عربية بسعر موبايل الجزء (1) ارخص 10 سيارات مستعملة فى مصر بسعر من 5000 الى 10000 جنية
Ehab Bakr
ارخص 10 سيارات مستعملة فى مصر بسعر من 5000 الى 10000 جنية
السلام عليكم ورحمة الله وبركاتة
اصدقائى الاعزاء مرحبا بكم فى فيديو جديد عن ارخص سيارات مستعملة فى مصر
بنتكلم النهاردة عن سعر مش هتصدقوه بيبدأ من 5000 جنية وينتهى فى 10000 جنية
يعنى بجد ارخص عربيات فى مصر
ناس هتقولى دى مش عربيات وفيها مشاكل وكلام كتير
بس احب اقولكم انها بالفعل عربيات ماشية فى الشارع المصرى وبتقوم بدورها وبترحم اصحابها من بهدلة المواصلات وطبعاً بتقبل بنزين 80 ودى ميزة جميلة وكمان اى ميكانيكى ممكن يشتغل فيها
ممكن تجيبها لبنتك او لإبنك لما يدخلوا الجامعة وهتقوم بدورها على اكمل وجه بشرط انك وانت بتشتريها تكون حالتها كويسة ولو فيها ملحوظة تعملها علطول
كل عربية هقول نوعها وحدود سعرها وشوية معلومات بسيطة بس مش هتكلم عن كل المواصفات لكن فى نهاية الفيديو هقولكم افضل عربيات فى الفئة السعرية دى واللى ممكن تعتمد عليها لان مشاكلها قليلة وقطع غيارها متوفرة جديد واستيراد
لو عجبك الفيديو ممكن تدوس لايك وشير وممكن تشترك فى القناة وتفعل زر الجرس علشان يجيلك كل الجديد فى عالم السيارات
نبدأ على بركة الله
اول نوع معانا السيارة فيات 126 موديل التسعينات سعرها بيعمل من 5000 الى 7000 جنية
باب واحد والمحرك فى الخلف ودى عربية مناسبة جدا للبنات وموديلها مش بعيد قوى وحالة الموجود منها فى السوق المصرى بتكون كويسة بحكم انها عربية صغيرة اغلب اللى ركبها سيدات
العربية بتشم البنزين وتبريدها هواء مش ردياتير مياه يعنى زى الفولكس القديمة زيت وهواء هى صغيرة بزيادة بس عربية اعتمادية
سرعتها بتوصل 120 كم / س وفى ناس بتسافر بيها بس نصيحة لو هتجيبها هات الإيطالى مش المصرى لأن اهم نقطة الاسبراتير بتاعها يكون كهرباء وده متوفر فى الايطالى
وهيفرق معاك كتير لان الاسبراتير العادى بيسخن العربية ولو سخنت هتكرهها
طبعا الارقام دى غريبة شوية بس هو ده اللى كان متوفر ساعتها والمهم انها بتقوم بالواجب
بالنسبة لقطع غيارها يعنى هتلف عليها شوية بس فيها كتير من ال127 وممكن توفق بينهم
مشكلتها الاساسية واللى مخلياها رخيصة هى السخونة لان موتورها فى الخلف وتبريدها ردياتير مياه وبالتأكيد الهواء مش بيوصل فى الخلف بنفس وصولة للامام
لو عاوز العربية وفيها مشكلة السخونة فتعديلها اسهل مايكون
قدامك حل تغيير الموتور يعنى تحط فيها موتور 127 فى قدام طبعا او تخلى موتورها وده الحل الارخص والافضل وتعمل تعديل صاج يجيب الهواء من تحت العربية الى الريدياتير وتركب مروحة 6 ريشة امام الريدياتير تضخ الهواء وواحدة تانية خلف الريدياتير تشفط الهواء وتجيب الريدياتير نحاس
