عربية بسعر توكتوك ارخص وافضل سيارات مستعملة فى مصر بسعر من 30 الف الى 40 الف جنية
Ehab Bakr
السلام عليكم ورحمة الله وبركاتة
مرحبا بكم فى تكملة اجزاء ارخص سيارات محترمة مستعملة فى مصر
سلسلة الحلقات دى بدأت بالجزء الاول واللى كان بيتكلم عن سعر من 5 الى 10 الاف جنية
وبعده عملتله ملحق علشان الناس اللى بتشكك فى السعر وبيقولوا مافيش الارقام دى ووضحتلهم بالاثباتات فيديو اكثر من ساعة كاملة لكل العربيات بالسعر اللى كان فى الفيديو من موقع اولكس ولو اعرف اخد بايديهم علشان اوريهم الاسعار دى فى سوق السيارات كنت عملت
الجزء الثانى سعر من 10 الى 20 الف جنية
والجزء الثالث كان سعر من 20 الى 30 الف جنية
فى الجزء الثانى والثالث حطيت الاثباتات داخل الفيديوهات يعنى بعد مابخلص شرح كل عربية بجيب سعر 3 عربيات اصحابهم عارضينهم بالرقم ده على اولكس وطبعا الموضوع ده بيطول الفيديو والناس بتمل علشان كدة فى الفيديو ده هنستعرض كل العربيات مواصفات وسعر ومميزات وعيوب والاثباتات هخليها فى الآخر للى عاوز يتأكد علشان مانطولش على اصدقائنا اللى مش محتاجين اثبات سعر
وفيديو النهاردة هنكمل فيه باقى الاجزاء وهنتكلم عن عربيات اعتمادية ومحترمة بسعر من 30 الى 40 الف جنية هنسيب انواع كتيرة مش هنتكلم عليها لانها بقت نادرة او قطع غيارها انعدمت او حالة المعروض منها للبيع سيئة وطبعا هنبعد عن الامريكانى كله ال 6 وال 8 سلندر
يعنى من الاخر هنتكلم على عربيات مشاكلها قليلة وحمولة ويعتمد عليها
لو استفدت من الفيديو اشترك فى القناة وفعل زر الجرس علشان يجيلك الجديد و دوس لايك للفيديو لو عجبك وشير علشان ناس اكثر تستفيد
نبدأ على بركة الله
اول نوع معانا هى السيارة بى ام دبليو بجميع فئاتها 316 و 318 و 518 و 320 و 520 و 528 موديلات من سنة 77 الى سنة 85
العربيات بي ام دبليو كل نوع فيها عاوز فيديو لوحده لانها عربيات محترمة جدا حتى وهى فى السن الكبير ده
فى 2010 كان عندى بي ام دبليو 520 موديل 79 وعاوز اقولكم انى كنت بسافر بيها كل يوم ذهاب وعودة من القاهرة الى قرية فى طنطا
وكل صيف كنت بروح بيها مرسى مطروح وانا محمل الاسرة بالكامل بشنطهم وماشاء الله العربية عمرها ماقلت بأصلها وكانت شغالة بدون اى شكوى 3 سنين
اللى قصدى اقوله انك لو اشتريت كويس يعنى عربية حالتها كويسة وتعبت شوية فى الشراء هتستريح بعد كده
تم إطلاق الجيل الأول من سيارة بي ام دبليو الفئة الثالث في سنة 1975، لتلحقها بعد ذلك خمسة أجيال أخرى من هذا الطراز الذي يعتبر من أنجح ما قدمت بي ام دبليو في تاريخها، فهو يمثل تقريباً 30% من مبيعات بي ام دبليو في تاريخها، إلى جانب حصوله على جوائز عالمية عديدة مشهورة فى تاريخ صناعة السيارات.
