استكمالا لموضوع مقاطعة شراء السيارات فى مصر وحملة المقاطعة والله مانا شارى
وهتلاقى مدير الجروب ايهاب بكر مكتوب بالانجليزى وهتلاقى
كل فيديوهات الفساد والمقاطعه متثبته فى اول الجروب
إستكمالا للموجه الجديدة من المقاطعة الكاملة
مش النص نص زى اللى فاتت
وبعد كل الكلام اللى بنقوله ودعوات المقاطعه
اللى بنحاول من خلالها الوصول للسعرالعادل اللى بتتباع بيه العربيات فى كل دول
العالم ماعدا مصر
ده الفيديو الثانى واللى هتشوفوا فيه المهذله
اللى بتحصل فى سوق السيارات المصرى وبس ....
.مش اى سوق تانى ولا اى دوله تانية ....
الكلام ده عندنا احنا وبس
واحنا طبعا سباقين فى المواضيع دى ومتفردين زي ما كل الناس عارفه ...
فى الفيديو ده هجيبلكم الاسعار اللى زادت فى
29 عربية فى مصر والكلام ده زيادات فى شهر اكتوبر بس و دى زيادات ثابته غير
الزيادات الغير معلنه اللى هى الاوفر برايس
يعنى الوكلاء بيبيعوا عربياتهم بسعر مضروب فى
2 وفى 3 عن السعر العالمى اللى بتتباع بيه العربيات فى دول العالم ودول الخليج
وقرروا فى شهر اكتوبر 2021 الحالى انهم
يزودوا الاسعار كمان شويه طبعا ده غير الاوفر برايس ..... وخلوا بالكم كل ده بسبب
الإقبال على الشراء يعنى انتوا السبب مش حد تانى !
ولازم طبعا خدامين الإنسانيه اللى بيقبضوا من التوكيلات يختلقوا اسباب علشان الناس
لما تسأل ايه سبب الزيادة يدوهم عذر اعوج وشبههم بالضبط
فتلاقى واحد طالع يقولك اسعار الشحن زادت على مستوى العالم
والتانى يقولك اصل فى ازمة فى الرقائق الإلكترونية المايكروشيبس
..... فعلا الكلام ده حقيقى لكن
مش الزياده دى
طيب هى اسعار الشحن بتزيد عندنا احنا وبس علشان احنا عايشين فى عالم موازى مثلا وبنحتاج سفن فضاء مش سفن عاديه وسفن الفضاء زى مانتوا عارفين بنزينها غالى وبتكلف ...
ولا احتمال الرقائق الالكترونية احنا اللى
بنشتريها علشان نصنع العربيات .... جاتها نيله اللى عايزه خلف
هو مش سعر العربية على كل دول العالم
والزيادة اللى بتحصل فعلا بسبب اسعار الشحن زودت اسعار كل العربيات فى كل العالم ولا
عندنا وبس
هعملكم فيديوهقارن فيه بين اسعار العربيات فى
مصر واسعارها فى دول العالم اوروبية وعربية علشان تشوفوا الفرق قد ايه والسرقة قد
ايه وهتتفاجئوا
وبعدين مش نفس الشحن ده هو اللى بينقل كل
حاجه بنستوردها ... اكل وشرب ولبس وتكنولوجيا ...اشمعنى العربيات بس اللى كل شويه
سعرها يغلى
وبالنسبه للرقائق الالكترونية اللى بتزود
اسعار السيارات هى مش داخله برضوا فى كل حاجه فى حياتنا موبايلات وشاشات
وكمبيوترات ليه باقى المنتجات دى سعرها مش بيضاعف
فعلا الحاجات دى سعرها زاد
لكن الزيادة فى العالم كله فتافيت مش زى
عندنا فى مصر اضعاف الزياده عندنا بنسبه مئويه من السعر اللى اصلا مضروب فى 2 وفى
3
يعنى انتوا اصلا بتبيعوا العربية بضعف سعرها
بره ولما اسعار الشحن تزيد تضاعفوا زيادات اسعار الشحن العالميه كمان
ده غير ان العربيات اللى بتجيبوها منزوعة الامان
