فضح مكاسب التوكيلات فى مصر وشرح طريقة حساب الجمارك والضرائب على السيارات #والله_مانا_شاري

 

فضح مكاسب التوكيلات فى مصر وشرح طريقة حساب الجمارك والضرائب على السيارات #والله_مانا_شاري

السلام عليكم ورحمة الله وبركاته
ده الفيديو السادس وللأسف التفاعل على موضوع المقاطعة قليل جدا سواء على الفيديوهات او جروب المقاطعة
الخمس فيديوهات اللى فاتوا والمقارنات اللى عملناها بين اسعار السيارات فى مصر واسعارها فى الإمارات والسعودية  وجروب المقاطعة اللى بقالى شهرين بدعوا الناس يشتركوا فيه ويفعلوا المقاطعة ويدخلوا ويعلقوا ويتفاعلوا
كل الفيديوهات دى ودعوات المقاطعة  مني ومن غيرى التفاعل عليها قليل جدا
من الواضح ان المفروض  قبل ماكنا نكلم الناس فى المقاطعة
كان لازم الناس تتغير الاول او نحاول نشيل السلبية اللى بتزيد يوم بعد يوم  قبل ماننتظر منهم تصرفات ايجابية
مافيش مشكله
المثل بيقول اللى ياكل على ضرسه ينفع نفسه

انا مجرد بقول النصيحه اللى عايز ياخد بيها اهلا وسهلا مش عايز براحته
 فيديو النهاردة  شرح لطريقة حساب الجمارك والضرائب على سيارات الركوب فى مصر
علشان ناس كتير كتبوا فى الكومنتات ان سبب زيادة اسعار السيارات فى مصر هى الجمارك والضرايب
فى الفيديو ده انا هجيبلكم اسعار الجمارك والضرايب المصرية على سيارات الركوب من الموقع الرسمي لمصلحة الجمارك المصرية

وبعد ماتعرفوا القوانين والنسب المئوية للضرايب اتفرجوا على الفيديو اللى هيظهر هنا

وهو مقارنة بين اسعار العربيات فى مصر وفى السعودية اللى الضرايب فيها اعلى مننا
يعنى مثلا فى اول سعه لترية من 1000 لحد 1600 سى سى ضرايبنا  فى مصر للعربيات الاوروبي  18%  وضرايب السعودية 22%  ورغم كده لما هتشوفوا المقارنة بين اسعار العربيات  فى مصر والسعودية هتلاقوا العربية عندنا فى مصر زياده بمئات الآلاف عن السعودية على حسب سعرها طبعا

والفيديو التانى هيظهر دلوقتى هنا

 وهو مقارنة بين اسعار العربيات  فى مصر وفى الإمارات وبرضوا نفس الكلام الضرايب هنا فى مصر اعلى شويه عن الإمارات

وبالرغم من كل ده الاسعار فى مصر اللى هى بلد فقيرة وشعب فقير زيادة بمئات الآلاف
انا كنت ناوى اعمل الفيديو ده مقارنة بين مجموعة كبيرة من العربيات والمقارنة كانت هتبقا بين اسعار العربيات فى مصر وسعرها فى بلدها وكنت هزود عليه الضرايب والشحن والناولون
واثبتلكم انها فى مصر ضعف سعرها بره والسبب مش الضرايب ولا الجمارك ولا حتى الشحن
لكن السبب الحقيقى للزياده هى جشع التجار وثقافة مكسب الضعف
لكن بصراحه بعد ماشوفت التفاعل السيئ على الفيديوهات اللى فاتت وعلى جروب المقاطعة 
وده بالنسبالى كان دليل ان الناس مش محتاجين مقاطعة او ان لسه بدرى قوى علينا فى مصر اننا نفهم ثقافة المقاطعة وفوايدها
عموما فى الحالتين انا لو تعبت زي لو ماتعبتش ... يبقا الافضل اوفر التعب والمجهود واكمل فى طريقى عادى

