ارخص عربيات اوتوماتيك بتكييف فى مصر بسعر 50 الف جنية
السلام عليكم
ورحمة الله وبركاته
النهاردة هنتكلم
عن افضل وارخص عربيات اوتوماتيك بتكييف فى مصر
بسعر من 50 الى 55 الف جنية فقط
بس الاهم انى هجيب
عربيات اعتمادية وقطع غيارها متوفرة ورخيصة وصيانتها سهلة يعنى اى ترزى ممكن يشتغل
فيها
هبعد عن العربيات
ال6 سلندر وهبعد عن الموديلات القديمة علشان الحاله تكون معقولة
وفى نهاية الفيديو
هقول افضل عربية فيهم من ناحية الاعتمادية وتوفر قطع الغيار والمشاكل الأقل
والتوفير فى البنزين
ده يعتبر الجزء
الاول وإن شا الله هنطلع بالسعر ونكمل باقى الأجزاء
قبل ما اتكلم فى
اى حاجة عاوزك تنزل تدوس لايك لانى تعبت فى الفيديو ده جدا علشان اجيبلك كل
المعلومات دى من اسواق السيارات والمعارض ولو مش مشترك لازم تشترك علشان تستفيد من
فيديوهات القناة
وبشكر كل الاصدقاء
اللى دعمونى بلايك او شير وان شاء الله ربنا يقدرنى واستمر فى تقديم محتوى مفيد
كفاية كلام
ونبدأ على بركة
الله
ارخص عربيات
اوتوماتيك بتكييف فى مصر بسعر من 50 الف جنية
اول عربية معانا
بسعر من 50 الف الى 55 الف جنية
تويوتا
كورولا الشكل القديم موديل 1991
وتعتبر الجيل السابع من كورولا وظهرت تويوتا كورولا الملكة
زى ما بيسموها سنة 1991 و استمر انتاجها حتي 1998 , و حققت تويوتا بهذا الجيل اعلي
مبيعات في تاريخ السيارات متفوقة علي فولكس فاجن بيتلز فى زمانها , كورولا الملكة
من اكتر السيارات المستعملة حبا في مصر و ده بيرجع
لعدة عوامل منها سهولة صيانتها و اعتمادية
السيارة وقطع غيارها المتوفرة وسهولة اعادة البيع
نيجي للفنيات
تويوتا كورولا الملكة متوفرة بعدة محركات
هنستعرض الاكثر انتشارا في مصر
المحرك الاول 1300cc
:
4 سليندر , عزم 98
نيوتن.متر , و قوته 72 حصان
المحرك الثاني 1500cc
:
4 سليندر , عزم 136
نيوتن.متر , و قوته 104 حصان
المحرك الثالث 1600cc
:
4 سليندر , عزم 140
نيوتن.متر , و قوته 113 حصان
وهو ده افضل محرك
وافضل نوع من كورولا
مميزاتها :
الشكل انسيابي , المساحة الداخلية جيدة ,
محركها قوي و بسيط و قليل الاعطال و سهل
الصيانة , قطع غيارها معمرة , ثباتها كويس جدا على السرعات العالية , سرعة في
اعادة البيع , التكييف قوى جدا
عيوبها :
قريبه من الارض وهتحك معاك فى اغلب المطبات, ويفضل انك
تكشف على الفتيس الاوتوماتيك كل شوية وتهتم بالزيت بتاعه
تويوتا كورولا فيها شوية كماليات محترمة زى
تكييف , سنتر لوك , باور , زجاج كهرباء
تانى عربية معانا
بسعر من 50 الى 55 الف جنية
هيونداى
اكسيل موديل 1995
العربية الشعبية
فى الشارع المصرى ايام التسعينات
عربية الشاب الروش
بديل ال 128 فى مصر
بدأ انتاج موديلات هيونداي أكسيل بداية من
عام 1989 واستمر حتى عام 1995 كسيارة سيدان ونزلت السيارة في العالم بمحركات 1300
و1500 سي سي
وبنواقل حركة مانيوال وأوتوماتيك. وتعتبر
السيارة بديل لموديلات بوني التي تعتبر الجيل الأول من هيونداى أكسيل واللى كانت
موجودة في الثمانينيات.