بالنسبة لمواصفات ال316 مثلا ومنها هتحكموا على الفئات الاعلى
سعة المحرك :1573 سى سى – 4 اسطوانات 2 صباب المحرك راكب بالطول قدرة المحرك: 86 حصان العزم: 123 نيوتن/ 3000 فى الدقيقة نظام الوقود: كربراتير صندوق التروس: 4 سرعات يدوى السرعة القصوى: 175 كم/س
1975 كان أول ظهور لموديلات الفئة الثالثة تحت إسم رمزي E21 كَانت تمتلك محركَ أربعة اسطوانات زى 316, 318, 320 BMW موديل 1977 ظهور المحرك ذو الستّة اسطوانات في كل من 320 و323
سنة 1979 تم عمل تعديل طفيف على الشكل الخارجى فقط في نهايةِ عام 1982 ظهور E30 و كَانتَ متوفرةَ بأربعة اسطوانات كما في 316 / 318 i أَوبستّة اسطوانات 320 i / 323 i.
مميزات ال بى ام دبليو عموما
عربية اعتمادية وسريعة وسحبها زى الجديد واستهلاكها للوقود بالمحرك ال 1600 سى سى معقول جدا بتعمل 12 لتر لكل 100 كم على الطريق السريع لو الموتور مضبوط
الشكل الخارجى حديث وانسيابى وشبابى جدا … عربية المانى تصميم وخامات وتجميع وهتحس بالكلام ده طول الوقت
عيوبها تتلخص فى التقادم وقطع الغيار الغالية واللى ممكن بعضها تلف علية شوية ولكن القطع الاستيراد هتركبها وتنساها
OLYMPUS DIGITAL CAMERA
النوع الثانى معانا السيارة الفرنسية بيجو 504 موديل 79 وبيجو 505 موديل 80 وبيجو ستيشن موديلات السبعينات ودى انا شايف انها اختيار مناسب للأسر الكبيرة وممكن السعر ده يخبط فى موديل 405 تسعينات بس مش كتير
عموما البيجو 504 عربية محترمة وخصوصا موديل 79 وبالنسبة لل 505 الفرنساوى عربية حكاية
هتسألنى اشمعنى البيجو 504 موديل 79 مختلفة فى السعر عن الموديلات السابقة والتالية هقولك لانها كانت ختام لتحديث سنين فى العربيه بيجو 504 بمعنى ان سنة 79 كان الموديل ال gl ده موجود بكاربرتير كهربا و كان ليه فتحتين كل فتحه قطرها تقريبا 5 سم و ده علشان يدخل بنزين زياده و العين التانيه دى بتفتح و تنزل بنزبين بعد ال 100 كم عشان كده مشهور عنها الصوت بيوطى بعد 100 كم و برضو عندها قدره توصل ل 180 كم بسهوله جدا لو الطريق يسمح
وفى مقولة اخرى ان مصانع السيارات فى اوروبا عملت سنة 79 مسابقة لاحسن سيارة من ناحية الجودة والمتانة والاستحمال والخامات فتنافست المصانع فى هذه السنة لانتاج احسن ما عندهم للفوز بالمسابقة ..علشان كده هتلاقى موديل 79 فى معظم السيارات من احسن وامتن سنوات الصنع سواء فى بيجو اومرسيدس او بى ام الى اخره
بيجو ٥٠٤ تعتبر وحش الطريق الزراعي المكسر المدغدغ لأنها هي العربية اللى حتي وقتنا هذا فيها سوست مش كبالن ، ممكن تحمل فوق الشبكة بتاعتها أي حمولة مش هتقولك لأ ، بتمتاز بقوتها لأنها مصنوعة علي شكل بيجو قديم اللى كانو بيستخدموا فيه النيكل في صناعة الأكصدامات و خامات تقيلة في صناعة الشاسية و الجسم بتاعها
بعكس التصنيع الحالي لكل السيارات الحديثة
تبلغ السرعة القصوي للسيارة 189 كلم / ساعة و نسبة استهلاكها للوقود تقدر ب 11 لتر /100 كلم على الطرق السريعة والكلام ده لو الموتور مضبوط
بالمواصفات البسيطة دى حققت السيارة بيجو السمعة الطيبة على مدى نص قرن
فيها شوية عيوب زي ان حاليا تقريبا مفيش اكسسوارات بيجو 504 جديدة او ممكن تتعب شوية عشان تجيب قطع غيار 504 ،بس هتلاقى منها قطع غيار استيراد والمؤكد حاليا على لسان اغلبية الميكانيكية ان كربراتير البيجو 504 خلاص مفيش جديد منه وخصوصا ان العربية قربت تختفى من الاسواق بعد تقرير انتاج اخر سيارة من هذا النوع بنيجيريا ودى البلد اللى كانت بتنتج قطع الغيار طول السنين اللى فاتت وده اللى ساهم في اعلاء اسم بيجو 504 منذ بدايتها حتى سنة 2005 .