فيديوهات المقاطعه موجودة عندكم فى القناة للى عايز يرجعلها 

وجروب المقاطعه # والله_مانا_شاري زى ماهو اللى عاوز يشترك براحته واللى مش عايز برضوا براحته

طيب انا كنت ليه هعمل الفيديو عن الاستيراد من دول الاتحاد الاوروبى ؟

ليه مش اى دوله تانية؟

لسبب واحد بس وهو ان كل الناس مايعرفوش غير اتفاقية الزيرو جمارك بين مصر ودول الإتحاد الأوربى

لكن طبعا فى اتفاقيات تانية كثيرة جدا مع دول غير اوروبا ومنها دول زى الاردن والعراق وتركيا ودول اللافتا ودى 9 دول زى سويسرا والنرويج وايسلندا وليختشتاين والاستيراد من هناك زيرو جمارك برضوا
وفى اتفاقية مع انجلترا  زيرو جمارك
واتفاقية تانية مع دول تجمع الميركسور زى الارجنتين والبرازيل وبرجواى واورجواى ودى بنسبة جمارك 50%
 
واتفاقية التجارة الحره مع كل دول قارة افريقيا ونسبتها زيرو جمارك
هتقولى وهى افريقيا بتصنع عربيات

ايوا يافندم بتصنع عربيات بأسماء شركات عالمية ونسبة المكون المحلى من المغرب وجنوب افريقيا وزامبيا وصلت حاليا 95% يعنى كل اللى بيستوردوه من اوروبا 5 % لدرجة ان انتاجهم وصل 1.2 مليون عربية فى سنة 2020  بس

ومنهم انواع كتيرة زى رينو وفولكس فاجن وبيجو وهيونداي وتويوتا ووكلاء مصر بيستوردوا من دول افريقيا علشان يستفيدو لوحدهم من الزيرو جمارك بتاع اتفاقية افريقيا

ولسه فى مصانع كتير بتفتح فى افريقيا زى سيات ابيزا وسكودا اوكتافيا اللى هتفتح قريب فى الجزائر

ده غير الزيرو جمارك وزيرو ضرايب على العربيات الكهربية من اى دولة فى العالم 
وبالرغم من ده كله هتلاقى العربيات الكهرباء بتتباع فى مصر بضعف السعر مع ان كل اللى صرفه الوكيل هو الشحن بس
وفى اتفاقية مع كل دول العالم برضوا فى دخول سيارات بدون جمارك ولا ضرايب لأصحاب العزيمة 
ومع انك هتلاقي العربيات المستعملة  فى بلدها بملاليم

بس لما هتيجى تشتريها من بورسعيد هتلاقيها موفره 20 او 30 الف بس عن المباعه فى سوق المستعمل
يعنى حتى العربيات اللى عليها حظر وظروفها صعبه التجار ماعتقوهاش وبيكسبوا فيها الضعف

المشكلة ياحضرات فى التجار اللى شايفين ان اى نشاط لازم يكون مكسبه على الاقل الضعف علشان يدخلوا فيه ولازم دورة رأس المال تتضاعف كل سنه
هي دى التجارة اللى بيفهمها الناس دى واللى احنا السبب الاساسى فيها

وده اللى بيخلى اى رجل اعمال عايز يستثمر فى مصر بعد مايدرس السوق كويس مش بيفكر فى الصناعات الثقيلة لكن علطول دماغه بتروح على الشيبسى والبوزو والفشار والفرنشايز لأى براند

ومن ضمن الاتفاقيات اللى عاملاها مصر مع العالم
الزيرو جمارك على استيراد  اجزاء السيارات من كل دول العالم بغرض تجميعها فى مصر والكلام ده اتعمل اصلا علشان تشجيع الصناعة

وعلشان يكون المنتج المصرى اقل سعرا ويقدر ينافس
انما للأسف الاتفاقيات دى اتفهمت غلط من الوكلاء وبقا الغرض منها زيادة المكاسب وتقليل الكماليات وانظمة الامان ومضاعفة السعر

فمثلا الجمارك على هياكل السيارات ومحركاتها والجير بوكس (ناقل الحركة) نسبتها 2% رسوم جمركية
 
