السلام عليكم ورحمة الله وبركاته
استكمالا لموضوعنا عربية اوتوماتيك بتكييف بسعر 50 الف
جنية
ده الجزء الثانى
عربيات اوتوماتيك بتكييف بسعر من 50 الى 70 الف جنية
وإن شاء الله هنكمل مع بعض باقى الأجزاء لحد ماالاقى التفاعل قل مع الفيديوهات
وساعتها هعرف انى
وصلت للجزء الأخير
لو عايز تشوف
الجزء الاول عربيات اوتوماتيك بتكييف بسعر 50 الف جنية
هيظهر دلوقتى فى
علامة الآى فوق الفيديو
فى فيديو النهارده
جبتلكم كل العربيات الاوتوماتيك وبتكييف من اسواق السيارات والمعارض واخر
تحديث سعر لشهر نوفمبر 2021
كل عربية هقولكم
سعرها من كام ل كام والفرق ده هو فرق الحالة
ونصيحة بقولها
دايما اشترى عربية حالتها محترمة وبلاش تسترخص
الحاله هى اهم
حاجه اهم كمان من سنة الصنع
بنشوف عربيات
موديل 2000 افضل من موديل 2006
واتعب وانت بتشترى علشان ماتتعبش بعد كده واكشف على العربية فى مركز صيانه
او محطة بنزين
ولازم تكون
العربية رخصتها سارية ... اوعى تجيب عربية رخصتها منتهية ولو ببلاش
واشترى العربية بعقد مسجل شهر عقارى والدفع على رأس العقد فى مقر الشهر
العقارى
ولو دفعت عربون وكتبت عقد ابتدائى خلى العربون مبلغ رمزى واكتب العربون فى
العقد الإبتدائى ان
شالله يكون 100 جنية
اللهم بلغت ....
اللهم فاشهد
كل عربية هجيبها
هقولكم شوية معلومات عنها ومميزاتها وعيوبها
وفى نهاية الفيديو
زى ماتعودنا هجيبلكم الزتونة
احسن عربيات بالترتيب
من بين كل العربيات اللى ظهرت فى الفيديو
الفيديو ده هيكون
على جزئين علشان عدد العربيات كبير ومش عايز اطول عليكم
وده الجزء الأول
من الفئة السعرية من 50 الى 70 الف وهيكون
فيه 10 عربيات
بلاش نطول المقدمه
وندخل فى الموضوع علطول
عربيات اتوماتيك
بتكييف بسعر من 50 الى 70 الف جنية
اول
عربية معانا
كيا سيفيا موديل
من 1997 حتى 2001 بسعر من 55 الى 70 الف
سعة المحرك:: 1600 سى سى
نوع الناقل: أتوماتيك
بلد الصنع: كوريا
القوة الحصانية: 108
مميزات كيا سيفيا
ناقل الحركة قوي وآدائه متميز في
النقل بين السرعات.
ثباتها على الأرض جيد جداً وبتتحمل السفر.
العفشة متينة وبتتحمل السير فى الطرق المكسرة .
العربية واسعه وفيها مساحات تخزين كتيرة والشنطه السعه اللترية بتاعتها 300
لتر.
التكييف كفائته عاليه
مساحات الرؤية جيدة جداً
عيوب كيا سيفيا
العربية منخفضه وقريبة من الارض وده بيخليها تحك فى المطبات الكبيرة
تانى
عربية
كيا سبيكترا موديل
2004 بسعر من 60 الى 70 الف
الكوري بتاعتها تحفة لكن التقفيل المصري فيها مشاكل وكانت بتتقفل في مصنع
العربية الامريكية بتاع جيب شيروكي
مميزاتها وعيوبها زى كيا سيفيا بالضبط
لكن مشكلتها اللى ملهاش حل ان فى بعض قطع الغيار المهمه ناقصه
ثالث
عربية
كيا شوما موديل
1998 و 1999 بسعر من 55 الى 70 الف
عربية ركوبه واسعه وموتورها قوى وسحبها مافيش زيه والفتيس الاوتوماتيك نقلاته
سلسه ومتجاوب مع الموتور
لكن مشكلتها فى
السخونه وفى نقص قطع الغيار للأسف
انا شايف ان الشوما عربية كويسة بس قطع الغيار مهمة جداً وماينفعش تقول اشتريها
وربنا يسهل ويمكن مشكلة قطع الغيار تتحل
للأسف انا شايف ان لما اليومين دول قطع الغيار قليلة واجزاء كتير من الفايبر
الداخلى والخارجى مش موجود هيحصل ايه بعد سنه أو اثنين او ثلاثة والاتجاه العام
حاليا لتقليل الاستيراد وتوفير العملة الصعبة.