اول مانزلت اكسيل نزلت في السوق الأمريكي في البداية والموضوع ده
ساعد هيونداي انها تبقا شركة ليها اسمها ووضعها فى العالم ،
هيونداى اكسيل بتتمتع بشكل جذاب وحجم جيد
وتتوفر في نسختين سيدان وهاتشباك. 4 ابواب وبابين
اكسيل متوفرة بمحرك 1500 سي سي كربراتير
للنسخ المصرية وانجكشن للنسخ الاستيراد
وفى ناس كتير عدلوا محرك السيارة بنسخة
1500 انجكشن المستوردة
ونازلة بنسخة 1300 سي سي كربراتير
والانجيكشن لا تستهلك وقود كثير، وينصح
ملاك السيارة في حال حدوث عيب في الكربراتير بتغييره بآخر استيراد لأنه يكون أفضل
بكثير.
ومنها موديلات مصرى وأخرى خليجي وبالتأكيد النسخ
الخليجي أفضل من المصري من حيث التجهيزات
الهيونداى اكسيل سيارة تتمتع بنعومة المحرك
الذي يعتبر هاديء لحد ما ومش هتسمع له صوت ، والمحرك سهل العثور علي أجزاءه خاصة
الاصلية الكوري, العربية اقتصادية في
استهلاك البنزين، ورغم أن محرك 1300 سي سي صغير ولكنه مناسب للسيارة ومقبول جدا .
مساحتها الداخلية مناسبة ومريحة
والاكسيل سواقتها سهلة وناعمة باجماع ملاك السيارة .
وتتوفر السيارة بناقل حركة مانيوال 4 سرعات
ومانيوال 5 سرعات وهو الأكثر انتشاراً في نسخ الأكسيل سواء ال 1300 أو ال 1500 سي
سي
وموجود منها فتيس أوتوماتيك 4 سرعات لكن مشاكله
كتير.
ويتميز الجزء الداخلي من السيارة بتوفر
تجهيزات كثيرة تشمل عجلة قيادة باور مرنة وسهلة في الحركة وسنتر لوك وزجاج كهرباء
وفتحة التانك والشنطة الخلفية من الداخل والكلام ده في النسخة اللى بمحرك 1500 سي سي،
بينما النسخة بمحرك 1300 سي سي مافيهاش نفس التجهيزات السابقة,
الشنطة الخلفية للسيارة كبيرة وتشيل شنط
كتير رغم ان شكلها مايبانش عليه.
ويعيب السيارة أن العزل فيها سيء وبالتالي
من يجلس داخل مقصورة السيارة يسمع كل الاصوات الخارجية بصورة واضحة.
قطع غيارها متوفرة وسعرها رخيص ومعمرة
ومنتشرة الي حد ما
لكن فى شكاوى فى الفترة الاخيرة من بعض
النقص في أنواع قطع غيار في السيارة مثل الفايبر الداخلي والخارجي
وده راجع للتقادم لان العربية عمرها 20 سنه وده السبب
اللى جعل قطع غيارها تنقص
والدليل على كده انك هتلاقى عربية تانية
احدث شوية زى الهيونداى أكسنت قطع غيارها أكثر انتشاراً ومتوفرة.
يعيب السيارة أن قوة التحمل فيها ضعيفة
خاصة فى المطبات
عموما العربية ضعيفة من حيث الهيكل وهي
منخفضة وقريبة من الأرض وبالتالي تعاني من المطبات
وعفشة السيارة مرنة لكنها ضعيفة وتحتاج
باستمرار للتربيط وضبط الزوايا خاصة في
الطرق المصرية المتهالكة,
كمان الشاسيه ضعيف وبيتعرض في بعض الأوقات
للكسر والشرخ وبالتحديد عند المساعد وبيقوم بعض الناس باستخدام أعمدة حديدية من الاسفل تساعد في تدعيم
الشاسيه.
الاكسيل اقتصادية في استهلاك البنزين وبتشتغل ببنزين 80 عادى خالص مش هتقول لا,
ولكن اللى يؤثر على سعرها أن هيكلها الخارجي
ضعيف
والصاج عليه شكاوي كتيرة جدا خاصة الكبوت اللى بيتعرج ويكرمش من الفرامل
الشديدة وطبعا الكلام ده يؤثر علي سعر
اعادة البيع خاصة لو كانت متهالكة.