المحاور الأمامية والخلفية تخضع الى نسبة جمركية 5%، والأجزاء الكهربائية  برضوا  تخضع لنسبة  5%

يعنى من الاخر قيمة الأجزاء الحقيقية للعربية اللى بتتجمع فى مصر، جماركها ما بين 2% الى 5%

ده غير ان جزء كبير من الاجزاء المستوردة بغرض التصنيع  بيتباع لتجار قطع الغيار بمكاسب خياليه

يعنى مثلا استورد اجزاء 1000 عربية بجمارك 5% وابيع نصهم لتجار قطع الغيار بمكسب 3 اضعاف وبالشكل ده انا جبت ثمن ال 1000 عربية بمكسبهم قبل مااجمع اى حاجه

فاهمين قصدى؟

يعنى الناس اللى  فاكرين ان الجمارك والضرايب والشحن هما اللى مزودين اسعار كل حاجه فى مصر

لا يافندم

السبب هو جشع التجار بس

وعدم اقتناعهم بالمكسب العادل واقل مكسب يرضيهم هو الضعف والضعفين والعشر اضعاف فى بعض السلع

وبالنسبة للعربيات علشان كلامنا يبقا دقيق ممكن نقول ان الجمارك والضرائب زياده شويه على العربيات  اللى فوق ال2000 سي سي  بس برضوا مش النسبه الاوفر اللى تزود سعر العربية الضعف  
واحنا فى كل الاحوال مابنشتريش سعه لترية عالية علشان اسعار البنزين غاليه فى مصر لكن اغلب عربياتنا من 1000 الى 1600 سى سى يعنى زى ماشايفين فى الجدول على الوارد الاوروبى مثلا الجمارك صفر
والضريبة
من 1000 الى 1600 سي سي  18% ضريبة
ومن 1600 الى 1999 سي سي 34% ضريبة
واعلى من 2000 سى سى 52.5% ضريبة

عموما موضوع الاستيراد الفردى هشرح الفرق بينه وبين استيراد الوكيل للى عايز يفهم الدنيا ماشيه ازاى
لو حاولت حضرتك تستورد عربية هتشتريها من بلدها بسعر اعلى من اللى بيشترى بيه الوكيل
وخصوصا ان الوكيل بياخد مجموعة من الخصومات حضرتك لو بتستورد عربية واحده مش هتاخدها
اول  خصم ماحدش يعرف قيمته قد ايه ...   بس سببه معروف طبعا

وهو ان ...  لما حضرتك تروح تشترى قطعه واحده  زى ما الناس بتستورد غير لما تشترى 100 غير لما تشترى 1000  غير 10000 غير لما تاخد الوكاله بتاعة نوع عربية معين وهكذا

يعنى زي ما كل الناس عارفين كل ماتشترى كمية اكبر السعر بيبقا اقل
وطبعا  الوكيل مش بيقول السعر اللى اشترى بيه وبيعتبر الموضوع  ده من اسرار المهنه

الخصم التانى المهم اللى بيحصل عليه الوكيل وحضرتك لأ
ان العربية اللى بتشتريها من اى دوله  بيحطوا عليها ضريبة البلد وبيعملوا كده على اساس ان حضرتك هتشتريها علشان تستخدمها هناك فى بلدها

اما فى حالة انك هتشحنها لبلد تانية ... زى مصر مثلا
بعد ما الشحن يتم وتدخل العربية المينا  فى مصر وتخلص اجراءاتها الجمركية بيترد لك نسبة 19% من ثمنها وده لانك ماستخدمتهاش هناك

والنسبه دى اللى هى الضريبه اللى خصمتها الدولة اللى اشتريت منها

يعنى لو بحثت دلوقتى على اسعار العربيات الزيرو فى المانيا مثلا
هتلاقيها زياده 19% ضريبه وحوالى 3% ضرايب تانية عندهم بره زى ضريبه استخدام طريق وغيرها وطبعا الكلام ده مابيحصلش مع الوكيل لان العقد بينه وبين المصنع عقد استيراد ووكاله

