عربية بسعر موتوسيكل ارخص سيارات فى مصر بسعر من 20 الف الى 30 الف جنية
Ehab Bakr
السلام عليكم ورحمة الله وبركاتة
استكمالا لسلسلة فيديوهات ارخص سيارات مستعملة فى مصر اللى بدأناها فى الجزء الاول بسعر من 5 الاف الى 10 الاف جنية والجزء الثانى بسعر من 10 الاف الى 20 الف جنية
فى عربيات مكملة معانا من الاجزاء 1 و 2 زى مثلا الفيات 128 بس سيبنا موديل السبعينات والثمانينات ودخلنا فى موديل التسعيناتفى الفيديو ده
هنكمل السلسلة بسعر من 20 الف الى 30 الف جنية
والعربية لادا بس موديلات 2105 و 2107
والعربية الريجاتا اتحولت الى شاهين
وبدل البيجو 305 تطورنا الى البيجو 504 وعدينا مرحلة الفيات الكبير زى ال 132 ودخلنا فى ال 131
هنخش فى انواع جديدة زى النيفا والمازدا 323 والسوزوكى سويفت
يعنى الدنيا بتطور وهتلاقى معاها العربيات بتتغير للاحسن والحالة بتبقا افضل لان اعمار العربيات هتبقا اقل
وبرضه هقول بعض المواصفات والمميزات والعيوب لكل نوع وبعد مانخلص كل عربية هجيب سعرها من موقع اولكس علشان اللى بيحب يطمن ان السعر موجود ولو ان الموضوع ده بيطول الفيديو بس امرنا لله
لو عجبك الفيديو ممكن تدوس لايك وشير علشان ناس اكثر تستفيد وممكن تشترك فى القناة وتفعل زر الجرس علشان تجيلك فيديوهاتنا الجديدة
لو عاوز تتفرج على الجزء الاول اسعار من 5 الاف الى 10 الاف جنية
والجزء الثانى اسعار من 10 الاف الى 20 الف جنية
ولو عاوز تعرف افضل طريقة للشراء من اولكس بأقل سعر وتفهم الموقع ده كويس علشان تحقق منه اكبر استفادة
نبدأ على بركة الله
اول نوع معانا الفيات 128 موديل التسعينات واوائل الالفينات ودى سعرها بيكون من 20 الى 30 الف جنية حسب الحالة والموديل
انا بحذر اللى ناوى يشترى ال 128 ان العربية دى بالذات فيها هرى كتير وفى ناس بتحاول تتوه السعر علشان يشتروها ب 10 الاف ويبيعها ب 30 الف يعنى هتلاقى ناس عارضين موديل سبعينات بالثلاثين ومعدل العربية ومغير شكلها لموديل التسعينات وراششها ومصدق نفسه وبيطلب السعر ويتشرط كمان
وللاسف الناس دى اللى مخليهم يعملوا كده هما الغلابة اللى مش فاهمين وبيشتروا
لكن علشان الموضوع يكون واضح لازم نعرف ان موديل السبعينات
سعره من 7 الاف الى 10 الاف جنية والعربيات مغرقة السوق بالسعر ده
وموديل الثمانينات من 10 الى 20 الف جنية ومايزدش عن الرقم ده والعشرين الف دى كمان لازم تكون فابريكة جوه ومافيهاش غلطة
وموديل التسعينات لحد 2005 من 20 الى 30 الف جنية وده آخر سعر لل 128 مافيش حاجة اسمها 128 فوق الثلاثين ده اسمه استهبال
العربية اصلا عربية تعبانة على شاسية علب والبارومة لاعبة فيها البخت
ومهما اترشت من بره ولا اتغير الفرش ولا ركبولها جنوط هتفضل 128
ماتدفعش اكثر من الرقم ده ولو لاقيت صاحب العربية داهنها بالسمن البلدى
انا شرحت تفاصيل العربية دى فى الجزء الاول والثانى وكل ما الموديل يبقا احدث كل ما المشاكل تزيد لان الموديلات القديمة كانت ايطالى اما المصرى ضيف على مشاكلها تجميع وتقفيل سئ وبارومة اكثر علشان مرشوشة عندنا بدون معالجة ضد الصدأ
يعنى موديلات السبعينات البارومة فيها اقل من التسعينات بس السبعينات ارخص علشان التقادم مش اكثر
العربية دى انا اتكلمت عنها كفاية ومواصفاتها موجودة فى الاجزاء السابقة
النوع الثانى معانا هو لادا 2105 و 2107 ودى سعرها يتراوح بين 20 الى 30 الف جنية حسب الحالة والموديل