والكماليات علشان تكسبوا كمان وكمان
ومش كده وبس لأ ده التوكيلات قللت الحصه اللى
بتبعتها للموزعين علشان يبقا فى حجز واوفر برايس علشان يراضوا الموزعين لأن
الممنوع مرغوب
فعلا نفسيا الممنوع مرغوب وبيسموها فى
الماركتينج سياسة القطيع وبيسموا الناس المجرورين لسلعة معينه ليدزبمعنى منقادين
جرب انك تمشى فى الشارع وتلاقى محل عليه زحمه
... هتلاقى نفسك لوحدك كده واقف فى الطابور مش مهم بيبيعوا ايه ولا انت محتاجه ولا
لأ
المهم خلينا فى موضوعنا ونكمل كلامنا عن
الموزعين
علشان الموزع ده برضوا حوت من الحيتان ... هو
حوت صغير شويه بس يعنى هو مالوش نفس ياكل شوية سمك ده حتى منظمة الحيتان تزعل
ماهى التوكيلات بعد شوية الخسائر من حملة
خليها تصدى والعربيات موديلات 2018 و 2019 و 2020 اللى كانت ماليه المخازن ومرميه
فى المينا اللى كلنا شوفناها بعنينا وبعتنا لبعض صورها وفيديوهاتها على السوشيال
ميديا .. ياترى راحت فين مئات الآلاف من العربيات اللى قعدت مرميه فى الشمس والمطر
لحد مابقت خرده
عايزين تعرفوا راحت فين ...
اتباعت... بالاتفاق مع العنصر ح
وعلشان الوكلاء يسددوا الديون قام العنصر ح بعمل
مهرجان او ممكن نسميه كرنفال تعويض خسائرعلشان كل التوكيلات ترزق وتبيع المخزون
بتاعها ووافق على ان موديلات 2018 و 2019 اللى اكلتها البارومه من رميتها فى الشمس
3
سنين تتصلح فى ورشهم ويتغير ورقها وتتباع على انها موديل السنه علشان خسائر الناس
دى خسائر مهمه
مهمه لسببين هنتكلم عنهم كمان شويه
والغريب ان العنصر ح بيعمل الكلام ده مجبر
وبقالوا سنين على كده
والاغرب ان العنصر ح مابيتعلمش واتنصب عليه
كتييييير جدا على مدى قرن من الزمان من ساعة ماتوجد وحتى الأن
لدرجة ان فى كتب دلوقتى ودورات وكورسات .. كيف تخضع العنصر ح
وفى كتاب بيتباع لكبار رجال الاعمال اسمه كيف تجعل العنصر ح يسدد ديونك
وكورس غالى قوى اسمه كيف تجبر العنصر ح على
تعويض خسائرك
والكتب والكورسات دى كلها بتتلخص فى نقطتين
.....
خد قروض كبيرة
شغل ناس كتيرة
يالله معايا علشان نحفظهم
خد قروض كبيرة
شغل ناس كتيرة
واعمل اللى انت عاوزه بعد كده مش مشكله لان
العنصر ح مجبر يلم وراك
وبكده الموضوع اسهل مايكون .... والعنصر ح علنياته وسهل يقع فى المصيده مليون
مره وبمزاجه
هقولكم مين العنصر ح بس فى أخر الفيديو
خلينا فى موضوعنا
هتكلم الوكيل فى الاوفر برايس هيقولك مش تبعى
ده تبع الموزعين والمعارض
هتكلم الموزعين والمعارض هيقولك اشمعنى
الوكيل بيكسب الضعف احنا برضوا ورانا مصاريف ومسئوليات ..... وقروض وموظفين وعمال
... خدتلى بالك
تانى علشان ماننساش السر
خد قروض كبيرة
شغل ناس كتيرة
!!! فهمتوا السر
فى الآخر تحس اننا فريسه والناس دى بيتعازموا
على بعض مين يسرقنا اكثر من التانى وكل ده والعنصر ح نايم وبيشخر غصب عنه او
بمزاجه مش هتفرق
علشان كده انا قلتلكم مقاطعة كاملة مع ان ناس
كتير كتبولى حلول تانية لكن كلها معتمده على العنصر ح ..... ياجماعه ماتحرجوش العنصر ح
