوتوماتيكي والوسائد الهوائية للسائق والراكب الأمامي وفتحة السقف
الكهربائية والتحكم كهربيًا في الزجاج والمرايات الجانبية ومصابيح الشبورة
الأمامية والخلفية والستارة الخلفية الكهربائية والمصابيح الأمامية القابلة للتعديل.
ومن مميزاتها
الكتيرة ان ممكن يركبلها قطع
غيار لانواع تانية لان طبعا فى مصر تجار قطع الغيار زى مانتوا عارفين بيجيبوا من
الصين ارخص قطع الغيار رغم ان المصانع عندها قطع الغيار النظيفة اللى بتنزل لباقى
الدول العربية بس بسعر اغلى شويه والتاجر المصرى كالعاده عايز يكسب اضعاف وبالتالى
يبحث عن القمامه
وياما اتكلمت فى المواضيع دى مع وكلاء
وتجار قطع غيار بس للاسف لا حياة لمن تنادى ومن الآخر انا زهقت من الكلام اللى
مافيش منه فايده
واخذت بالمثل الانجليزى اللى بيقول
اياك ومصارعة الخنزير, فهو يستمتع
بالمصارعة، بينما تلوث انت ملابسك وسمعتك
علشان كده بعض مالكي سبيرانزا ايه 620 بيدوروا على قطع غيار انواع تانية علشان تعيش
وتعمر زى متسوبيشى وتويوتا وانواع تانية كتير
يعيب اسبرانزا ايه 620
إلى جانب السمعة السيئة للعربيات الصيني حاليا أن محركها سعة 2000 سي
سي وده طبعا بيزود متوسط استهلاكها البنزين العربية بتعمل 8.7 لتر لكل 100 كم
مقطوعة،
سابع عربية معانا اوتوماتيك
بتكييف فى حدود السعر
هوندا سيفيك موديل
1992 لحد 1995 بسعر من 60 الى 70 الف
محرك الهوندا سيفيك يحمل كود D16A9 ويتميز بوحدة إلكترونية للتحكم.
المحرك نازل بإصدارين واحد سعة 1500 سى سى بقدرة 130 حصان والثانى سعة 1600 سى
سى، بقدرة 137 حصان.
4 سلندر، 16 صمام.
مع عزم محترم للمحرك 145 نيوتن / متر/ 5200
لفة.
السرعة القصوى 220 كم/ساعة.
بتوصل لسرعة ال100 كم/س فى زمن 8.7 ث
ونزلت العربية دى بنوعين من نواقل الحركة يدوي من خمس سرعات ، واتوماتيك من أربعة سرعات.
وآلات الجر أمامية.
سعة خزان الوقود 45 لتراً.
مميزات الهوندا سيفيك
محرك قوي سريع الاستجابة.
شكلها مميز ورياضي.
الصالون الداخلى واسع والقعده مريحه وخاصةً
المقاعد الأمامية.
ثبات عالى فى السرعات العالية وفى الملفات
فرامل قوية بسبب احتوائها على طنابير
استهلاك البنزين ممتاز.
وسائل امان محترمة من احزمة أمان قوية
ثلاثية التثبيت امامى وخلفى
عدد 2 وسائد هوائية للسائق والراكب الامامى.
وفى نسخ نزلت بفرامل ايه بى اس مانعة
للانغلاق
عيوب هوندا سيفيك
ارتفاع سعر قطع الغيار مقارنة بانواع تانية
من نفس الجيل.
التكييف ضعيف.
انخفاض مستوى العربية وقربها من الأرض وده
للاسف بيتسبب انها بتحك فى كل المطبات.
لو عايز معلومات اكثر عن الهوندا سيفيك
هتلاقيها فى اللينك اللى هيظهر حالا فوق فى علامة الآى
ثامن عربية معانا
تويوتا كورولا
عيون موديل 1998 بسعر من 60 الى 70 الف
اتقدمت التويوتا عيون في مصر بمحركات 1300
سي سي كاربراتير وناقل حركة مانيوال 5 سرعات بقوة 88 حصان واتوفرت نسخ محدودة
بمحرك 1600 سي سي وناقل حركة أوتوماتيك وحقن الكترونى للوقود ودى تعتبر متفوقة على
لانسر الكريستالة بالمحرك الثاني من حيث الأداء، نزلت برضوا نسخ محدودة 1300 سي سي
أوتوماتيك.