اتكلمت عن مواصفاتها فى الجزء الثانى
اما عن الفرق فى الشكل بين ال 2105 وال 2107 فهو مش كبير
قطع الغيار سهله ومافيش فرق
يعنى فى قطع غيار تركب على الاثنين
فى الروسى هتلاقى العربية فيها كماليات عن المصرى زى الانجكشن او ازرع تغيير مسار الهواء فى التابلوه
الاكصدام استنلس فى الروسى بس المصرى الاكصدام بتاعها انتومونيا
علبة العدادات 2105 مافيهاش ار بي ام ال2107 فيها ار بي ام فرق بسيط اوي في الشنطة وعصاية الفتيس والدريكسيون والفانوس الخلفي ال2107 فيها ساعة في منتصف الطابلوه الكراسي والكنبة الخلفية بتاعة ال2107 طيارة
الفرق في المحركات ال2105 الثمانينات كانت 1500 سى سى التسعينات نزلت تركي 1200 سى سى كاتينة كاوتش اما ال 2107 1500 سى سى و 1600 سى سى كاتينة جنزير
فرق المصري عن الروسي الأكصدامات والباكتات علي الأبواب وطاسات العجل والجنط مختلف تغذية الوقود في الروسي انجيكشن مع المحرك ال1500 فى احزمة امان خلفية في الروسي سعر اعادة البيع طبعا لصالح الروسي ايريال الراديو في الروسي بيبقي في الرفرف الخلفي اما في المصري فهو راكب علي القايم بالنسبة للصيانة – اي ميكانيكي يعرف يشتغل فيها وان كان في بعض الأشياء احيانا بتحتاج ميكانيكي لادا زي ظبط الأسبراتير والتقسيمة وضبط التاكيهات
عربية قوية جدا ومريحة جدا وموفرة جدا جدا
فى استهلاك الوقود بتعمل 200 كم فى الصفيحة وشغالة بنزين 80 بنزين 90 كله ماشى
عربية حمولة واعتمادية واعطالها قليلة
ثالث نوع هى السيارة نيفا موديل الثمانينات حتى 1993 ودى سعرها من 22 الى 30 الف جنية حسب الحالة
مميزاتها
عربية مرتفعة عن الارض جر رباعى هيكلها قوى جدا و عفشتها محترمة قطع غيارها رخيصة ومتوفرة
بتتحمل السير الطويل على طرق سيئة
عربية مشاكلها بسيطة وحلها سهل
سعرها رخيص جدا بالنسبة لامكانيتها بالنسبة للموديلات القديمة المتوفرة فى مصر
اما بالنسبة للحديث تجميع مصرى محرك انجيكشن 1700 cc و باور وتكيف لكن تكيف ضعيف نوعا ما وزجاج كهرباء و زوايد فايبر وتقفيل السيارة ليس بالمستوى المطلوب غير القديم الروسى خالص
عيوبها العربية باب واحد والدخول والخروج من والى الكنبة الخلفية صعب جدا
مساحتها الخلفية ضيقة سواء الشنطة او الكنبة
سواقتها خشنة وده بالنسبة للموديلات القديمة
يعنى لو اللادا بتربى عضلات النيفا هتحولك ارنولد شوال بنجر
لكن لو دايما ايدك فى صيانة العفشة والتشحيم مش هتحس اوى بالموضوع ده بس ماينفعش تقارنها طبعا بعربية ناعمة
موضوع ارتفاع درجة الحرارة مشكلة سهلة حلها هتركب راديتر 4 ماسورة نحاس وشكرا
فتيس الغرز بيتقل العربية جدا يعنى ماينفعش تمشى كتير عليه بسرعات عالية
فى ناس بتقول انها مش ثابتة فى الملفات مع انى اختلف مع الكلام دا وبرضو مش مشكلة والحل بتركيب كاوتش عريض
من الاخر طبيعة الاستخدام هى اللى بتحدد العربية اللى نشتريها
والنيفا عربية ممتازة على الطرق المكسرة والطينية والشغل فى الجبل
لكن اعادة بيعها تقيلة نسبيا لان معظم اللى بيشتريها اغلبية تحركاتهم على طرق سيئة زى مزارع او جبال او صحراء وغرز
بمعنى ان مفيش حد فى استخدامه اليومى على طريق مسفلت هيشترى نيفا الا لو غاوى
النوع الرابع السيارة فيات 131 او ميرافيورا الاسطورة الملقبة مرسيدس الفيات موديلات من 1974 الى 1984 ودى سعرها بيكون من 20 الى 30 الف حسب الحالة