من الحلول دى عمل جمعية تعاونية لإستيراد السيارات من الخارج
او مخاطبة العنصر ح واقناعه بعمل كونترول
وغيرها حلول كتيرة كلها فى الآخر هتتعارض مع
سيادة العنصر ح
وانا بقول وبعيد يا حضرات المستشارين العنصر ح ارموا طوبتوا ... العنصر ح مافيش منه فايده وشغال فى اتجاه تانى خالص ربنا
يعينه على ما بلاه
وخلونا فى العنصر المؤثر على كل شيئ وهو
العنصر ن او الناس
الناس اللى بتتسرق ولو امتنعوا عن الشراء لا
الحيتان الكبيرة ولا الصغيرة ولا العنصر ح نفسه هيقدر يمنع او يعارض او يتحايل او
يقيد اى تصرف شخصى
لأن من الآخر الشراء ده رغبه شخصية من حضرتك
وحضرتك ماحدش يقدر يتحكم فيها ولو قررت او قررتى ماتشتريش مافيش قوه فى الأرض
هتجبركم
حتى لو طلع قرار بكرة الصبح بعدم ترخيص
سيارات موديل 2020 علشان نروح بالأمر نشترى 2021
برضوا مافيش فايده طالما العنصر ن ايد واحده هنمشى بعربياتنا ولو موديل الستينات
ومن غير رخص والدنيا كلها هتيجى تحت رجلينا وكل الحيتان هيهربوا على بره كالعاده علشان
العنصر ح يتصدم زى كل مره ويفوق ويبدأ يدور على فلوسه وفلوس المودعين اللى ضاعت ويحل
مشاكله
يعنى من الآخر الحل فى ايدك انت وايدك انتى
مافيش حد من بره هيحللنا مشاكلنا
احنا فى دوله حره فى سوق حر ماينفعش حد يتحكم
فى الاسعار خلاص الزمن ده خلص
والتسعير معتمد حاليا على العرض والطلب
ومن الآخر سبب كل الزيادات اللى احنا
شايفينها والاوفر برايس اللى مستغربينه قوى فى سوق السيارات السبب هو الطلب الكبير
على الشراء
قللوا الطلب هيرخص المعروض وهنبقا عملنا حاجه
واحده عدله فى حياتنا تنفع اولادنا والاجيال اللى جايه ويمكن ... تعدل المايل
الزيادات اللى تمت على السيارات فى مصر فى شهر اكتوبر
عموما الزيادات دى
من الف جنية لحد 55 الف جنية على 29 نوع عربية
الزيادات دى من الف جنية لحد 55
الف جنية على 29 نوع عربية
نبدأ بالانواع الصينى
شيرى تيجو 8 زادت 5 الاف وبقا سعر
الفئة الاولى 375 الف
شيرى تيجو 7 زادت 3 الاف جنية وبقا
سعر الفئة الاولى 290 الف
شيرى تيجو 3 زادت 1000 جنية وبقت
بسعر 245 الف
شيرى اريزو 5 زادت 2000 جنية واصبح
سعر الفئة الاولى المانيوال 180 الف
ام جى 5 زادت 5 الاف جنية وبقا سعر
الفئة الاولى 233 الف
ام جى زد اس 5 الاف جنية واصبح سعر
الفئة الاولى 270 الف جنية
ام جى اتش اس زادت 5 الاف جنية والفئة الاولى
بقت بسعر 417 الف
ههههههه نص مليون فى عربية
صينى والله حاجه تضحك
ام جى ار اكس 5 زادت 5 الاف جنية
واصبح سعر الفئة الاولى 337 الف جنية
هافال جوليون زادت 10 الاف وكل ده
من زيادة الطلب واصبح سعر الفئة الاولى منها 320 الف جنية
شيفرولية كابتيفا زادت 5 الاف جنية
وبقا سعر الفئة الاولى منها 345 الف جنية
شيفرولية اوبترا زادت 3500 جنية
وبقت الفة الاولى ب 205 الف
بي واى دى اف 3 زادت 3000 جنية
وبقت بسعر 191 الف
بى واى دى ال 3 زادت 5 الاف وبقا
سعر الفئة الاولى 220 الف جنية
