السلام عليكم ورحمة الله وبركاته
الفيديو ده كنت مجهزه من فترة كبيرة
لكن بعض التوكيلات تسببت فى حظر القناة وحذفتلى شوية فيديوهات ومكانش ينفع وسط كل
المشاكل دى انزل بالفيديو
ايه حكاية المثيرة للجدل
شيفروليه نيو أوبترا
من شركة المنصور
للسيارات، وكيل شيفروليه ،
وكل ده علشان فى عربية
نفس الشكل بس صينى انتاج شركة سايك اسمها باجون 630
الصينيين متميزين فى
الهندسة العكسية , انت بس انزل بمنتج ناجح ومبيعاته عالية ومطلوب هتلاقى شركات
صينية بتشترية مش علشان تستخدمه لا لا خالص لكن بيشتروه علشان يتفكك ويتقلد بخامات
اقل وامكانيات اعلى وينزل بربع سعرك
وتقليد الليكزس
وتقليد رينج روفر
وتقليد مرسيدس جي ال ايه
وتقليد جاكوار
وتقليد لامبورجينى
وبي ام دبليو اكس6
وتقليد فورد اف 150
..... كفايه كده ولا اقول كمان ؟
لو هعدلكم المنتجات
اللى قلدتها الصين عاوز فيديو 3 ايام
مافيش سلعة فيك ياكوكب
الارض ماتقلدتش من مصانع صينية لدرجة ان مصانع الصين بقت بتسرق من بعض وبتقلل
الخامات وتنزل بالسعر
يعنى كل منتج بيسرقوا
تصميمه ويقلدوه بخامات واسعار مختلفة والمصانع هناك بينافسوا بعض فى قلة الاصل ومين يقدر يوصل لأقل سعر حتى لو خامات ضاره
بالبشر المهم اقل سعر علشان يبيع اكتر
انا ليا صديق سافر
الصين ولاية كوانزو ولف فى الاسواق واشترى فلاشة ميمورى
كارد 64 جيجا ب 7 دولار ايام ما كان
الدولار ب 8 جنية مشى قدام شوية فى السوق
لقاها بتتباع ب 3 دولار قال مافيش مشكلة وجاب اتنين على سعر ال 3 دولار وغرز فى
السوق لقاها بتتباع بدولار جاب لاصحابه وانا منهم 10 فلاشات ولما رجع الفندق جرب
كل الفلاشات لقاهم بيقروا واللاب توب شايفهم والمساحة مكتوبة صح
رجع مصر جرب يخزن على
الفلاشات لكن الفلاشة ام دولار اكتشف انها مقرية على اللاب توب بالمساحة المضبوطة
64 جيجا لكن مافيهاش مساحة للتخزين يعنى
الصينيين حاطين فيها حاجة تخليها تخدع الكمبيوتر وتقرا المساحة لكن مافيش فلاشة
ولاهتعرف تخزن عليها بايت واحد
والفلاشة ام 3 دولار
مقرية 64 جيجا لكن آخرها فى التخزين 8 جيجا
اما الفلاشة ام 7 دولار
بتخزن فعلا 64 جيجا لكن باظت بعد اسبوع
هى دى الصين ياحضرات ودى
منتجاتها ... اقتنعت او ماقتنعتش هى كده
ولو شاكك فى كلامى روح اسأل تجار قطع الغيار وقولهم هاخد قطعة غيار صينى ولو فيها
حاجة هرجعها , هتلاقى التاجر قالك القطعة الصينى لو طلعت من المحل ماعرفكش وده
لانه عارف بيبيع ايه
فى كمية قضايا كتيرة
جدا مرفوعة على شركات صينية بسبب التعدى على حقوق الملكية الفكرية فى التصميمات وشركات
كتيرة كسبت القضايا دى زى شركة رينج روفر
انا مش بدافع عن منصور
شيفرولية لكن كنت فى حيره وطول الفترة اللى فاتت بدور
على ورقة واحدة تثبت ان الاوبترا صينى لكن مافيش اى ورق متاح تحس انه سر حربى
لدرجة اننى طلبت من كل المتابعين اللى عنده ورقة تثبت الكلام ده يبعتهالى ولحد حظر
القناة ماعملتش فيديو يقول انها صينى او مش صينى
رغم انى عملت فيديوهات كتير بتفضح مصائب توكيل منصور واتحذفت من القناة