العربية دى بدأ انتاجها سنه 1974 واستلمت الرايه من الفيات 124 في فئه السيارات المتوسطه و حملت نفس الموتور ف كانت نازلة بنوعين من المواتير 1300 سي سي بقوه 65 حصان و 1600 سي سي بقوه 75 حصان
سنة 1977 انتجوا السوبر ميرافيورا واتوفرت بنوعين من المواتير 1300 و 1600 بقوه 75 و 97 حصان و لاول مره تم اضافه موتور ال 2000 سي سي بقوه 112 حصان اللى راكب فى ال 132 2000 و كل المواتير دى (2 كامه) و هسيبكم تتخيلو موتور 112 حصان علي عربية وزنها 1100 كجم ممكن يخلي ادائها عامل ازاي؟؟؟!!!!!!! طلعت العربية العظيمة على المعاش سنة 1985 ودخلت مكانها ال فيات ريجاتا بعد انتاج تعدي ال المليون و نصف نسخة و انتصارات و حب جميع من امتلكها انتجت في عده دول منها المانيا و اسبانيا و مصر و تركيا (مازالت تنتج تحت اسم شاهين حتي الان). بطله الراليات لعام (1977.1978.1980)
العربية شكلها كويس وحجمها معقول مع اتساع مساحتها الداخلية مقارنة بالـ 128 أو بالشاهين يعنى تمشى شبابية وتمشى عائلية أداءها مقبول جدا ومناسبة للطرق والشوارع المصرية وعلى الطريق ثابتة وبتجرى كويس استهلاك البنزين معقول جدا وخاصة لو الكهربا والكاربيراتير مظبوطين وفوق كده قطع غيارها متوفرة ورخيصة
لا ينقصها إلا تكييف و سهل يركب لها واحد
البارومة مش بتسرح فيها زى باقى العربيات لان الصاج بتاعها معالج
مشكلتها موضوع السخونية فى الصيف وده علاجه سهل بتركيب ردياتير نحاس 4 ماسورة ومروحة 6 ريشة
النوع الخامس السيارة بيجو 504 معشوقة الملايين موديل السبعينات ودى سعرها من 20 الى 30 الف جنية حسب الحالة
واسعه جدااا بحر من جوااا سحبها حلو لحد 160 كم/س اى حد يشتغل فيها و قطع غيارها متوفرة قطعة الغيار الاصلي الفرنساوي الاوريجينال بتعيش فوق الـ 10 سنين شاسيها قوى جدا لانه مصنع بطريقه غير تقليديه بيتم تعريضه لضغط شديد و ادخاله افران لحد ما يكتسب صلابه عاليه
علشان كدا مستحمله شوارعنا المكسره وكاتمه ف نفسها استهلاك البنزين فيها معقول
يعنى بتعمل فى حدود من 110 الي 140 كيلو متر في الصفيحه داخل المدينه
اما بالنسبه للطريق السريع فممكن تعمل اكثر من 170 كم في الصفيحه
العيوب اللي صمم العربيه دي عالم مشهور في علم الطيران وميكانيكا الموائع .. وصمم مؤخره العربيه مسحوبه زي الطائرات علشان وزنها يخف كل ما سرعتها تزيد لحد ماتوصل ألى الوزن صفر عند السرعه 215 كم/ساعه
ده على أساس أنها هاتوصل للسرعه دي أساسا
وكل ده علشان تخفيف الوزن بيقلل أستهلاك الوقود بدرجه كبيره فالعربية مشكلتها انها بتعوم جامد ومافيهاش اتزان مع السرعات العاليه طبعا الا لو ركبت كاوتش وجنوط ثانى عيب صاجها غاااالي جدا فحاول لو اشتريتها ماتعملش حادثة
النوع السادس معانا هى السيارة مازدا 323 موديل الثمانينات ودى سعرها من 20 الف الى 30 الف جنية حسب الحالة
سعة المحرك : 1300 سى سى قوة المحرك : 68 حصان العزم : 95 نيوتن متر نظام الوقود: كربراتير
وزن العربية 850 كجم
ناقل الحركة : مانيوال
صالونها واسع وكراسيها مريحة الشنطه واسعة جدا العفشة ناعمة وخفيفة السحب معقول صوت المحرك خفيف استهلاك البنزين معقول جدا من 180 الي 200 كم في الصفيحة وبتاخد بنزين 80 كحالة العربيات القديمة قطع الغيار متوفرة الي حد ما ولكن في اماكن معينة وسعرها معقول مافيش منها كوري كما يشاع بين الناس
مشكلتها انها قريبة من الارض وبتحك فى جميع المطبات الحكومية والخاصة