عموما دى وجهة نظر وكان لازم اقولها للأمانه
رابع نوع معانا وفى حدود سعرنا
الفخامه والعراقه والصدارة الحائزة على لقب الخنزيرة والتمساحه والشبح والزلموكة
عربية الرؤساء والزعماء من عائله ولاد الاصول مرسيدس بنز
وهنتكلم
عن 5 انواع مرسيدس بالسعر بتاعنا
مرسيدس إي 200 موديل 1977 حتى1983 بسعر من 55 الى 70 الف
مرسيدس إيي 280 موديل 1984 بسعر من 60 الى 70 الف
مرسيدس اس 280
موديل من1981 حتى 1983 بسعر من 55 الى 70 الف
مرسيدس اس إي ال
280 موديل من 1982 حتى 1988 بسعر من 60 الى 70 الف
مرسيدس إس إي إل
300 موديل 1989 بسعر من 65 الى 70 الف
حدث ولاحرج
المرسيدس ولو عدا
عليها 100 سنه بتفضل برونقها وهيبتها المعروفة
بالنسبه للمميزات كتير جدا ومش عايز اطول عليكم بس كفايه اقولكم ان قطع غيارها
متوفرة ومش غالية
بالنسبه للعيوب
هو عيب واحد ان
استهلاكها عالى فى البنزين
ودى الضريبة اللى
بيدفعها محبى الفخامه
وعلى
رأى المثل اطبخى ياجاريه ... كلف ياسيدى
خامس عربية معانا فى حدود السعر
عائلة الوحش الكورى
هيونداى ومنها 3 موديلات
هيونداى اكسنت
موديل من 1998 حتى2006 بسعر من 55 الى 65 الف
هيونداى النترا
موديل من 1994 حتى 1996 بسعر من 55 الى 70
الف
هيونداى سوناتا
موديل 2001 و 2002 بسعر من 60 الى 70 الف
مميزاتها
اعتمادية جدا وبتتحمل الطرق المصرية وقطع غيارها متوفرة واسعارها كويسة
ماعدا الهيونداى سوناتا قطع غيارها قليلة وغاليه
محركها قوى واعطاله قليلة والفتيس الاوتوماتيك ممتاز وتكييفها كويس جدا و العفشة
قويه ومعمره وحرارة الموتور زى اليابانى
تقريبا مش بتسخن
عيوبها انها قريبة من الارض ، صاجها ضعيف ، عفشتها ناشفة ، وصوت الموتور
عالى.
سادس نوع معانا
العربية الشعبية فى مصر من عائلة الدايو
وهنستعرض موديلات منها فى حدود سعرنا
دايو ليجانزا
موديل من 1998 حتى 2003 بسعر من60 الى 70 الف
دايو نوبيرا 1 موديل
من 1997 حتى2002 بسعر من 55 الى 70 الف
دايو نوبيرا 2
موديل 2000 حتى 2005 بسعر من 55 الى 70
الف
دايو لانوس موديل
من 1999 حتى 2002 بسعر من 60 الى 70 الف
طيب مبدئيا كده الدايو ليجانزا هى اسد الدايو او مرسيدس الدايو زى مابيسموها عربية
حجمها كبير
وموتورها 2000 سى سى موتور قوى
عاليه عن الارض وواسعه جدا العربية كلها مميزات وفيها كماليات مش موجوده فى
عربيات موديل 2021
يعيبها استهلاك
البنزين العالى وعدم انتشار قطع الغيار
انت هتلاقى قطع
الغيار آه ... بس هتلف عليها شويه
اما بالنسبه
للنوبيرا 1 و 2 واللانوس قطع غيارهم منتشرة وسعرها رخيص
عربيات الدايو عموما سهلة فى صيانتها وكل الميكانيكية بيعرفوا يشتغلوا فيها عربيات
حموله واعتمادية
واعطالها قليلة
عيب اللانوس والنوبيرا هو انخفاضهم مع التحميل وبيحكوا فى المطبات العاليه فى
منطقة الوسط
والخلف يعنى الشكمان هو المتضرر
بس فى نفس الوقت انخفاضها من الارض ده بيديها ثبات على السرعات العالية وفى
الملفات
سابع نوع معانا
الوحش الالمانى اوبل
ومتوفر
بالسعر ده نوعين من عائلة الاوبل
اوبل فيكترا موديل من 1994 حتى 1999 بسعر من 55 الى 70 الف
اوبل كورسا هتشباك
موديل 2000 بسعر يبدأ من 70 الف جنية
الاوبل فيكترا منها ال 1600 سى سى وال 2000 سى سى
وال 2000 سى سى اقوى وقدرة المحرك ده 100 حصان وعزمه 151 نيوتن متر
16 فالف
تكييفها مش ضعيف انما هو بيتاثر بحراره الفرن نظرا لقرب مواسير التكييف منه
علشان كده الياباني هتحس ان تكييفه سريع لان مواسيره بتلف من فوق الموتور من
الاجناب..
