الناس بتشترى رغم حملات المقاطعه وخليها تصدى ورغم الركود الإقتصادى ورغم
الاسعار المبالغ فيها
اشترك فى الجروب لمعرفة آخر الأخبار
جروب والله مانا شارى
#والله مانا شارى
ومهما قولت وجبت اسعار العربيات فى مصر وقارنتها بالاسعار فى دول العالم بره اوروبية وعربية واثبتت انها بتتباع هنا بأضعاف السعر وكمان منزوعة الكماليات والامان
برضوا مافيش فايده والناس واقفين طوابير وبالحجز وبيدفعوا اوفر برايس علشان
يستلموا عربياتهم
نفسى حد من الناس اللى كلامهم اكثر من فعلهم وعايزين يغيروا الواقع زى
مابيقواوا
حد منهم يقوللى هتغيره إزاى وانت عربيتك موديل السنه ومااحترمتش كل دعوات
المقاطعه
هتغيره ازاى وانت لسه دافع رشوه علشان تخلص ورقك
إذا كان الريس بنفسه قالك المنتج اللى حاسس ان سعره غالى بلاش تشتريه واستغنى
عنه
الواقع مش هيتغير ياحضرات
وهيفضل سوق السيارات المصرى اعلى سعر على مستوى العالم واكثر استهانه
بعقلية وحقوق العملاء وكمية رهيبه من قضايا النصب ف المحاكم و جهاز حماية المستهلك
....... ده غير طبعا اللى
بيستعوضوا ربنا فى حقهم وماحدش يعرف عنهم حاجه
ناس كتير بيسألونى اشترى من انهى توكيل يكون كويس ومافيهوش نصب وعربياته
كويسه
للاسف مافيش
دورت كتير واتعاملت مع كل التوكيلات والموزعين والمعارض ومش لاقى
مش لاقى حد يخاف ربنا اقدر انصح بالتعامل معاه وضميرى مستريح
علشان كده اللى بيسألنى بقوله معرفش .... الله اعلم .... ربنا يهدى
مش انا بس كده لا .... ده كل المحترمين اللى بيقدموا محتوى صادق على
اليوتيوب وبيقولوا الحق بشرط مايكونوش
مدعومين من اى سبونسر او بيعملوا اعلانات لعربيات كل دول هيقولولك نفس
الكلام
الحل وعلشان يرجع سوق السيارات المصرى زى كل دول العالم سوق محترم فى السعر
وفى المواصفات وفى خدمة مابعد البيع
لازم المقاطعه الكامله من كل الناس اللى معاه فلوس واللى مش معاه
الاسعار كلها غالية ومضروبه فى 2 وفى 3 حتى العربيات السوبر كارز زى ما
بيسموها
المرسيدس والبى ام دبليو والاودى الى
اخره .... سعرها غالى وناقصة عن اللى بنستوردها من اوروبا ومن الخليج واللى جرب
الاستيراد هيفهم كلامى كويس
ليه اشترى عربية من مصر بضعف سعرها فى اوروبا والخليج وكمان متاخد منها كل
حاجه والوكيل مقسمهالى زى الطماطم فى سوق الخضار
درجة اولى ودرجة تانية ومفعصه
وكل فئة حاططلى فيها زرارين على شاشة صينى معفنه ومزودها 30 و 40 الف
انا ليه اقبل بكده ؟ ......... ليه؟
انا فى مصر مش اقل من اى مواطن فى اى دوله محترمة ومن حقى اركب عربية بسعر
مناسب زى الاسعار اللى بتتباع بيها العربيات فى السعودية ودول اوروبا
ليه السعر ينضرب فى 2 وفى 3
ليه العربيات فى العالم كله بتتقسم فئات اساسية حسب قدرة المحرك والسعة
اللترية وبالكتير قوى فئتين واحده 1300 سي سي والتانية 1600 سي سي او 2000 سى سى