هيونداى اكسيل غير ثابتة على الطريق خاصة
على السرعات العالية
وبعد تجاوزها سرعة 100 كم تكون غير مستقرة
على الطريق ريشه زيها زى الهيونداى فيرنا.
لكنها في النهاية سيارة عملية خاصة لمن
يشتري سيارة لأول مرة وتتميز بسهولة قيادتها ومراياتها كبيرة التي تجعل هناك
امكانية لرؤية الطريق والزوايا حولها بسهولة كما أن تكييفها جيد
وموفرة في الوقود واضاءتها جيدة كما تتمتع
بالاتساع والرحابة وهي مميزات تجعلها مطلوبة وعليها اقبال
ثالث عربية بسعر
من 50 الى 55 الف
هوندا
سيفيك موديل 1988
اول ظهور لهذة السيارة عام1987 وتم وقف انتاجها عام 1991
وقدرت هذة السيارة ان
تنال اعجاب الجميع بفضل نظام تعليقها المبتكر وتصميمها الحديث وجودة الخامات
وتم اصدار اربع نسخ
من هذة السيارة سيدان 4 ابواب- هاتشباك 2
ابواب – نسخة رياضية CRX 2 ابواب بمقعدين فقط – واستيشن واجن 4 ابواب
نزلت هونداسيفيك
بمحركات مختلفة منها المخصص للسوق
اليابانية ومنها المخصص للسوق الاوروبية (ex-lx )
لكن هنتكلم عن ماهو
متوافر فى سوقنا المحلى
تم نزول هذة السيارة
بمحركين الاول سعتة اللترية 1500 سى سى كربراتير متوفر
بناقل حركة مانيوال واتوماتيك,
والثانى 1600 سى سى D16A9 انجيكشن
وتم نزول محرك مزود
بكربراتير مزودج ويحمل اسم d15b ويستطيع ان يولد قوة حصانية تفوق اى محرك تانى من نفس الفئة 130 حصان
وفى كمان محرك رياضى
بسعة لترية 1600 سى سى حقن الكترونى
هنستعرض الهوندا
سيفيك بالمحرك ذو السعة اللترية 1500 سى سى
الكماليات : الاساسية
تكييف – باور - زجاج
كهرباء – سنتر لوك – ساعة رقمية – مرايات كهرباء – فتح الشنطة والتانك من الداخل -
فتحة سقف كهربائية
مميزاتها
شكل جميل وانسيابى
ثبات عالى جدا
قطع غيار متوافرة وثمنها معقول
اعتمادية جدا
مساحه داخلية واسعة
موتور هادىء وسريع
الاستجابة فى النقلات المانيوال
متوسط استهلاك الوقود: 8 لتر لكل 100 كم
عيوبها
اداء التكييف ضعيف
نسبيا وبيأخذ وقت طويل للوصول لدرجة البرودة المطلوبة
انخفاض السيارة وقربها
من الارض بيخليها تحك فى جميع المطبات الحكومية والخاصة
ضعف الموتور فى السحب
بناقل الحركة الاتوماتيك
رابع عربية في
حدود سعرنا من 50 الى 55 الف
كيا
برايد موديل 2000
كيا برايد، سيارة صغيرة ، تم تصنيعها من شركة السيارات الكورية الجنوبية
كيا موتورز، من 1986 إلى 2000، وقد تم استعارة هذا الطراز من فورد، التي أنتجت
سيارة مماثلة، تسمى فورد فيستيفا، بعد أن ظهرت في السوق الأوروبية في عام 1991،
أصبح طراز برايد سيارة ذات شعبية كبيرة، ولكن مع ظهور طرازات جديدة، من الشركات
المصنعة الأخرى، بدأت مبيعاتها في الانخفاض…
ظهرت سيارة كيا برايد لأول مرة عام 1986، تم تقديمها بأربعة اشكال للجسم،
وهي: هاتشباك بثلاثة أبواب، وسيارة سيدان بأربعة أبواب، هاتشباك ذات 5 أبواب،.