وللأمانة كل اللى عمل التعديلات دى كسب عربية محترمة بسعر قليل وماسمعش منها اى شكوى بعد كده
ثالث نوع السيارة فيات بلونيز موديل الثمانينات ودى سعرها من 5000 الى 7000 حسب الحالة
والعربية دى بدأ انتاجها من سنة 1978 و استمرت لحد سنة 2002 فى بولندا وتم بنائها على شاسية وموتور الفيات 125
كان ليها 3 محركات فى بولندا 1300 و 1500 و 2000 سى سى كلها معتمدة على محركات الفيات 125, لكن اللى جالنا هنا محرك 1500 فقط, و كان بيتم تصنيعه فى مصر كأول محرك بنزين يصنع فى مصر وبيولد قوة 72 حصان وبتعمل حوالى 220 كم فى الصفيحة على الطرق السريعة لو موتورها مضبوط
بتتمتع العربية دى بمتانة استثنائية فى فئتها, فمتانتها عجيبة و أدائها فى الحوادث أكثر من رائع
السيارة أيضا تتمتع بمستوى أمان مدهش رغم أنها لا تحتوى على اى من عناصر الأمان الحديثة, فقد تم ادخالها اختبار الأمان الأوروبى فى سنة 1994 بهدف تصديرها الى الخارج, و كانت المفاجأة ان العربية اللى بيرجع تصميمها الى الستينات نجحت فى الاختبار و حققت نتائج جيدة جدا, فلم تحدث أى انبعاجات خطيرة فى المقصورة و لم تصب دمى الاختبار سوى باصابات طفيفة.
وزنها 1075 كجم يعنى أقل من وزن الفيرنا مع ان شكلها يقول انها ثقيلة طيب هتقولى ليه بنقارنها بالفيرنا
والرد ببساطة لان الفيرنا اخف سيارة فى مصر واكثر سيارة بتعمل حوادث وحوادثها مميتة
يعنى البلونيز الغلبانة موديل الثمانينات اللى ثمنها ماكملش 3% من ثمن الفيرنا ظفرها برقبة الفيرنا فى كل حاجة على الاقل مش صينى زى الفيرنا
عيبها الازلى هو الحراره وده عند ارتفاع درجه الحراره فى فصل الصيف وبيتعالج بتغيير الردياتير لنحاس 4 أو 6 ماسورة ومروحتين 6 ريشة ومية خضراء + ضبط تاكيهات
وممكن تعديلها وتسقيط موتور 131 أو 132
حمالة قسيه وبتستحمل فوق الوصف وقطع غيرها رخيصه بس هتلف عليها شوية وممكن توفق مع انواع تانية
ومساحتها الداخلية كبيرة جدا ومساحتها التخزينية كمان كبيرة
عفشتها ناشفة زى كل الفيات وارتفاعها عن الارض 16 سم يعنى مافيش مشكلة مع المطبات
اهم عيب اشتكى منه اغلب المالكين فى العربية دى انها بتنكش الشعر
يعني لو رايح مناسبة و مظبط التسريحه حتوصل أشعث اغبر وده لأن سقفها واطي بدرجة غير طبيعة
رابع نوع معانا هو فى الحقيقة نوعين السيارة فيات124 و 125 موديل السبعينات والثمانينات
وانا جمعتهم مع بعض علشان زى بعض فى كل حاجة ودى سعرها بيتراوح بين 6000 الى 8000 جنية وطبعا حسب الحالة وطبعا ال125 هى الافضل يعنى ممكن تلاقى ال 124 بسعر من 5000 الى 7000
الصناعة بولندية العربية اعتمادية وحمولة جداصالونها واسع بدرجة ملحوظة