ونزلتها على قناة تانية هتلاقوا اللينك بتاعها فى الوصف اسفل الفيديو
اخدت
العربية من صديق وكشفت عليها كمبيوتر وللاسف
السوفتوير صينى والحساسات كوكتيل من شركات مختلفة
بس
بتحصل فى عربيات كتير لان كل شركات السيارات فى العالم بتستعين ببرامج من الصين
وكمان بعض الأجزاء ف عادى جدا
يعنى
ممكن تكون العربية من جنرال موتورز والسوفتوير من سايك الصينية وسايك استخدمته فى
باجون 630 عادى خالص
لكن
بالعقل
كده فى قوانين بتحكم الامور دى
موضوع استيراد سيارة من
دولة والبيع بإسم دولة تانية دى جريمة المفروض ان محدش هيسكت عليها
مش كده برضوا ولا ايه ؟؟؟
اللى بتقولوا عليه ده مخالفة صريحة لنص المادة 27 من القانون رقم 57 لسنة 1939 على
وجوب مطابقة البيان التجارى للحقيقة من كافة الوجوه لحماية المستهلك من كل تضليل
فى شأن حقيقة ما يعرض عليه من منتجات
ونص المادة 6 من قانون حماية المستهلك رقم 67
لسنة 2006 والمادتين 16, 17 من اللائحة التنفيذية.
يعنى مش حاجة ينفع تعدى كده من غير حساب
انا هسألكم كام سؤال
وهنجاوب عليهم مع بعض بالمنطق وهنشوف المنطق اللى شغال ولا البطيخ !!!!
هل كل اجهزة الدولة الرقابية بيجاملوا شركة منصور
وموافقين على دخول سيارة صينية وكمان تجميعها فى مصر وبيعها على انها امريكية مجمعة فى مصر
يعنى مصلحة الجمارك المصرية
ووزارة التجارة والصناعة
ومباحث الأموال العامة
وإدارة الكسب الغير مشروع
وجهاز حماية المستهلك
كل
الأجهزة والهيئات والإدارات المحترمة دى بتجامل شركة منصور ؟
ده سؤال مهم لازم نجاوب
عليه وخصوصا ان الجهات الرقابية دى هي نفسها اللى قدمت الوكيل الاول للعربية ام
جي شركة ايجيبشن بريتيش أوتوموتيف للمحكمة
سنة 2014 علشان حاول يبيع ال ام جى على
انها صناعة انجليزي واتقفل التوكيل
طبعا بعد كام سنة من قفل التوكيل الناس فقدوا الذاكرة كالعادة وبعد ما اخد منصور وكالة ام جى
حاول يبيعها على انها عربية ليها
ماضى وتاريخ انجليزى مش صناعة انجليزى وخلي بالكم من النقطة دى ..... يعني لو
بيجاملوا منصور كان باعها على انها انجليزى وخلاص مش كده ولا ايه ؟
حتى البورشور بتاع
العربية تلاقى مكتوب عليه درس فى التاريخ الانجليزى وتواريخ من سنة 1700 لكن مافيش
اى حاجة بتتكلم ان بلد المنشأ انجلترا وطبعا كل التاريخ ده مالوش اى قيمة لأن
العربية المباعة فى الاخر صينى وليس لها علاقة بانجلترا ولا بالصناعة الإنجليزية والكلام
ده انا قلته من اول مانزلت ام جى الاسواق المصرية وبعد ماجربتها وقريت البورشور وهتلاقى
الكلام ده فى الفيديو اللى هيظهر هنا
سيبك بقا من الفيديوهات
اللى نازلة سباق مابين الام جى6 وسكودا او ام جى6 وبي ام دبيليو كل دى بروباجاندا
فارغة
كل عربية تلزم مقامها وكلنا
فاهمين ومبقاش فى حد عبيط هتتقل رجلك على دواسة الام جى والتانى هيخف رجله على
البي ام وفى الاخر مين يكسب ومين يخسر .... ده كلام فارغ
ده انا فى 2014 بعربية
بي ام دبليو موديل 74 دايس عليها قطر ولا مسقط موتور ولا اى حاجة وبموتورها اللى
نازله بيه من بلدها وببنزين 80 اقسم بالله شيبت طريق اسماعيلية وجرجرت ورايا عربيات