هافال اتش 6 زادت 10 الاف جنية
واصبح سعر الفئة الاولى 385 الف جنية
كل ده فى الصينى
ندخل بقا على باقى انواع السيارات
هيونداى النترا سى ان 7 زادت 2000
جنية على ال7 فئات بتوعها اللى هما اصلا فئه واحده فى كل دول العالم بس جات هنا فى
مصر وفقست من الحر
الفئة الاولى بتاعتها سعرها بقا
325 الف جنية
هيونداى النترا اتش دى زادت 2000
جنية وبقا سعر الفئة الاولى منها 250 الف
هيونداى كريتا زاد سعرها 2000 جنية
وبقت الفئة الاولى ب 367 الف
هيونداى اكسنت ار بى زادت برضوا
2000 جنية واصبح سعر الفئة الاولى
224 الف جنية
شيفرولية ماليبو عدت البراميل وزاد
سعرها 55 الف جنيه وبقت الفئة الاولى بسعر 426 الف جنيه ..... يابلاش
اوبل جراند لاند زادت 5 الاف جنية
وبقا سعر الفئة الاولى 470 الف
اوبل كروس لاند زادت 5 الاف جنية
وبقا سعر الفئة الاولى 345 الف
لادا جرانتا من شركة الامل قالت
ليه مارفعش انا كمان وضيعت املنا وزودت 4 الاف جنية وبقا سعر الفئة الاولى المانيوال 163 الف جنية
سوزوكى التو اللى هى مش عربية اصلا
قالت اشمعنى انا وزودوها 2000 جنية علشان تسكت وبقا سعرها 124 الف جنية
سوزوكى اسبريسو اللى محدش عارف دى
ايه اصلا توكتوك ولا ميكروباص ولا اس يو فى زادت هى كمان 1000 جنية وبقت بسعر 149
الف
اوبل كورسا زادت 5 الاف جنية وبقت
الفئة الاولى منها بسعر 330 الف جنية
هيونداى توسان زادت 5 الاف جنية
وبقت الفئة الاولى منها بسعر 465 الف جنية
سوزوكى بالينو زادت 3 الاف وبقا
سعرها 259 الف جنية
سوزوكى سياز زادت 3 الاف وبقت ب
263 الف جنية
سوزوكى ارتيجا زادت 3 الاف وبقا
سعرها 293 الف
كل الزيادات دى ثابته لكن فى زيادات تانية
مستخبيه وهى الاوفر برايس ماحدش بيتكلم عنها وبتتفاجئ بيها وانت بتشترى
طيب حد يسألنى ليه العربيات المحترمة زى
المرسيدس والبي ام دبليو والفولفو والاودى والسكودا سعرهم مازادش فى الهوجه دى
ياترى مكسوفين يزودوا السعر
ولا يمكن ربنا هداهم وطلعوا يحجوا
ولا متأثروش بزيادة اسعار الشحن علشان
بيجيبوا العربيات سايقينها من المانيا او الشحن عندهم مجانى مثلا
الرد ان كل الانواع دى هتزود ماتقلقش بس
منتظرين يشوفوا تفاعل الناس ورد فعلهم مع الزيادات دى
كل الزيادات دى ياحضرات انتم السبب فيها لا
اسعار شحن ولا رقائق ولا اى عذر تانى
السبب فى زيادات اسعار السيارات السابقة
والحاليه والقادمة للأسف انتم ايها المصريون
لأن السوق المفتوح عباره عن عرض وطلب
وهى معادلة بياخدها العيال فى ابتدائى
علاقة طرديه بين الطلب والسعر او علاقة عكسيه
بين العرض والسعر
كل مايزيد الطلب على سلعه يزيد سعرها وكل ما
يقل الطلب عليها يقل سعرها
يعنى من الآخر هذا ما جنته ايديكم
لو سمحتم فعلوا المقاطعه لمصلحتكم لأن
بالمنظر ده
هيستمر السعر فى الصعود والكماليات وانظمة الامان فى الهبوط لحد ماترفعوا الكبوت
وتقطعوا اطراف الأخطبوط
وبالمناسبه العنصر ح اللى اتكلمت عنه فى
الفيديو هو حامد .. ابو فكر جامد
اشوفكم على خير
سلام