الخصم الثالث اللى بيشفطوا الوكيل واللى مش بيحصل غير فى مصر

ان العربية اللى بيجيبها الوكيل المصرى  بيفصلها  زى الترزى كده
يعنى بيشيل منها كماليات وانظمة امان وحاجات تانية كتيرة جدا علشان يوفر اكثر ويقلل السعر وطبعا الكلام ده كله اتفاقات مابين المصنع والوكيل احنا برضوا مانعرفش عنها اى حاجه واعتقد مصر كمان ماتعرفش

انما امتى بنتأكد من الكلام ده ... لما بنستورد عربية ونقارنها باللى بتتباع في مصر من كتر الكماليات والرفاهيه وانظمة الامان اللى فى المستوردة بتحس انهم نوعين مختلفين دى مثلا فيات 128 ودى بي ام دبليواكس 7

الخصم الرابع وهو الشحن والناولون

فى حالة ان حضرتك هتشترى عربية واحده بس الشحن هيبقا رقم كبير وهتاخد كونتينر لوحدك يعنى مايعادل حاليا 35 الف جنية على العربية الواحده

فى حين انك لو اشتريت 4 عربيات هتحطهم فى نفس الكونتينر بنفس سعر الشحن
اما لو عندك موظفين زى التوكيلات هتبعتهم يسافروا مع العربيات  وهتوفر الكونتينر وتشحنها سطح مركب والرجاله بتوعك يكونوا مع العربيات على المركب وتبقا وفرت 60% من مصاريف الشحن

الخصم الخامس فى التأمين اللى بيندفع على عربياتك اللى على المركب

كل ماتزود العدد يقل التأمين
ورغم كل ده واللى هيفهم كلامى كويس الناس اللى جربوا الاستيراد
رغم كل الخصومات دى لو انت استوردت عربية واحده ومااخدتش اى خصم من الخصومات اللى فاتت

برضوا عربيتك بعد المصاريف والضرايب هتلاقى سعرها اقل بمئات الآلاف من اللى بتتباع عند الوكيل والعربية هتيجى بخيرها من غير مايتشال منها حاجه
وده استعراض للاتفاقيات اللى اتكلمنا عنها من موقع وزارة التجارة

يعنى من الآخر مش الجمارك ولا الضرايب هى اللى مزوده اسعار السيارات فى مصر والدولة بريئة من كل الزيادات دى
لكن للاسف الدولة لوحدها مش هتقدر تتحكم فى اسعار اى سلعة لاننا فى سوق حر
وده اللى كان المفروض يبقا دورنا كمواطنين مش عايزين احتكار ولا سرقة زى اى مواطنين محترمين فى اى دولة فى العالم

كل اللى كان مطلوب اى سلعه شايف انها غالية بلاش تشتريها

يعنى من الآخر الاسعار فى مصرالمفروض تكون اقل النص لو الناس اتحدوا وقاطعوا

مقاطعة كاملة

بس للأسف ماحدش بيقاطع ولا حد بيهتم والناس بيحجزوا وموافقين يستلموا بعد 10 شهور وكمان بيدفعوا اوفربرايس

كل ده لاننا بعافيه اليومين دول وماعندناش عزم وفالحين فى الهيافه والخيابه
وكبيرنا نشتكى ونقول فى اوروبا والدول المتقدمه بيعملوا كذا وكذا

براحتكم ...

تعالوا نشوف قوانين مصلحة الجمارك من موقعها الرسمى ونتكلم عن بعض المصطلحات الخاصة بالإستيراد علشان نفهم الدنيا ماشيه ازاى

اولا لازم نعرف 3 مصطلحات مهمين بيلخصوا عملية الاستيراد وبيتكتبوا فى العقد اللى بينك وبين البائع فى اى دولة

وهما
CIF - C&F - FOB

الثلاث مصطلحات دول هما الإستيراد

ايه معنى ال CIF

معناها ان حضرتك اشتريت العربية وهتتشحن وهيتأمن عليها اثناء الشحن لحد ماتوصلك بلدك يعنى السعر اللى هتدفعه شامل مصاريف الشحن والناولون والتأمين وكل حاجه