يابانى وكورى وايطالى وفرنساوى وصينى موديل السنه
تقوللى صناعة صينى بشلن
هتتفوق على الصناعة الالمانى انتوا بتستهينوا بعقول الناس
نخلينا فى موضوعنا احسن
هل شركة شيفرولية
الامريكية هتقبل ان وكيل ضعيف غلبان فى بلد فقيرة مبيعاته فى السيارات فى سنه
كاملة لاتتعدى مبيعات ولايه فى دولة
اوروبية فى شهر
هل هيقبلوا ضياع حقوقهم
وتعريض سمعتهم واستثماراتهم للخطر فى منطقة الشرق الاوسط علشان خاطر عيون منصور
شيفرولية
للأسف الرد على كل الأسئلة
دى هيزعل ناس كتير وانا منهم
منصور دخل عربية صينى
وجمعها فى مصر وباعها على انها امريكى من جنرال موتورز ونفس الكلام فى الدايو
لانوس لان مافيش حاجة اسمها شيفرولية لانوس وجنرال موتورز ماتعرفش عنها حاجة
انا دلوقتى مقتنع ان شيفرولية نيو اوبترا هى عبارة عن اجزاء مصنعه فى الصين ومتجمعة فى مصر وهى هى باجون 630 من شركة سايك
الصينية وده رأيى الشخصى ممكن تتفق معايا او تختلف براحتك انا قعدت سنين ببحث
علشان اوصل للقناعه دى
اديك الاسم واخد عمولة
عن كل المبيعات وشكرا ..... حاليا اغلب الشركات مابقاش عندها شرف ولا احترام
لسمعتها ولا للعميل اللى بيثق فيها الموضوع مادى بحت
زمان موضوع انك تاخد
فرنشايز من شركة كان صعب جدا لدرجة ان الشركات علشان تديك اسمها كانت بتعين
المديرين والموظفين والعمال من عندها
والخامات كمان, يعني كل المطلوب من
حضرتك مكان محترم على شارع رئيسي والباقي
عليهم وتاخد نسبتك يعنى كأنهم مأجرين منك المكان
لكن دلوقتي تروح تقدم
عادى خالص علي عقد فرنشايز مع اى شركة وتاخد علامتها التجارية وبيع مخلل مافيش
مشكلة
اظن دى كانت اجابتى على سؤال بيتكرر كتير جدا
هى الاوبترا مش صينى برضه ؟؟؟؟
ايوه يا باشا صينى وخلى
بالك من اللى خدع الناس مره لانه طبع
العدالة المتأخره دى
ظلم ... والجهات الرقابية اللى كانت نايمه طول الفترة اللى فاتت من 2017 وعربية
بتتصنع فى مصر وبتتباع فى المعارض والناس بيشتروها علشان سمعتها وتاريخها كشركة
امريكية ولما الموضوع اتفضح والناس كلها
عرفت بدأوا يحققوا ده ضياع حقوق بمعنى الكلمة
الأجزاء المستوردة
للاوبترا والورق بتاعها بلد المنشأ الصين عدت ازاى على مصلحة الجمارك كل السنين دى
دانا لما بستورد عربية
زيرو من الاتحاد الاوروبي للاستخدام الشخصى بيطلعوا عنينا ورق وتصاديق وتفتيشات فى الجمرك
فين وزارة التجارة
والصناعة اللى بتفتش على ورش تجميع السيارات فى مصر وازاى تقبل تجميع اجزاء صينى
والبيع تحت مسمى امريكى
ايوه يافندم العربية
صينى واعتبرها مش شيفرولية اصلا واسمها باجون 630 وربنا يعوض على كل اللى كان بيثق
فى الوكيل واشترى اوبترا
وقيس على كده كل عربيات
منصور شيفرولية لان الطبع غلاب
فى مثل انجليزى بيقول
"Fool me once, shame on
you, fool me twice, shame on me."
يعنى .... تخدعنى مره عار عليك
تخدعنى مرتين عار علي
فيديو مصاب وفضائح توكيل منصور
ربنا يسترها ويعديها
على خير
فى النهاية ماتنسوش
تتفرجوا على الفيديو اللى فى الوصف لان فيه كلام مهم جدا
اشوفكم على خير
سلام