السيارات الكهربائية أرخص من البنزين؟! حساب التوفير
مقارنة صادمة بين الكهرباء والبنزين.. لن تصدق الفرق في التكلفة!
تعالى معايا وانا هقولك تفاصيل مهمة هنقول كل عيوب ومميزات العربيات الكهرباء واسعارها حاليا
وهنحسب التوفير بين الكهرباء والبنزين قد ايه بالضبط وهل يستاهل ولا زى قلته
خليك معايا ... علشان الكلام الجاي مهم
العربيات الكهرباء في مصر: مميزاتها وعيوبها اللي محدش قالك عنها! (ومفاجآت هتصدمك)
النهاردة هنتكلم عن حاجة انتشرت بالفعل في مصر والعالم كله... وهى العربيات الكهرباء!
هنعرف مميزاتها الحقيقية، والعيوب اللي ممكن تخليك تفضل عليها البنزين، وأسرار متعلقة بالسوق المصري!
✅مميزات العربيات الكهرباء
اول حاجة والأهم وهي توفير فلوسك (على المدى الطويل)
· العربيات الكهرباء أقل في تكلفة التشغيل:
لو عندك عربية بنزين بتمشي 15 كم لكل لتر، اللي هي تقريبا 7 لتر بنزين هيمشوك 100كم وده بيكون في اغلب العربيات ال 1500 سي سي احب اقولك ان في العربية الكهرباء هتمشي نفس المسافة بـ أقل من الرقم ده بكتييير وتعالوا نحسبها مع بعض
بس الحسبة دي في مصر هتغلبنا شوية علشان مرتبطة ب 3 مؤثرات
1- سعر الكهرباء (منزلي/تجاري) وكل نوع متقسم لشرائح.
2- سعة بطارية العربية (وبتتقاس بالكيلو وات ساعة - kWh).
3- كفاءة الشحن ودي بتتأثر بعوامل كتير هنتكلم عنها كمان شوية.
بالنسبة لسعر الكهرباء بص على الصورة دي اللي هتلاقي فيها كل شرائح العداد المنزلي وزى ما شايفين الشريحة الأولى 68 قرش التانية 78 قرش الثالثة 95 قرش لكل كيلو وات
واعتقد ان اللي هيجيب عربية كهرباء مش هيكون بيستهلك الارقام دي فأكيد هيكون من اول الشريحة السادسة اللي هى استهلاك لحد 1000 كيلووات في الشهر يعني الكيلو ب 210 قرش
ودي صورة الإستهلاك في الشرائح التجاري وطبعا شايفين الفرق واضح فنصيحة اشحن عربيتك الكهرباء في البيت اوفرلك
الحاجة التانية اللي هتأثر على الحسبة بتاعتنا هي سعة البطارية وهنشوف في الصورة دي العربيات الكهرباء المتوفرة في السوق المصري وسعة بطارياتها وتكلفة الشحنة الكاملة من 0 – 100%
طب حسبناها ازاى .. ركز معايا
الحسبة سهلة خالص : هنضرب سعة البطارية بالكيلو وات في سعر الكيلو حسب الشريحة
ولو هتفكر تشحنها في محطات الشحن السريع زود على الكيلو من 3 الى 8 جنية
فمثلا : لو هنقارن بين عربية بنزين 1500 سي سي وعربية كهرباء 50 كيلو وات في المشي 1000 كم
العربية الكهرباء بتستهلك تقريبا من 15 الى 20 كيلو وات لكل 100 كم بتمشيهم
والعربية البنزين ال 1500 سي سي بتستهلك تقريبا من 6 الى 8 لتر لكل 100 كم
والفرق ده حسب نوع السواقة (بتحرق ولا ماشي طبيعي) – (الهواء معاك ولا ضدك) – (سايق في مطالع ولا طريق مستوي) – (مشغل التكييف ولا لأ) – (الجو صيف ولا شتاء).
فمثلا: لو هنحسبها بتكلفة الكهرباء (الشريحة السادسة - 2.10 جنيه/ك.و.س)
· متوسط استهلاك العربية الكهرباء : 15 - 20 ك.و.س / 100 كم.