النوع السابع السيارة شاهين موديل التسعينات ودى سعرها من 25 الى 30 الف جنية حسب الحالة والموديل
العربيه تركي تحديثا لل 131 الايطالي تابعه لشركه فيات تم تصنيعها في تركيا في شركه tofas تحت اسم sahin ‘ dogan ‘ kartal ومنها ثلاث طرازات شاهين و دوجان و كارتال ( السبعه راكب ) الشاهين بخيلة فى الكماليات زى التكيف والباور والزجاج الكهرباء.. يعنى مش كل موديلات الشاهين تتميز بالمواصفات دى ولكن الدوجان بتتميز بكل المواصفات والكماليات وبتتميز كمان بالمحرك ال 1600 سى سى مميزات الشاهين
عربية عملية جدا وقوية وتستحمل طرق مصر عالية عن الارض ودا بيخليها تعدي اي مطب بسهولة العربيه ناشفه ك صاج وبتستحمل يعني ممكن تخش، بيها في حيطه وهتسد معاك العفشه سهله من ناحيه فك وتركيب وصيانه وبتتحمل النقر والحفر والمطبات
وتقدر تفك وتركب انت بنفسك من غير صنايعي قطع غيارها في الصيدليات مفيش اكتر ولا ارخص منها بتقبل التعديلات بجميع انواعها وشكل العربيه وابعادها واضحه وبسيطه عيوبها ان صوتها عالي بسبب سوء العزل بتاعها وصوت المكنه بيعلي جدا بعد 120 كم الكرونه بترشح زيت بسبب الاهمال وقله الصيانه وده بيسبب تاكل التروس وحدوث صوت عالى وده عيب مشهور فيها الفتيس تقيل نوعا ما الدبرياج تقييل جدا وهيطلعلك عضلات في سمانه رجلك مشط الاسبراتير الالكتروني دائم العطل ولكن السبراتير العاده ليس به عيوب الانجكشن فيها سئ بالبلدي كده مبيستحملش بنزين 80 وبيبوظ
عشان كده معظم ملاك العربية الانجكشن بيقلبوها كاربرتير زي الموديلات الاقدم
العربية بتسخن بسرعة بس حل الحكاية دي انك تركب مروحة اكبر للتبريد
العربية مش ثابتة على السرعات فوق المتوسطة 80 كم فما فوق وبتميل وتعوم من ابسط مناورة
بطانة الابواب وحشة جدا العدادات مش واضحة بس حل الحكاية دي انك تركب لمبة اقوى من اللمبة بتاعتها
واخيرا ثامن عربية معانا السيارة سوزوكى سويفت موديل التسعينات بسعر من 25 الى 30 الف جنية حسب الحالة
السويفت عربية يابانية ممتازة واعتمادية واقتصادية جدا وقطع غيارها متوفرة وبالسعر اللى انت عايزة سواء يابانى او تايوانى او صينى وبالنسبة لسعر البيع هى مش تقيلة اوى فى البيع بس فى نفس الوقت مش بياعة زى ال 128 مثلا يعنى يوم ماتبيع لو السوق نايم ممكن تخسر الف او الفين بالكتير عن تمنها السوزوكى ماركة محترمة جدا بس للاسف مش واخدة حقها فى السوق المصرى حالها حال عربيات كتير محترمة لية مش عارف بس هو السوق المصرى كدة غريب
من مميزات العربية ان موتورها 1500cc متور ناعم جدا زى كل اليابانى اقتصادية فى البنزين قطع غيار متوفرة و رخيصة الشكل الخارجى مقبول المتور لو 1500 هو متور قوى وسحب ممتاز الباور متميز اهم عيب فيها ضعف الثبات على الطرق السريعة و خصوصا بعد 90 كم / ساعة الصالون ضيق بشكل ملحوظ التكييف ضعيف نسبيا العربية قريبة من الارض وبتحك فى المطبات وخصوصا مع التحميل
وبكده نكون خلصنا العربيات المحترمة اللى فى حدود السعر فى انواع ماتكلمتش عنها زى المرسيدس 200 الخنزيرة والجولف 1 وغيرهم كتير لان ببساطة قطع غيارهم بقت نادرة وفى منها مش موجود وحالة المعروض منهم للبيع سيئة وده طبعا بسبب ندرة قطع الغيار فالناس بتضطر تولف مع انواع تانية او تصنع وتخرط وتصب فوانيس وتعدل صاج وده طبعا شئ متعب وفى الآخر هتبقا عربية كوكتيل او مسخ باربع عجلات
فى نهاية الفيديو اشكركم على حسن المتابعة واتمنى يكون الفيديو مفيد