-العربيه دي مفيش فيها اي مشاكل وقطع غيارها غالية شوية لكن معمره ومتوفره
وكمان تقفيلها الماني قبل
منصور اوبل ما يشتغل في تجميعها ويحط التاتش بتاعه
العربيه عفشتها بتستحمل جدا سفينه في السفر وموفره في البنزين لو الموتور مضبوط
استهلاكها للوقود 5.9 لتر لكل 100 كيلو متر.
العربية دى تم تصنيفها من بين العربيات الاقتصادية في استهلاك الوقود.
خزان الوقود 60 لتر ودى كميه كويسه جدا مقارنة مع استهلاك الوقود ومعنى كده انك
ممكن تمشى 1000 كيلومتر بتفويله واحده فى طريق مافيهوش محطات بنزين
التسارع فيها محترم بتقطع مسافة
100 كيلو متر في 13 ثانية.
الاوبل فيكترا واسعه جدا والشنطة الخلفية 500 لتر
بس نصيحة لو بتشتريها متسترخصش فى تمنها لو لقيت واحده نظيفه
لان لو غير كده هتتعبك جدا
للاسف عيب الالمانى لو فتح بقه بيبقى خراب بيوت وعن تجربه
اما الاوبل كورسا 2000 مشكلتها الاساسية الحساسات بتاعتها و دة اللى مخلى
سوقها واقع بعكس موديلات 95-96-97
العربية واسعة جداً تقريباً في نفس وسع الإكسل لأن ليهم نفس المقاسات مع عدا طول
الشنطة انما الصالون واحد في الأبعاد .
وزنها : ٨٧٥ كيلوجرام (يعني خفيفة إلى حد ما عشان كدة بتجري كويس )
هتلاقى موديلات 95 و 96 و 97 بمحركات 1200 سى سى
وموديلات 98 و 99 و 2000 بمحركات 1000 سى سى
ولو عايز تعرف تفاصيل اكثر عن الاوبل كورسا هتلاقي مقارنة بين الموديلين ال
1000 سى سى وال 1200 سى سى بالتفصيل وهيظهر الفيديو حالا فى علامة الآى
فوق
الفيديو ده
ثامن عربية معانا
سوزوكى سويفت
موديل من 1996 حتى 1999 بسعر من 60 الى 70 الف
عربية ممتازة وموفرة
مميزتها
الموتور ممتاز وصيانتة سهلة وقطع غيارها رخيصة واعادة البيع ممتازة العربية
ناعمة والدركسيون رغم انة مش بور بس خفيف جدا
الوسع الداخلى للصالون ممتاز على الرغم انه من برة يبان صغير
عيوبها ان العفشة بتحتاج صيانة ومتابعة والعربية بتعوم على السرعات العالية
وللأسف البرومة بتمسك فى السقف بتاعها لأن السقف غير معالج ضد الصداء
وصاجها خفيف
تاسع
عربية معانا
دايهاتسو
اليابانى وهستعرض معاكم موديلين فى حدود سعرنا
دايهاتسو تريوس
موديل 1998 و 1999 بسعر من 60 الى 70 الف
دايهاتسو سيريون
موديل 1999 و 2000 بسعر من 60 الى 70 الف
التريوس مميزاتها فقط انها صناعة يابانية بالكامل لكن للأسف عيوبها اكثر من
مميزاتها
لانها اولا صغيرة من ناحية العرض وتعتبر ضيقة بالنسبة لمسمي سيارة جيب حجم
صغير
ثانيا خطيرة جدا في الملفات علي السرعة العالية لانها مرتفعة والات الجر الخلفي علي
كورونا وده عيب فيها لان عيوب الكورونا مع سيارة عالية وعرضها صغير بتعرضها
للانقلاب بسهولة
ثالثا موتورها مش قوي تناسبا مع حجمها ووزنها
هي موتور 1500 سي سي وقوتها الحصانيه مش عالية وده يعيبها طبعا لو كانت
1600 والموتور 2 كامة كانت حققت معادلة محترمة وكانت هاتبقي قوة حصانية
اعلى من السوزوكي فيتارا
وكمان محتاجة تعديل في الات الجر الخلفيه كان مفروض تبقي كبالن خلفية زي
البيجو 504 جي ال لان الكبالن الخلفية بتكون تعليق منفرد وبتتحرك كل جهة بشكل