العربية آدائها جيد على الطريق وسحبها كويس
جدا بالنسبة لمحرك ال 1300 سي سي اللى حقق المعادلة الصعبه من القوة والسرعة والتوفير
في استهلاك الوقود
بتمشى 280 كيلومتر فى الصفيحة او ال20 لتر,
والمحرك ده رغم صغره الا انه بيوصل لسرعة 160 كم في الساعة بشكل مريح .
وهتلاقى صوت المحرك منخفض ومافيش اى
اهتزازات قوية في العربية على السرعات العالية.
ناقل الحركة ناعم ومتوافق مع المحرك
والنقلات سلسه لكن بالنسبة للنسخ المانيوال كان فى شكوى متكررة من ان اسطوانة
الدبرياج بتتاكل بسرعة ولازم تتغير كل فترة
بتتميز تويوتا كورولا عيون
بصالون مريح ، وبتتوفر بتجهيزات كثيرة وفرش جيد.
ومن أكثر المميزات الداخلية ان التكييف قوي
حتى على أقل السرعات . وكمان خامات تقفيل الصالون جيدة لكن شكل التابلوه وتجهيزات العربية
بسيطة ومافيهاش ازرار كتيرة .
لكن يعيب الصالون الداخلى انه ضيق في الكنبة الخلفية بمعنى ان آخرك هتركب اتنين فى
الكنبه ورا
والعربية واطيه من الارض وهتحك في المطبات
لكن في النهاية الانخفاض والقرب من الأرض بيخليها
ثابتة على الطريق وهتوصل لسرعة ال 160 كم/س بثبات عالى
بالنسبة لسرعة وسعر اعادة البيع
لا تعتبر تويوتا كورولا عيون من السيارات
الجيدة في اعادة البيع في مصر للاسف
بالنسبة لقطع الغيار هتلاقيها متوفرة لكن
مش عند كل تجار قطع الغيار يعنى هتلف عليها شويه وسعرها هتلاقيه مناسب لكن أعلي شويه
من الكوري وكمان أعلي من الجيل اللى نزل بعد كده من تويوتا كورولا
وعموما قطع الغيار الأصلية معمرة وبتعيش
تاسع
عربية معانا والاخيرة فى الفيديو ده
فولكس فاجن جولف 2
موديل من 1988 حتى 1990 بسعر من 55 الى 70 الف
بداية جولف 2 من الخارج شكلها جميل وحجمها
متناسق
بالنسبة للصالون الداخلي أوسع صالون داخلي
لعربية هاتش باك ركبتها في هذه الفئة تقريبا الكراسي الأمامية مريحة وواسعة وكمان
الكنبة الخلفية واسعة ومريحة والحقيقة دى من اهم الميزات
الشنطة الخلفية صغيرة نوعاً ما لكن حجمها مقارب
لشنطة ال 128.
الإستبن الصغير عملي وخفيف
الكراسى بتتعدل فى الارتفاع والامام والخلف
طارة الدركسيون فخمة وجميلة والعدادات
معقولة والتابلوه جميل ومتناسق وتصميمه
يعتمد على الزوايا وليس إنسيابي مثل الموديلات الحديثة ولكن معقول
الموتور 1300 سى سى لكن
هتلاقي السحب معقول في ال RPM الواطي لكن بعد 3000 RPM السحب بيكون ممتاز وقوي
نقلات العربية طويلة النفس جداً ... لغاية 6000 RPM لكن القيادة الإقتصادية يفضل متزودش عن 4000 RPM
صوت الموتور جميل والعزل كويس لكن مع
RPM العالي الصوت يعلى
بشكل معقول ومقبول
ثبات العربية ممتاز جداً حتى ال 180 كم/س (جنوط
أصلية 14 عريضة وكاوتش عريض)
الخلاصة (الثبات ممتاز والمناورة بالعربية
ممتازة وتشجعك على الغرز والدركسيون لفاته مرنة لأقصى درجة أثناء المناورة
حجم العربية وأبعادها رغم رحابتها من
الداخل إلا أنها سهلة التعامل من الخارج
العربية مريحة في المطبات تحس إنها تقيلة