مشكلة كمان انها كانت بتستخدم كا تاكسي يعني هتلاقيها متهانه شوية نظرا لانها مستهلكة ، عشان كده انت لازم تركز عشان ممكن تكون مش كويسه او صاحبها مظبطها ومداري اللي فيها المهم انك لما تشترى 504 لازم تبص على البارومة فى القوايم وحوض الموتور والشنطة وكمان لازم يكون رقم الشاسية هو رقم الموتور وتكشف بالجهاز فى محطة بنزين على الصاج والشاسية واللحامات علشان العربيات دى كانت مطلوبة جدا واتلعب فيها كتير وفى كتير منها دخلت من ليبيا واتقطع رقم الشاسية من عربيات عاملة حادثة وركب على العربيات الليبى ودى قصة مشهورة كانت بتتعمل زمان وعاوزالها فيديو مخصوص
النوع الثالث معانا السيارة جيلى موديل الالفينات ودى منها فئات كتير زى السى كيه وال ام كيه ومابل وبنسميها فى مصر فروتا ومنها السيدان والهاتشباك وكلهم صينى من قدام شبه المرسيدس العيون ومن ورا شبه التويوتا كورولا 2006 تقريباً يعنى كوكتيل اصلى من المصنع
وهى تعتبر من اول السيارات الصينى اللى نزلت مصر هى والشيرى وكانوا عاوزين يعملوا سمعه طيبه علشان يغزوا الاسواق المصرية بباقى الانواع اللى جات بعد كده
تتميز السيارة بنظام تعليق متطور ماكفرسون امامى وعامود خلفى بيساعد على ثبات السيارة واتزانها فى الطرق الغير ممهدة
العربية مرتفعة عن الارض ومش بتحك فى المطبات ودى حاجة كويسة ,موتورها 1300 سى سى بقدرة 86 حصان عربية عفية جدا رغم انها 1300 سى سى والماتور بتاعها كويس جدا والتكييف شغال عليه زى الفل
عجلة قيادة شغالة هاف باور احزمة امان امامية وخلفية مراية الرؤية الخلفية الداخلية ممتصة للضوء ضوء ستوب خلفى مرتفع اقفال امان خلفية بالابواب لحماية الاطفال الماتور هادى جدا ومش هتسمع له صوت نهائى سوبر سيلنت بيستخدم نظام الحقن الالكترونى من بوش الالمانى مما ينعكس على استهلاك الوقود الذى يصل الى 6.5 لتر لكل 100 كم لتعد الاقتصادية فى فئتها زجاج كهرباء امامى وخلفى اقفال امان مركزية مرايات كهربائية مذيب صقيع للزجاج الخلفى ريموت كنترول فوانيش شبورة
المشكله الحقيقيه فيها هى الكبالن يعني لو كلت مطب بسرعه جامده اعرف انك هاتغيرها فى خلال شهر الفوانيس والبيبان والصاج والاكصدام غاليين بالنسبه لغيرهم
فيها مشكله كمان فى ازرار الزجاج وازرار التكيف واكر الابواب انها بتبوظ بسرعه
النوع الرابع معانا هى السيارة دايهاتسو موديلات التسعينات ومنها فئات شاريد وميرا وابلوز و كانشيل وطبعا افضلهم الشاريد ولا انصح بشراء باقى الفئات كلامنا على الشاريد فقط
دايهاتسو شاريد سيارة هاتشباك صغيرة فى مصر بمحرك 1000 او1300 سي سي وطبعا لو لاقيت اللى موتورها 1300 يبقا احسن
تعد دايهاتسو شاريد من السيارات الصغيرة المميزة التي حققت انتشار كبير وهي سيارة سوبر ميني صنعت في الفترة من 1977 الي 2000 والغريب انها واسعة من جوه
المحرك سعة 1000 سي سي بقوة 47 حصان وسرعة قصوى 140 كم/س، والثاني محرك سعة 1300 سي سي بقوة 52 حصان وسرعة قصوى 160 كم/س، وكلاهما يرتبط بنوعين من نواقل الحركة الأول يدوي من 5 سرعات، والثاني أوتوماتيك.