· إجمالي الاستهلاك لـ 1000 كم:
لو هنحسب على الكفائة العالية 15 ك.و.س × 10 = 150ك.و.س
لو كفائة الشحن الأقل 20 ك.و.س × 10 = 200ك.و.س
· يبقا التكلفة:
لو في حالة كفائة الشحن العالية ال 150 كيلووات ساعة هنضربها في سعر الكيلو وات 2.10 جنية هتساوي 315 جنية لقطع مسافة 1000 كم
وبالنسبة للكفائة الأقل هنضرب 200 كيلووات ساعة في سعر الكيلووات 2.10 جنية هتساوي 420 جنية لقطع مسافة 1000 كم
يعني العربية الكهرباء هتكلفنا من 315 الى 420 جنية لما نمشي 1000 كم
طيب تكلفة البنزين (أوكتان 92 – اللى سعره دلوقتي 17.25 جنيه/لتر)
· متوسط استهلاك العربية البنزين من: 6 – 8 لتر / 100 كم.
· يبقا إجمالي الاستهلاك لما نمشي 1000 كم:
هنضرب ال 6 لتر في 10 هتدينا 60 لتر لو عايزين نمشي مسافة 1000 كم
ولو 8 لتر يبقا هنحتاج 80 لتر علشان نمشي ال 1000 كم
هضرب ال 60 لتر وال 80 لتر دول في سعر اللتر 17.25
يبقا النتيجة هتكون من 1,035 الى 1,380 جنية تكلفة لما نمشي 1000 كم بعربية البنزين وده جدول المقارنة
التوفير
--------
من 615 – 1065 جنية
يعني التوفير عند إستخدام العربية الكهربية هيكون بنسبة من 60 الى 75%
بس خلي بالك ان في عوامل تانية مؤثرة
فمثلا:
عربية زى تيسلا موديل 3 بتستهلك ≈14 ك.و.س/100 كم يعني تكلفة: 294 جنيه لقطع مسافة 1000 كم على الشريحة السادسة.
ولو اتزنقت مثلا وهتشحن في محطة شحن سريع: هتزود حوالي من (3–8 جنيه/ك.و.س): فالتكلفة هترتفع وتبقا من 450 – 1600 جنية لكل 1000 كم.
وبرضوا محسبناش مصاريف صيانة العربية البنزين: زى مثلا (تغيير زيت المحرك، والفلاتر، وتغيير البوجيهات , الى آخره) ودي نسبة صعب حسابها لأنها بتختلف حسب نوع الزيت اللي بتستخدمه ونوع عربيتك وسعر قطع الغيار اللي بتستعملها.
طيب ايه موضوع كفائة الشحن (EV Charging Efficiency) ونعمل ايه علشان نزودها
دي نسبة الطاقة الكهربائية المستخدمة فعليًا مقارنة بالطاقة الكلية اللى بناخدها من مصدر الشحن
طيب ايه العوامل اللي بتأثر على كفائة الشحن
اول حاجة نوع الشاحن او بنسميه (مستوى الشحن)
فمثلا الشحن البطيء 120V:
الكفاءة بتاعته من 80 الى 90% بسبب فقدان الطاقة على شكل حرارة في الكابلات وفي عملية تحويل التيار من AC الى DC
الشحن السريع 240V:
الكفاءة بتاعته بتكون من 85 الى 92% يعني أكثر كفاءة بسبب تقليل وقت الشحن والفقدان الحراري
الشحن فائق السرعة DC Fast Charging - 400V+:
كفائته بتكون من 90 الى 95% لكنه بيسبب تدمير وتدهور اسرع للبطارية مع الإستخدام المتكرر
ثاني حاجة مؤثرة على كفائة الشحن هي:
حالة البطارية ودرجة حرارتها لأن البطاريات بتفقد كفاءة الشحن في الطقس شديد البرودة وشديد الحرارة وممكن تنخفض الكفاءة من 70 الى 80% بسبب الحاجة لتسخين البطارية في الشتاء او بطئ الشحن في الصيف بالنهار
كمان الشحن عند نسبة شحن عالية ومؤشر الشحن عند من 80 الى 100% بيكون أقل كفاءة بسبب تباطؤ عملية الشحن
ثالث مؤثر هو فقدان الطاقة في الكابلات والمحولات
كل ما زاد طول الكابل، زادت المقاومة الكهربائية، وده بيقلل الكفاءة علشان كده لازم لو هتجيب عربية كهرباء تكون ساكن في دور ارضي او فيللا او تحطها في جراج خاص يكون فيه فيشه كهرباء لأن كل لما كابل الكهرباء هيطول هتفقد طاقة
بعض الطاقة تُفقد في تحويل التيار المتردد من (AC) إلى تيار مستمر (DC) عند استخدام الشواحن السريعة.