مشاكلها تنحصر فى سخونية الموتور ودى حلها سهل ومشاكل العفشة زى الكورونا ودى برضه سعرها مش غالى وممكن شرائها استيراد او علاجها
بس المشكلة الاكبر ان التعليق الامامى على نظام البيض ولما البيضه تملص على رأى اصدقائنا خبراء الفيات تبقا ايامك سودة وتلاقى العربية بركت فى الارض زى الجمل وحلفت لاهى ماشية ولا مقطورة ولا حتى مجرورة
العربية بتاكل بنزين كثير تقريبا زي ال 132 2000 و بتعمل 125 كم في الصفيحة على الطريق السريع وده لو الموتور مضبوط وكمان خشنة و ثقيلة ومتعبة فى سواقتها
بالنسبة لقطع الغيار للأسف فعلا و عن تجربة لم يعد لها قطع غيار اصلية
أغلب قطع غيارها يا أما مصري زي الرادياتير و أكواع المياه يا أما تركي او صيني وطبعا هتضطر توفق قطع من سيارات انواع تانية علشان تمشى الدنيا
النوع السادس هى العزيزة الغالية سيارة المصرى الاصيل فيات 128 موديل السبعينات ودى سعرها من 8000 الى 10000 وحسب الحالة
ممكن يوصل سعرها الى 15000 جنية فى موديل الثمانينات والحالات المحترمة
اعتبرت فيات 128 نقطة تحول في تاريخ صناعة السيارات على مستوى العالم
شاسيه العربية علب بوزن خفيف وزنها لا يتعدى ال800 كجم وكانت اول عربية توصل الى 160 كم/ساعة فى الفئة الصغيرة الرخيصة على الطريق فى مصر
عيب ال128 ان حوضها بيفتح لدرجة انى ساعات بشوفها ماشية بالعرض و بيحتاج زرجينة كتير و ظبط زوايا فلازم تكون العفشة الامامية بحالة ممتازة علشان الشاسيه ما يتبهدلش
سابع عربية الفيات 127 موديل الثمانينات ودى سعرها من 7000 الى 10000 حسب الحالة وسنة الصنع
وفى انواع تانية اغلى زى الفيورا او السوبر فيورا
عموما كلامنا عن ال127 فقط واللى سعرها مايعديش ال 10000
العربية دى هاتشباك 4 باب بتشيل اسرة صغيرة بشنطهم , موفرة جدا فى البنزين , عربية اعتمادية وحمولة اكثر من ال128 وكل مشاكل ال128 اتعالجت فى ال 127
اهم حاجة وانت بتشتريها تكون الكارتيرات سليمة ومافيهاش لحامات ولا بارومة
العربية بتجرى لحد 150 بس اخرها 120 وبتبقى مش ثابتة بعد كدة. بتستحمل السفر والزحمة والمشاوير الصعبة والطرق المكسرة المهم ايدك تبقى فيها علطول ومتأجلش تصليح حاجة فيها وللعلم اعطالها قليلة جدا وهتقوم بالواجب ومش هتحس انك راكب عربية مستعملة ولا هتزور الميكانيكى خالص
بس عاملها على انها عربية محترمه وماتبخلش عليها فى حاجة وعمرها ما هاتخذلك ابدا وده عن تجربة شخصية على مدى 5 سنوات
بتتميز العربية ان اي حد بيشتغل فيها انت شخصيا ممكن تفك الموتور وتركبه وقطع غيارها عند السوبر ماركت تحت البيت
ثامنا السيارة فيات ريتمو موديل من 79 الى 89 ودى سعرها بيتراوح من 8000 الى 10000 حسب الحالة والموديل
تعد ريتمو أولي السيارات التي تم تجميعها بواسطة الريبوتات دون التدخل الادمي.