OLYMPUS DIGITAL CAMERA
ويعيب العربية انخفاضها وقربها من الارض كما أن التكييف في حال تواجده يضعف أدائها وخصوصا فى النسخة اللى بمحرك 1000 سى سى علشان كده بنصح بال 1300 سى سى
وفى ميزة وعيب فى نفس الوقت وهى ان عفشتها ناعمة وعلشان العربية قريبة من الارض ف هتحك فى كل المطبات
صالونها جيد ويؤكد ملاكها أنهم بيسافروا بيها من غير مشاكل كما أنها اقتصادية في استهلاك البنزين وقطع غيارها متوفرة ورخيصة و اعطالها بسيطة ومش بتسخن ومحركها صوته منخفض وقيادتها مريحة يعنى هتحس انك راكب زيرو يابانى
خامس نوع هو الدايو موديلات التسعينات ومنها فئات كتير زى ريسر وسبيرو وماتيز وسيالو وزاز وتيكو
طبعا اللى مايعرفش الانواع دى هيفتكرنى بقول تعويذة
العربيات دى محترمة وفى منها فئات قطع غيارها تعتبر نادرة وانواع تانية موجودة بس هتلف عليها شوية
يعنى مثلا دايو سيالو وزاز وتيكو اعتبرهم كوكتيل عربيات علشان مش هتلاقى قطع الغيار وبيضطروا يوفقوا مع انواع تانية
اما ريسر وسبيرو لسه موجود ليهم قطع غيار بس تجار قليلين اللى شغالين فيها واللى معروض منهم للبيع حالتة سيئة
هنتكلم عن الدايو ماتيز لان باقيتهم مشاكلهم كتير ولا انصح بشرائهم
عربية كوريه من أنتاج شركه دايو تصميم ايطالى محرك 800 سى سى ثلاث اسطوانات بقوه 51 حصان حقن اليكترونى تمتاز بتوفر العديد من الكماليات تكيف – سنتر مركزى – جنوط اسبور – فتح الشنطه والتانك من الدخل – طابلوه عصري حديث
مميزاتها
أقتصاديه جداااااا في البنزين بتعمل حوالي 7 لتر لكل 100 كم داخل المدينة وعلى الطرق السريعة الرقم بيكون اقل من كده سهوله ونعومه وراحه في القياده وصالون معقول يكفي 5 اشخاص سريعه الى حد ما وسحب جيد وتصل سرعتها الى 140 كيلو في الساعه التكيف ممتاز لكن طبعا بيؤثر على السحب الماتور نظرا لأنه 3 اسطوانات 800 سي سي يوجد بار حديد فولاذى لحماية صدر السياره من الصدمات والحوادث لا قدر الله سهوله الركنة في اى مكان فهي تعتبر سياره مدينه بأمتياز لصغر حجمها
عيوبها
صاجها ضعيف جدا حوضها ضيق جدا ثلث الموتور تقريبا تحت التابلوه ثباتها ضعيف على السرعات العاليه بعد ال 100 كيلو متر الشنطه حجمها صغير نسبيا قطع الغيار موجوده ولكن غير متوفره كتير واسعارها معقوله ومعمره جدا
يعنى من الآخر عربيه شيك وجميله ومريحه ومكيفه وسعرها رخيص وتقريبا مش بتستهلك بنزين تصلح داخل المدينه وخاصا للسيدات والشباب الصغير
النوع السادس معانا الرينو ودى منها فئات كتير زى الرينو 5 و5 سوبر سانك و 9 و 11 و 18 و 19 و 25 و كليو وراينبو وداسيا واوبتيما وميجان
موديل التسعينات كلهم قطع غيارهم قلت وفى منهم قطع الغيار انقرضت واصبح البحث عنها معاناة ودول مش هنتكلم عنهم
اللى قطع غيارها موجودة بس هتلف عليها كتير وحالتها معقولة هى رينو كليو ورينو ميجان 1 اما باقى الرينو فلا انصح بشرائهم فى الوقت الحالى