بشكل عام، كفاءة الشحن للعربيات الكهربائية بتتراوح بين من 80 الى 95% اعتمادا على المؤثرات اللي قولناها دي ولو عايزين نزود النسبة دي ونحافظ على البطارية فيفضل نبعد عن الشحن فائق السرعة والعربية تتشحن بالشاحن المنزلي البطئ وتكون الفيشة قريبة والشحن يتم اثناء الليل علشان درجة الحرارة تكون مناسبة
ثاني ميزة للعربية الكهربية بالنسبة للصيانة
· في العربية الكهرباء مفيش حاجات كتير بتبوظ ..
مفيش زيت محرك، ولا كاتينة، مافيش بوجيهات ولا فلتر بنزين، و حتى الفرامل التيل مش هيتاكل بسرعة (بسبب نظام regenerative braking اللي بيخلي الفرامل تدوم أطول
الصيانة الدورية بتكون أساسية للبطارية والكاوتش فقط.
· لكن خلي بالك:
لو حصل عطل في المحرك الكهربائي أو البطارية او دائرة الحماية او الكمبيوتر، فالتكلفة ممكن تكون عالية جدًا اكثر من العربية البنزين (خاصة لو مافيش ضمان).
ثالث ميزة الآداء والسرعة بالنسبة للعربية الكهرباء مافيش احسن من كده
· عزم فوري: علشان المحركات الكهربائية بتوصل لأقصى عزم من أول لحظة، فبتبقى سريعة في الإنطلاق يعني مثلاً Tesla Model 3 توصل لـ 100 كم/س في ٣ ثواني!
· هتلاقي العرية الكهربية هادئة جدًا: مفيش ضوضاء محرك، يعني مش هتحس ان العربية دايره ولما هتقف في الزحمة بتكون مريحة أكثر.
وفي كمان مزايا جديدة في مصر علشان تشجيع استخدام العربيات الكهرباء
· ان بعض الموديلات ليها ضمان بطارية طويل بيوصل ل (8 سنين أو 200,000 كم).
· وفي محطات شحن سريع مجانية في أماكن معينة زى (بعض المولات والشركات).
· وهتلاقي عروض تقسيط مغرية من بعض التوكيلات وخاصة في العربيات الصيني زي BYD و MG
❌ العيوب اللي ماحدش بيحذر منها:
اول حاجة مشكلة الشحن في مصر (وده بيعتبر أكبر تحدي)
· محطات الشحن السريع قليلة للأسف:
وخصوصا خارج العاصمة (القاهرة/الإسكندرية)، محطات الشحن نادرة، فمش هتقدر تسافر لمدن بعيدة بسهولة.
بالنسبة لشاحن البيت العادي ال (220V)، هتستنى من 8 الى 12 ساعة علشان تشحن العربية بالكامل!
تكلفة تركيب شاحن منزلي سريع:
محطة الشحن السريع (Fast charger) في البيت ممكن تكلفك من 20,000-50,000 جنيه.
البطارية بتفقد كفاءتها مع الوقت:
بعد تقريبا من 5-8 سنين، البطارية ممكن تخسر 10-20% من كفاءتها (يعني المسافة اللي تقدر تمشيها بعد كل شحنة بتقل زى الموبايل اللي في ايد حضرتك).
لو البطارية اتلفت تمامًا وحبيت تغيرها، فأحب اقولك ان سعرها ممكن يوصل من 30 الى 50% من سعر العربية الجديدة!
الحر الشديد بيأثر على البطارية:
في الصيف، كفاءة الشحن والمسافة المقطوعة ممكن تقل بنسبة من 10-15%.
ولو العربية واقفة في الشمس فترات طويلة، ده بيقلل من عمر البطارية.
قطع الغيار نادرة وغالية:
ولو حصل لا قدر الله حادثة، ممكن تستنى أسابيع أو شهور علشان قطع الغيار توصل للتوكيل (خاصة في الموديلات الحديثة).
والورش المتخصصة في صيانة العربيات الكهربائية قليلة جدا في مصر.
المشكلة الأكبر بقا وهى مشكلة إعادة البيع (Resale Value)
· السوق المصري لسه مش متقبل العربيات الكهرباء:
ولو حاولت تعرض عربية كهرباء هتلاحظ قلة الطلب عليها في سوق المستعمل وده بيخلي قيمتها تنزل بسرعة بمجرد ما تشتريها.