في عام 2000، توقف إنتاج سيارة كيا برايد، وتم استبدالها بنموذج جديد أكبر،
يسمى كيا ريو، في الفترة من 2001 إلى 2005 ،
قررت شركة السيارات الإيرانية سايبا، البدء في إنتاج طراز كيا برايد،
وأنتجت الشركة سيارة تسمى سايبا برايد.
يعنى هتلاقى منها
الكورى والايرانى والمصرى
والافضل تخليك فى
الكورى
كان سعر سيارة كيا برايد عام 1987، منافسًا إلى حد ما عند مقارنته
بالموديلات الأخرى، الموجودة في نفس الفئة، المتوفرة في السوق المحلية.
مواصفات كيا برايد:
المحرك:
في البداية، بالنسبة لجميع إصدارات طراز كيا برايد، تم تقديم خيارين
لمحركات البنزين، كربراتير ذات أربع أسطوانات على التوالي، مع أحجام 1.1 و 1.3
لتر.
بعد عام 1995، تمت إزالة المحرك سعة 1.1 لتر، من قائمة وحدات الطاقة
المقترحة، وتم تجهيز المحرك سعة 1.3 لتر، بحقن الوقود بدلاً من الكربراتير
القديم، وذلك بسبب الأخذ بمعايير الاتحاد الأوروبي الجديدة لعادم السيارات.
المحرك سعة 1.3 لتر، تم تقديمه بثلاثة إصدارات: 64 حصان، 73 حصان، و 88
حصان، وفيما يتعلق بناقل الحركة، ثم تثبيت جميع السيارات علبة التروس اليدوية 5
سرعات.
مزايا كيا برايد
تتمتع هذه السيارة بأداء جيد، مع تسارع 1100 سم مكعب، وايضا أفضل مكابح
صغيرة الحجم.
قطع الغيار الأصلية رخيصة للغاية.
أنها سيارة مريحة جدا.
صيانتها سهلة للغاية، لأنها تحتوي على تقنية بسيطة.
ابتداء من موديل 96 الى 2005
العربية اقتصادية فى البنزين جدا قطع غيارها موجودة ومش غالية علشان كده
اسمها العصفورة وماسكة سعر فى السوق
كل الهاشباك مانوال / اما السيدان مانوال / واوتوماتيك
كل الموديلات ممتازة المهم حالة العربية واساسيتها
عربية صغيرة شبابية / عائلية الى حد ما / لانها مش كبيرة اوى على عيلة
مكونة من 4/5 افراد بتسافر بيها كل حته
العربية يادوب بتشم بنزين هى المفروض بتعمل من 5.5 إلى 6 لتر فى ال 100
كيلو للموديل 1100 سى سى وال 1300 سى سى حوالى 7 لتر لكل 100 كم لو ماشى على طريق
سفر
عيوبها
قريبه من الارض
غير ثابته على الطريق ونصيحة ماتحاولش تعدى بيها ال 100 كم/س
صاجها ضعيف والعزل صفر يعنى هتسمع صوت الموتور وصوت الشارع
خامس عربية في
حدود سعرنا من 50 الى 55 الف
اوبل
فيكترا 1995
سعة المحرك 1998 سى سى
قدرة المحرك 136 حصان
متوسط استهلاك الوقود للسيارة 8.6 لتر لكل 100 كيلومتر على الطرق السريعة.
تتميز السيارة بمساحة صالون واسعة ومريحة أثناء السفر.
بالإضافة إلى قوة تحمل الهيكل الخارجي ومقاومة الصدمات.
كما أن السيارة ثباتها عالي على الطريق
عيوبها
عدم توافر قطع الغيار وارتفاع ثمنها يعنى هتلف كتير لحد ماتلاقى قطع الغيار
وخاصة الفايبر الداخلى والخارجى واجزاء من العفشة.
وللاسف العربية تقيلة في إعادة بيعها مرة أخري.