وهنا فى مصر تجيلنا اقل قدرة حصانية فيهم ومتقسمه
7 او 10 فئات والتقسيمه معتمده على حاجات ماينفعش تتشال اصلا
زى مثلا فئة فيها فرامل ايه بى اس والأقل مافيهاش والأعلى فيها اى بى دى
واحده فيها وساده هوائية للسائق والاعلي فيها اتنين الساق والراكب الامامى والهاى لاين
فيها للناس اللى ورا كمان
يعنى لو مش معاك فلوس هتعيش انت بس لكن معلش احنا آسفين فى باقي الركاب
البقاء لله
ولو معاك فلوس للفئه الأعلى يبقا حضرتك واللى جنبك ان شاء الله زى الفل بس
العيال اللى ورا معلش احنا اسفين
نعملك ايه يعنى ... مانت السبب ياأخى انت اللى بخيل ومش خايف عليهم
ومشتريتش اعلي فئة
انا اسف طبعا لكن ربنا يديم عليكم الصحة ويبارك فى اولادكم
ده اسمه فكر مريض ومايقلش عن الإتجار بالبشر او الإتجار بالأعضاء وانتهي في
دول العالم المتقدم
يا حضرات المستشارين
الكلام ده مش موجود بره فى اى دوله
العربية بتنزل فتين او تلاته حسب حجم المحرك وعزمه والكماليات والرفاهيه
إنما الأساسيات ثابته فى جميع الفئات
وانظمة الأمان الكامله تعتبر من الأساسيات مش من الكماليات
احنا ياحضرات فى 2021
وانظمة الامان دى مش جديدة سواء فرامل مانعه للانغلاق او توزيع الكترونى
للفرامل او وسائد هوائيه كامله كل الكلام ده موجود فى العربيات من الثمانينات
والتسعينات يعنى المفروض مايكونش اوبشن يسمح للوكيل انه يطلب انظمه معينه فى
عربياته ويشيل انظمه تانية
احنا البنى ادم عندنا زى اى بنى ادم فى اى دولة تانية مش ناقصه حاجه
ياسيدى حتى لو كنا اقل من باقى البنى ادمين اللى فى دول العالم المتقدم
وطالعلنا ديول وشعر وبنتنطط على الشجر ....... فين ... حقوق ... الحيوان؟
منظمات الرفق بالحيوان فين ؟
احنا باللى بنعمله ده ومش عارفين نقاطع منتجات علشان سعرها يرجع طبيعى وواقفين طوابير بالحجز
علشان نشترى بسعر مضروب فى 2 وفى 3
ما هو حاجة من اتنين
يا إما احنا شعب غنى جدا ومش فارق معانا الفلوس ومتسامحين جدا مع اللى
بيسرقنا وده فعلا يخيل على اى حد اجنبى بيتفرج على المسلسلات والأفلام اللى شغاله
اليومين دول من كمية الكومباوندات والقصور والعربيات والحفلات اللى بتتعرض على
الشاشات المصرية بس مايخيلش علينا احنا
يا إما احنا بقينا متناقضين جدا ومش قادرين نفصل بين الواقع والخيال او
الحقيقة والمسلسلات ومش عارفين هل احنا معانا فلوس ولا مش معانا
نروح نشترى عربيات سعرها مضروب فى 2 بالقروض وبالدين ولا نقاطع المنتجات وننزل السعر ونشترى بالسعر العادل
ده الحاجه اللى بتضحك ان الوكلاء بينزلوا اعلى فئه برضوا متشال منها ومش
كامله يعنى حتى لو معاك فلوس وهتقول مش فارق معايا وهتشترى اعلى فئة ...... برضوا
هتاخد حاجة ناقصة
ده فى وكيل لا داعى لذكر اسمه بيستعرض ان عربيته جابت 5 نجوم فى اختبارات
السلامه الأوروبية يورو ان كاب .... طبعا كل ده علشان يزود المبيعات