والمشتري هيحطلك سعر قليل جدا لأنه هيخاف من مشاكل البطارية المستعملة وهيحسب فاضل عليها قد ايه وتنتهي .
وفي مشكلة مهمة برضوا وهي السعر المبالغ فيه للعربيات الكهرباء
فمثلا حاليا :
سيارة إم جي 4 الكهربائية:
بتبدأ أسعارها من 1,350,000 مليون جنيه.
سيارة بي واي دي سونج إل:
تبدأ أسعارها من حوالي 2 مليون جنيه مصري، ويمكن أن تصل إلى 2,100,000 مليون جنيه مصري.
سيارات زيكر الكهربائية:
تتوفر بأسعار تبدأ من حوالي 2,700,000 مليون جنيه مصري، ويمكن أن تصل إلى 3,300,000 مليون جنيه مصري.
فولكس فاجن ID.4 Crozz الجديدة: من حوالي 1,950,000 جنيه مصري ويصل إلى 2,350,000 جنيه
سيارات مرسيدس الكهربائية:
تتوفر بأسعار تبدأ من حوالي 2,400,000 مليون جنيه مصري وتصل إلى 7,100,000 مليون جنيه مصري.
سيارات هيونداي أيونك 5:
تبدأ أسعارها من حوالي 3,350,000 مليون جنيه مصري.
سيارات إكس بينج جي 9:
تتوفر بأسعار تبدأ من حوالي 3,250,000 مليون جنيه مصري وتصل إلى 3,350,000 مليون جنيه مصري.
سيارات نيسان ليف:
تتوفر بأسعار تبدأ من حوالي 1,200,000 مليون جنيه مصري.
سيارات تسلا موديل 3:
تتراوح أسعارها بين 2,500,000 مليون و 3 مليون جنيه مصري.
وارخص عربيات كهرباء في مصر بس بإمكانيات قليلة جدا هى:
شانجان E-star: تبدأ من حوالي 398 ألف جنيه مصري.
BYD Seagull: تبدأ من حوالي 605 ألف جنيه مصري.
📌 الخلاصة:
العربية الكهرباء مناسبة ليك لو:
عندك مكان تشحن فيه في البيت/الشغل وده معناه انك ساكن في فيللا او دور ارضي او عندك جراج خاص.
لو معظم مشاويرك في المدينة (يعني مش سفر طويل علشان تضمن وجود محطات شحن).
لو تقدر تتحمل تكلفة البطارية لو باظت بعد من 5 الى 8 سنين او حتى لو اخدت خبطة في الشاسية من تحت من بلاعة مثلا او مطب لأن البطارية موجودة تحت رجليك.
يعني من الآخر متجبهاش لو:
فرهود وبتحب تسافر برة المدن زى شرم والغردقة ومرسى مطروح.
مفيش توكيل قريب منك يلحقك بخدمة ما بعد البيع.
عندك ميزانية محدودة ويادوب معاك ثمن العربية وماتقدرش تتحمل دفع مصاريف قطع الغيار الغالية او ثمن نص العربية اللي انت اشتريتها لأن ممكن في ثانية تيجي تدور عربيتك تلاقي البطارية انتهت والبطارية تعتبر نص ثمن العربية.
· "بص يا صديقي، العربيات الكهرباء فيها مميزات وعيوب... يعني لو ظروفك مناسبة (وعندك محطة شحن سريع قريبة منك،او ساكن في دور ارضي او في فيللا علشان الشحن المنزلي, وطبعا لازم يكون معاك فلوس جاهزة للصيانة وقطع الغيار الغالية)، فده وقتها! انزل حالا اشتري عربية كهرباء
اما لو مافيش الكلام ده، يبقا نستنى شوية لحد ما السوق المصري يتهيأ أكتر من ناحية الأسعار ومحطات الشحن."
قوللي بقا في الكومنتات
لو الحكومة عملت محطات شحن في كل مكان والأسعار نزلت، هاتجيب عربية كهرباء ولا برضوا هتفضل خايف؟"
هعمل تصويت في القناة للموضوع ده والإجابة هتكون (أهلاً بالكهرباء – او -- لسه خايف).
كان معاكم مهندس/ ايهاب بكر
· اشوفكم على خير
· سلام