مستقل وده يديها مرونة وتوازن للبودي وثبات اكتر بس الكلام ده الشركة عدلته فى
الموديلات الحديثة من سنة 2007
رابعا قطع غيارها غالية وقليلة ومش متوفرة عند كل تجار قطع الغيار وفى اجزاء مش
هتلاقيها من العفشه
والفيبر الداخلى والخارجى
اما بالنسبة
لدايهاتسو سيريون موديل 1999
العربية نزلت ب3 فئات فى مصر
فئة 1000 سى سى بمحرك مكون م 4 سليندرات يولد 71 حصان عند 6000 RBM
واقصى عزم له (94/3600 Nm/RPM)
السرعة القصوى له 160 كم/س وتسارع من 0 الى 100 كم/س فى 13.9 ثانية
اما المحرك 1300 سى سى يولد 87 حصان واقصى عزم له
(120/3200 Nm/RPM)
والسرعة القصوى له 170 كم/س والتسارع من 0 الى 100 كم/س فى 11.3 ثانية
وفئة 1500 سى سى يولد 102 حصان وعزم 132/4400 نيوتن متر
ميزات السيريون
حجمها صغير
عفشتها قوية
وتستحمل الشوارع المكسرة
ارتفاعها عن الارض 15 سم وده قليل بس بيتضبط بعد تعديل المساعدين
اقتصادية فى استهلاك البنزين
عيوبها
ان قطع غيارها غاليه مش فاهم ليه
وكمان قطع الغيار قليلة وغير منتشرة
سحبها ضعيف مش زى اى عربية يعنى بتاخد وقتها علشان تجمع بس بعد كدة اوعى
وشك
العربية ثابته على الارض لحد ال 140 كم/س
بعد كدة البقاء لله
عاشر
عربية معانا والأخيرة فى الجزء الأول
بولو موديل من 1999
حتى 2004 بسعر من 55 الى 70 الف
مميزاتها
عربية اقتصادية جدا فى استهلاك البنزين موتورها 1000 سى سى علي الطرق
المفتوحه بتعمل 350 كيلو في الصفيحة و في
الزحمة 300 كيلو في الصفيحة
في السحب ولا الفيرنا ام 1600 سي سي وهتجيب ال 180 كم فى اقل وقت بس
الفرق ان البولو هتعرف توقفها اما الفيرنا
الى الانهائية ومابعدها
قطع غيارها متوفرة نوعا ما و اسعارها معقولة و الاهم انها معمرة جدا القطع الاصلية
طبعا
حجمها الخارجى صغير ودى ميزة
مساحتها الداخلية صغيرة لكنها
مريحة
ثباتها محترم على الطريق
عيوبها
الموتور ال 1000 سى سى ضعيف و خصوصا مع التكييف
صعب تلاقى ميكانيكى او كهربائى فاهم فيها واى حد تانى هتروحله هتتمنى انه يقولك
ماعرفش بدل مايمد ايده ويشتغل ويخرب
عموما وانت داخل على الميكانيكى قوله لو حاجه باظت هدفعك ثمنها وانا بقبل العوض
عادى ماعنديش مشكلة
وساعتها لو اقتنع
بكلامك وماشتغلش فيها قبل كده هيقولك ماعرفش
دى كانت آخر عربية معانا فى الجزء الأول وهيبقا فى جزء تانى إن شاء الله علشان
فاضل 9عربيات لسه
ماتكلمناش عنهم وسعرهم من 50 الى 70 الف
اشترك فى القناة وفعل ذر الجرس علشان يجيلك اشعار وتعرف لما ينزل الجزء الثانى
وباقى اجزاء عربيات الاوتوماتيك
بتكييف وباقى الفيديوهات
اللى بنزلها كل
اسبوع
طيب
افضل عربيات اوتوماتيك بتكييف بسعر من 50 الى 70 الف من اللى استعرضناهم فى
الفيديو بالترتيب
من الافضل للأقل
هيونداى اكسنت موديل من 1998 حتى2006 بسعر من 55 الى 65 الف
دايو نوبيرا 2 موديل 2000 حتى 2005
بسعر من 55 الى 70 الف
هيونداى النترا موديل من 1994 حتى 1996
بسعر من 55 الى 70 الف
كيا سيفيا موديل من 1997 حتى 2001 بسعر من 55 الى 70 الف
فى النهاية اتمنى
يكون الفيديو مفيد
اشوفكم على خير
سلام