وراسية
إستهلاكها في البنزين داخل المدينة حوالي
180 كيلومتر في الصفيحة لأنها كربيراتير
الموتور ال 1300 سى سى مناسب لكن العربية
ثقيلة عليه اما موتور ال 1600 بيخليها ولا الجاكوار في السحب
نصيحة للى عايز يشتري الجولف لازم تعرف
أنها معشوقة الشباب
والشباب مبهدلين سلسفين ابوها فلو عايز تشتري عربية حالتها كويسه لازم تكشف
عليها بدقة ويستحسن سمكري يشوفها لأنهم بيركبولها ارباع وإنصاص وغيره ولازم بعد
كشف السمكرى تروح بيها لمركز صيانه او محطة بنزين وترفعها وتاخد تقرير
بالنسبة لأسعار قطع الغيار معقولة وبعضها
مرتفع لكن متوفرة ومعمرة جدا والقطع
المستوردة إستعمال الخارج كتيرة جداً
دى كانت
آخر عربية اوتوماتيك بتكييف بسعر من 50 الى 70 الف جنية
افضل عربيات من
التسعه اللى فاتوا بالترتيب
ميتسوبيشى لانسر
كريستالة موديل1996 حتى 2000 بسعر من 55 الى 70 الف
بيجو 405 موديل من
1994 حتى 1998 بسعر من 55 الى 65 الف
نيسان صنى 1994
حتى 2000 بسعر من 50 الى 65 الف
تويوتا كورولا
عيون موديل 1998 بسعر من 60 الى 70 الف
فى عربيات ماجبتش
سيرتها فى الفيديو مع انها اوتوماتيك وبتكييف وفى حدود السعر اللى بنتكلم فيه لكن
للأسف
عربيات بلاش منها احسن
لأنها ياإما السعه اللترية بتاعتها عاليه وهتبهدلك فى استهلاك البنزين وفى الضريبه
السنويه
يإما قطع غيارها
قليلة جدا وهتشقى علشان تجيب قطعة الغيار غير ان فى قطع غيار خلاص انتهت ومش
موجوده فى السوق
يعنى مثلا ممكن
تلاقى مساعدين بس لو سوسته اتكسرت شكرا
ممكن تلاقى كوبلن
خارجى لانه بيبوظ بسرعه وكل تجار قطع الغيار بيشتغلوا فيه لانه مطلوب
لكن لو باظ منك كوبلن داخلى شكرا مش هتلاقيه عند
حد لانه من قطع الغيار المعمره علشان كده تجار قطع الغيار مش بيشتغلوا فيه
وهكذا
واحد يسألنى
ويقولى طيب ليه تجار قطع الغيار مش بيستوردوا كل قطع الغيار
اقول لحضرتك ان
تاجر قطع الغيار عاوز يقلل دورة رأس المال يعنى البضاعه ماتقعدش عنده بالسنين
علشان كده بيشتغل
فى الحاجات اللى عليها سحب كتير وبيبعد عن العربيات النادرة وقطع الغيار المعمره
اللى الطلب عليها قليل
المهم
العربيات اللى بنصحك تبعد عنها
جيب
شيروكى
فيات
برافا
فيات
ماريا
تويوتا
ستارليت
تويوتا
كورونا
سيتروين
زد اكس
سيتروين
اكسارا
بيجو 605
دايهاتسو
ابلوز
شيرى
كيو كيو
شيرى
ايه 11
جيلى باندا
فولفو
740
فولفو
244
شانجان
بينى مينى
تويوتا
تيرسل
سامسونج
فورد
تورس
فورد مونديو
فورد اكسبلورار
فورد اسكورت
فورد كونتور
سوزوكى
بالينو
سوزوكى
سبرنت
مازدا
فاميلى 323
شيفرولية
تراكر
شيفرولية
كابريس
شيفرولية
ماليبو
نيون
كرايسلر
ستراتوس
اللى
هيدخل على الجزء الاخير من الفيديو هيفتكرنى بقول تعويذه من كثر الاسامى الغريبة
العربيات
دى انقرضت كقطع غيار وعددها فى السوق قليل وفى منها 4000 سى سى يعنى حوت بنزين
علشان كده هتلاقى سعرها منخفض
فى نهاية الفيديو
اتمنى اكون قدمت معلومة مفيدة
اشوفكم على خير
سلام