والغريب واللى يهلك من الضحك ان العربيات اللى منزلها هنا مصر متشال منها
90% من انظمة الأمان اللى هى اصلا السبب اللى خلا العربية دى تاخد ال 5 نجوم في
اختبارات السلامة الاوروبية
يعنى انت بتبيعلى الوهم .... بتبيعلى انظمة امان من غير انظمة امان
والأغرب انه بيبيع العربية منزوعة الأمان وطبعا منزوعة الكماليات بضعف
سعرها بره
ياراجل ده انت لو كافر ماتعملش كده
ياسيدى العزيز الغير محترم بيع زى مابتبيع بضعف السعر انا موافق
بس وحياة امك سيبهالى زى ماهي ماتشغلش دماغك وهاتها زى ما بتتباع في بلدها
انت بتشتغل ايه ؟..... مستورد ... مش
كده .... حلو قوى
لو سمحت استوردلى عربية بس ... الحكاية مش محتاجه فهلوه
انا قابلها بالسعر بتاعك بس هاتها زى ماهي
ولما ربنا يكرمك ان شاء الله وتعرف تصنع عربية بإسمك ابقا بيع واشترى فينا
زى مانت عايز ...... وابقا قابلنى لو عرفت تنافس
انما كل واحد عامله ورشه بيجمع فيها اجزاء العربيات مسميها مصنع وواخد على
حسها قروض بالمليارات من البنوك وبيبيع بأسعارعلى مزاجه ده تهريج
لكن تكلم مين ومين يسمع
هو اللى جرب يكسب فى الحاجة 3 اضعاف هتعرف ترجعه يكسب الضعف .... طبعا
مستحيل
زى اللى اتعلم واتعود ياخد رشوه .... لما تقوله هزودلك مرتبك هيبطل الرشوة
ولا حتى المرتب بتاعك هيملا عينه .... ابدا
هياخد المرتب وكمان ياخد الرشوة ويقولك البحر يحب الزياده
ياخى يارب كل اللى بيستحلوا شقا
وتعب الناس كده يغرقوا فى البحر اللى بيحب الزياده وربنا يفتحها عليهم كمان وكمان ....
مااحنا خلاص وصلنا من الضعف وعدم الترابط ان كل واحد مننا يقعد على جنب ويدعى على اللى بيسرقه فى حين ان
معانا اقوى سلاح فى العالم وهو المقاطعة
علشان خلاص ماعادش فى عزم
وكلمة عزم دى كلمة كبيره قوى
والعزم اللى اقصده هو الصبر على المقاطعة
موضوع نص مقاطعه وربع مقاطعه ده عمره ماهيجيب نتيجة ابدا
بالعكس ده عامل زى الهدنه اللى بتخلى العدو يشم نفسه
ويوفق اوضاعه ويلاقى حد يدعمه ويسنده وانتوا فاهمين قصدى كويس
لازم كل الناس تقاطع تجارة السيارات فى مصر مقاطعه كاملة كل الناس مش
المثقفين والغلابه بس
انت كمان حتى لو مليونير لازم تعرف انك بتجيب عربيتك باتنين مليون وهى
ثمنها 700 الف يعنى انت بتتسرق اكثر
وكمان العربية بتنزلك بنص كماليات
لازم لو فى مقاطعه تكون مقاطعه حقيقية
والرجالة اللى واقفين طوابير على المعارض ...... خليكوا رجاله
الراجل مايتنصبش عليه
الراجل مايدفعش اتاوه تحت مسمى اوفر برايس
الراجل لما حد ينصب عليه مايسكتش ويروح يجيب حقه
اعمل حاجه لنفسك
اعمل حاجه لاولادك علشان يعرفوا يركبوا عربيات لما يكبروا بدل مايعيشوا نفس
العيشة الهباب اللى انت عيشتها ويشوفوا نفس معاناتك
لو عاوز بلدك تبقا احسن وتقدر تعيش فيها بكرامه ويقل النصب ومرتبك يقضيك
وتعرف تحوش منه ... قاطع اى سلعه غاليه