آخر عربية معانا اوتوماتيك بتكييف بسعر من 50 الى 55 الف
ميتسوبيشى لانسر موديل 1991 اللى اسمها فى مصر عيون صفية
هتسألنى وتقولى علل
ليه سموها عيون صفيه
هقول لحضرتك انت فى مصر وكل شئ وارد يعنى ما المرسيدس سموها خنزيرة وتمساحه
وزلموكة
حضرتك شوفت تماسيح ولا خنازير ولا حتى زلموكات غير اللى راكبينها
ولا حتى فى اى حد اعترض ... اكيد لأ
والله لو سموها سيد ونزلوها النهاردة فى 2021 وباعوها بمليون جنية ....
برضوا هتلاقى اللى يشترى ولو حاولت تنصحه
هيدافع عنها بإستماته كأنه بيدافع عن امه
بتعتبر من أفضل الخيارات فى سوق السيارات المستعملة سيارة ميتسوبيشي لانسر
موديل 1991، بالإضافة لكونها اعتمادية و موفرة فى قطع الغيار و استهلاك الوقود.
زودت بمحرك رباعى الأسطوانات بسعة 1300 سي سي، ينتج قوة 75 حصان، وعزم
الدوران 102 نيوتن متر، سرعتها القصوى 215
كم \ ساعة.
أطلقت ميتسوبيشي نسختين من هذه السيارة واحدة تنتمي إلى عائلة السيدان،
والأخرى لفئة الهاتشباك، كما تعتمد السيارة على منظومة الدفع الامامى للعجلات،
وتحتوى على خزان وقود سعة 38 لتر، مع نوعين من نواقل الحركة الأول مانوال و الأخر
أوتوماتيكي.
العربية دى افضل موديل نزل فى اللانسر حتى الان لان من اول موديل البطة
بدأت الشركة يحصلها مشاكل وشكاوى بسبب عيوب فنية فى سياراتها مما ادى الى تغيير
الادارة وتغيير سياسة الشركة الى فتح مصانع تابعة للشركة (mitsubishi) ولكن خارج اليابان مثل ماليزيا وكوريا وجنوب افريقيا مثلما حدث
أيضا مع شركة تويوتا ولكن مع ميتسوبيشى كانت الصين تحديدا لان طبعا أجرة الايدى
العاملة هناك منخفضة نوعا ما عن اليابان , يعنى العربية بتطلع باسم الشركة وبنفس
العلامة التجارية ولكن المكونات يابانية والتجميع صينى او كورى او ماليزى او جنبوب
افريقى ولكن عيون صفية وما قبلها هما الوحيدين اللى مكوناتهم يابانية والتجميع كمان
يابانى
مميزات اللانسر
سرعة – ثبات – قوه فى الآداء –اعتمادية – قطع غيار متوفرة – سعر قطع الغيار
معقول – العربية مشاكلها قليلة جدا
عيوبها
قريبة من الارض وبتحك فى المطبات – صالونها ضيق – تكييفها ضعيف نوعا ما
الفتيس الاوتوماتيك 3 نقلات بس وده بيخليى الموتور دايما صوته عالى بعد ال
80 كم/س
دى كانت آخر عربية اوتوماتيك بتكييف معانا بسعر من 50 الى 55 الف جنية
واخيرا
افضل سيارة فى كل
اللى فات هى التويوتا كورولا يليها الميتسوبيشى لانسر
عدينا شوية
عربيات ماتكلمناش عنها زى
تويوتا
كورونا – هوندا اكورد – ميرا – فولفو – دايو سليو – نيون – دايو سبيرو – المرسيدس
بانواعها – دايو ريسر – الشيفرولية بأنواعها – البويك والبونتياك الامريكانى
كل
الانواع اللى متكلمناش عنها دى مشكلتها الأساسية حاليا هى قطع الغيار
ودى
حاجة مش سهلة ولا ينفع تعديها وتقول هحاول اولف قطع غيارها مع نوع تانى مش دايما
بينجح الموضوع ده ومش مع كل الأجزاء
تابعونى
فى الجزء التانى هنعلا بالسعر شوية لحد ال 70 الف وهجيبلكم كل العربيات
الاوتوماتيك بتكييف وتكون اعتمادية وموديل قريب و 4 سلندر
اشترك فى القناة وفعل ذر الجرس علشان تجيلك كل الفيديوهات الجديدة
اشوفكم
على خير
سلام