وبالنسبة للميجان والكليو مشاكلهم كتير جدا فى السخونية والفتيس وقطع الغيار القليلة و مش اصلى وسعرها غالى
وكمان سعر اعادة البيع ضايع
علشان كده مش هنتكلم عنهم فى الفئة السعرية دى بس هنقابل الميجان فى فئة سعرية اعلى بمواصفات وامكانيات وعمر مختلف
سابع نوع معانا السيارة سكودا وفى الفئة السعرية دى هنلاقى الفيوفوريت والفيليشيا
بالنسبة للسكودا فيفوريت تتوفر بمحرك 1300 سي سي بقوة 62 حصان وعزم دوران 89 نيوتن متر وهو محرك بنزين كربراتير وتبلغ سرعة السيارة القصوى 168 كم/س وتتسارع حتى 100 كم في 17 ثانية وتستهلك هذه السيارة 9 لتر لكل 100 كم في المدن و7.9 لتر لكل 100 كم في الطرق السريعة و8.8 لتر لكل 100 كم كمتوسط استهلاك
وتعمل السيارة بالجر الأمامي مع ناقل حركة مانيوال من 5 سرعات. عربية من الآخر ظلطة عفشة متينة جدا وعلى فكرة الفيفوريت دى اول جيل لسكودا
فى الثبات 10/10 لحد ال 120 كم/س
صاج العربية قوى والشنطة معقوله
الفليشيا ما هي الا فيفوريت بالضبط لكن بشكل انسيابي ، بدليل ان قطع الاغيار واحدة للاثنين الا فيما بعد سنة 2000 حيث اصبحت الفليشيا انجكشن ،
لكن طبعا الفيفوريت اوسع في الصالون من الفليشيا .
اما بالنسبة للسيارة سكودا فيليشيا
من مميزاتها سيارة تحمل خدمة شاقة قوة ومتانة فى الصاج والعفشة عوامل امان بتدريع الابواب والقوائم متينة وممتازة شكل جميل ومتطور لفئتها التابلوة اكثر من رائع اقص سرعة تصل ل 170 كيلومتر ثبات على الطريق جميل جدا وفى الملفات وعلى السرعات العالية سعر سوقها ثابت قطع غيار معمرة جدا وتستاهل تمنها يصلح معها البنزين 80 لو عاوز توفر على حساب التسارع طبعا سير الكتينة جنزير مما يحمى من مشكلة انقطاعة المفاجئ عيوبها مشكلتها فى الحرارة مع التكييف ولازم العناية بدورة التبريد وضبط التاكيهات
قطع الغيار غالية شوية صوت الموتور مرتفع نسبيا علشان موضوع سير الكاتينة جنزير بس الل سهل بتغيير شداد الكاتينة
وده مش هيكون اخر نوع معانا بس للاسف طبعا الفيديو طول مننا كالعادة وعلشان نكمل باقى العربيات اللى فى حدود السعر من 30 الى 40 الف هيكون فى جزء ثانى ويمكن جزء ثالث كمان
المهم
واحنا فى السكة عدينا حاجات كتيرة بعدنا عنها زى فئات التويوتا مثلا الكريسيدا والكورولا والكورونا والتيرسيل موديلات الثمانينات
وانا مش هتكلم عن العربيات دى رغم انها ماشية فى الشوارع حتى الان بس طبعا مشاكلها كتير وقطع غيارها قلت جدا وتكاد تكون منعدمة فى الاكسسوار والعفشة والصاج يعنى هتقعد تولف وتلحن وتتعب على الفاضى فبلاش منها احسن
وفى نهاية الفيديو اتمنى يكون مفيد
اشكركم لحسن المتابعة ونتقابل فى باقى الجزء الرابع علشان نكمل العربيات المحترمة اللى من 30 الى 40 الف جنية
بسم الله ما شاء اللّه شكرا جزيلا يا باشمهندس
ردحذفالسلام عليكم ورحمه الله وبركاته
ردحذفالماتيز تعمل كام حضرتك