فعل المقاطعه على اى منتج سعره مبالغ فيه مش بس العربيات.... لأ
اى منتج سعره غالى كل المطلوب منك انك تبطل تشتريه سواء كنت غنى او فقير
حاجه غالية وانت متأكد ان سعرها مبالغ فيه ... بلاش منها خالص
انا اطلقت النهارده حملة مقاطعه وجروب على الفيسبوك هسميه
والله مانا شارى
هو كده والله مانا شارى
هسيبلكم اللينك بتاع الجروب ده فى الوصف اسفل الفيديو
وطبعا انا عارف ان فى ناس كتير هيستغلوا الجروب ده وهيعملوا جروبات بنفس
الإسم علشان يستفيدوا من اللى بيشتركوا فى الجروبات العامه اللى زى ده
لكن انا حاططلك رابط الجروب وهتلاقى مدير الجروب ايهاب بكر وهتلاقى الفيديو
ده وفيديوهات فضائح غبور وفضائح منصور متثبته فى اول بوستات الجروب
الجروب ده هو مجرد تجمع للناس اللى مش عايزين يتنصب عليهم وعاوزين البلد
تبقا احسن والأسعار تنزل وكل اللى هيدخل الجروب مش هيشترى عربيات من وكلاء مصر
سواء غنى او فقير معاه فلوس او مامعاهوش
فى الجروب ده بنقول لوكلاء السيارات كفايه استغلال وكفايه نصب وكفايه مص فى
دم الغلابه
الجروب ده والله مانا شارى هيضم كل الناس اللى عندهم كرامه ومايقبلوش
بالظلم
اعضاء الجروب ده هما الناس اللى مابيخافوش ولا حد بيعرف يستغلهم ولا يقهرهم
اعضاء الجروب ده هم الشرفاء اللى عددهم قل فى الزمان ده
اى حد من اعضاء الجروب عنده فيديو عن فساد وكيل او عربية اشتراها وفيها
مشاكل او عمل حادثة لاقدر الله وانظمة الامان ماشتغلتش او وكيل رفض يصلح عربيته
يكتب ويبعت فيديو ويبعت صور واحنا هنا فى الجروب هنقف معاه لحد مانجيب حقه
فى نهاية الفيديو احب اقولكم ان مافيش اى حاجه هتتغير إلا بوقفه مننا كلنا
لا الف ولا 100 الف هيغيروا الفساد فى قطاع السيارات
عاوز الدنيا تتغير والبلد تبقا احسن ..... إبدأ بنفسك وماتقولش هو يعنى
المقاطعه هتعمل ايه
لا يافندم
المقاطعه هتعمل كتير وعملت كتير فى كل دول العالم المحترمة المتقدمه وده
اللى خلاهم من دول العالم الأول
المقاطعه هى القوة الناعمه الوحيدة اللى تجيبلك حقك لحد عندك انت والأجيال
اللى بعدك
بس المقاطعه الحقيقية من كل الناس وسياسة النفس الطويل والصبر
هو ده اللى هيجيب نتيجة
وللعلم
لو كانت المقاطعه كاملة من كل الناس فى حملة خليها تصدى كانت جابت نتيجة فى
اقل من سنه
انما للأسف انا وغيرى كنا بندعوا كل الناس تفعل المقاطعه وفى نفس الوقت
شايفين الوكلاء بيبيعوا حتى اثناء الوباء والمبيعات بتزيد
شئ مخزى
ان حد يقولك انا مقاطع وتلاقيه زى الحراميه رايح يشترى وحصل الكلام ده
معايا ومع ناس تانيه كتير
يبقا بيكلمك عن الإتحاد والمقاطعه وتلاقيه للأسف اول واحد بيهد كل اللى قاله
وواقف زى الخروف مستنى دوره علشان يشترى بضعف السعر ويتاخد منه كمان اوفر
برايس ويستلم عربيه خرده
اتمنى تكون المقاطعه المره دى حقيقيه وكامله
اشوفكم على خير
سلام