ولكن سنة 1985 كانت سنة فاصلة حيث تم تطوير السيارة وظهرت في ثوبها الجديد وتم تعديل بعض العيوب التي اشتكي منها الكثير من المستخدمين ويسميها المصريين ريتمو ريجاتا ذات الاربعة فوانيس من الامام وبها علامة ريجاتا
فى منها اللى تصنيع الماني واللى ايطالي وفى منها التقفيل المصري من شركة النصر اللى فى يوم من الايام كانت بتجمع وتقفل افضل من التجميع الاصلى
ايام لما الناس كان عندهم ضمير
العربية جر امامى ودى اغلب مشاكل الفيات القديم
شاسيه ضعيف وعلى علب بس الموتور اقوى من فيات 128
يوجد فئتين 1300 CC و 1500 CC
وفى شكلين الشكل الأول الريتمو اللى فيها الفانوس الواحد الامامي وده من موديل سنة 1979 وحتي 1984
والشكل التانى ابتدأ منذ عام 1985 وحتي 1988 وهو اللى فيه فانوسين قدام واحد كبير والتانى اصغر منه
والموديل ما بعد 1985 يعتمد علي نفس تقنية الريجاتا وتشتغل عليها كل قطع غيار الريجاتا
مميزات الريتمو
موتورها قوي وصالونها اوسع من 128 وال 127
انعم في السحب و في الاداء
عيوبها
مش سهلة في اعادة البيع بعكس 128 و127
خفيفة علي الارض وبتعوم علي السرعات العاليه
قطع غيارها الاصلية انعدمت واللى موجود توفيق مع انواع تانية
العربية التاسعة معانا الفيات 127 توب الإيطالى موديل السبعينات ودى سعرها من 8000 الى 10000 جنية
فى منها اتنين باب واربعة باب وقطع غيارها ارخص قطع غيار فى مصر عربية اعتمادية وشبابية ويبان فيها التوضيب بس ممكن تكون مشكلتها هى السخونة وحلها اسهل مايكون بتغيير الريدياتير لردياتير نحاس 3 ماسورة وشكرا وابقا قابلنى لو روحت لميكانيكى
موفرة فى استهلاك البنزين بطريقة غريبة
العربية دى افضل من ال127 وال 128 والريتمو واثبتت كفائة من يوم مانزلت مصر لحد وقتنا هذا
اهم حاجة وانت بتشترى اطمن على البارومة والحوادث والموتور وبعد كده كله سهل
عاشرا السيارة الالمانية المحترمة فولكس بيتلز ودى سعرها من 9000 الى 15000 حسب الحالة
وهى اول سيارات الصانع الالمانى عربية اعتمادية موتورها قوى ثابتة على الطريق شاسية قوى وصاج اقوى ماتعرفش تتقلب
موتور خلفى تبريد هواء يعنى مش بتسخن
سواقتها ناعمة وبتجرى ويبان فيها التوضيب فى ناس بتظبطها وتخليها تحفة بيتشاور عليها وهى ماشية
الدركسيون ناعم جدا يشبه الباور واستهلاك البنزين معقول بس مشكلتها ان الصالون الداخلى ضيق شوية
اعطالها قليلة جدا سواء ميكانيكا او عفشة والدليل على كده ان الميكانيكية اللى بيشتغلوا فيها معدودين ومافيش من العربية دى اى شكاوى
هظلمها لو قارنتها بأى نوع تانى فى فئتها السعرية وخصوصا الفيات 128 و 127 لانها افضل سيارة فى هذه الفئة السعرية
وفى نهاية الفيديو زى مااتفقنا هقول افضل سيارات فى حدود السعر من 5000 الى 10000 واللى ممكن تجيبها وتعتمد عليها واعطالها قليلة
العربيات الاعتمادية اللى تستحمل الطرق المصرية والحر وتنفع لشاب بادئ حياته عاوز يروح جامعتة او شغلة مش يقضى وقته مع ميكانيكى او بيدور على قطعة غيار
فى المركز الاول الفولكس بيتلز يليها الفيات 127 توب يليها الفيات 127 نصر او فيورا او سوبر فيورا طبعا حسب امكانياتك وبعدها تيجى ال128
وممكن نقول ان لو اللى هيسوق بنت رايحة الجامعة يعنى على قد المشاوير الصغيرة والاستعمال الحريمى تنفعها فيات 126 علشان موديل قريب واعطال قليلة
بس اهم حاجة ابعد عن العربيات ال 124 وال 125 والريتمو وال 132 والبلونيز والسيات 133 علشان اعطالها كتيرة واللى موجود منها فى السوق حالاتها تعبانة ومحتاجة حد يفهم ميكانيكا ويعرف يتصرف وكتر خير العربيات دى انها عايشة لحد النهاردة
مشاكل العربيات دى ان فى منهم اللى قطع غيارها نادرة ومنهم اللى مشاكلها كتيرة ومصاريفها اكثر وفتحت بقها عموما الانواع اللى قولتلك ابعد عنها شغالة وفى ناس بتعرف تتعامل معاها بس نصيحة بلاش