يعنى من الأخر زى مابيقولوا فاير اند فورجيت

هتشترى العربية وهتوصلك بالسلامة لحد المينا فى بلدك اللى اتفقت عليها مع البائع وهيبقا فاضل انك تدفع ضرايبها وتروح المرور ترخصها وشكرا

لكن طبعا السعر بيبقا اعلى لانه شامل كل حاجه

طيب وايه معنى C&F

معناها ان العربية هتتشحن على حساب البائع وحضرتك هتستلمها فى بلدك لكن بدون تأمين يعنى لو حصلها حاجه على المركب او وهى بتتفرغ عندك فى بلدك البائع مالوش دعوه هو حطهالك على المركب ودفع مصاريف الشحن وانتهينا

ودى طبعا بتبقا اوفر للشارى صحيح لكن فيها خطورة ومجازفة

النوع الثالث وهو ال FOB

ومعناه ان البائع هيوصلك عربيتك لحد المركب عنده هناك وحضرتك عليك الباقى من الاتفاق مع شركة الشحن والتأمين والتفريغ

والنوع ده من الاستيراد بيكون السعر فيه هو الارخص وده اللى بيعمله كل الوكلاء فى مصر

ومش هتفرق معاهم عربية اتخبطت او وقعت وهى بتتشحن او وهى بتتفرغ لان كل ده هيتصلح ويتباع لحضرتك عادى خالص وماحدش هياخد باله

والكلام ده حصل كتير جدا
وناس كتير اكتشفوا ان العربية الزيرو واخده معجون او مغيرة نص بسبب حوادث الشحن والتفريغ والنقل الداخلى

دى هى ال 3 طرق للإستيراد

اما بالنسبة لطرق الشحن 

هتلاقى شحن فى كونتينر

 وده الاغلى وزى ماقلتلكم سعره 35 الف جنية حاليا للكونتينر من امريكا لمصر وكان 20 الف جنية قبل ازمة نقص الحاويات اللى حصلت بسبب الوباء

وبيختلف اختلافات بسيطة من دولة للتانية ومن شركة للتانية وحجم العربية بمعنى هتحط كام عربية فى الكونتينر الواحد وده اللى بيعمله كل الناس لما بيستوردوا عربية شخصية من اى دولة فى العالم

النوع التانى من الشحن هو 

الشحن سطح مركب وطبعا ده فيه خطورة وخسائر بس هو ده النوع اللى بيعملوه المستوردين والوكلاء

علشان كده اللى يقولك السعر زاد بسبب الشحن قوله الازمة العالمية حاليا فى الحاويات بس لان عددها قليل وسعر الشحن زاد للحاويات بس وخصوصا الحاويات المكيفة اللى بتنقل الخضار والفاكهة واللحوم وحضراتكم طول عمركم بتشحنوا سطح مركب يعنى ماتستهبلوش

هو اى مصلحة هتزود الاسعار راكبين فيها حتى لو مش بتأثر عليكم
التأمين برضوا انواع فى منه جزئى وكلى وفى تأمين شامل وده اللى اغلب الناس اللى بتستورد عربيات شخصية بيعملوه بس طبعا بتكون تكلفته اعلى شويه

فى نهاية الفيديو

عايز اقولكم

المقاطعه الكاملة هى الطريقة الوحيده اللى تقدر بيها تغير الواقع وتقلل سعر اى سلعه غاليه عربيات او غيره

المقاطعه هتجيبلك حقك وهتغير مستقبل تجارة السيارات فى مصر اللى بقاله اكثر من 100 سنه من سيئ الى اسوأ

المقاطعه فى اولها صعبه وهتسبب زياده فى اسعار العربيات المستعملة  لكن لو المقاطعة كاملة خلال سنه واحده بس كل العربيات فى مصر مستعمل وجديد سعرها هيقل النص

وبالنسبة للمستعمل هنبقا زى كل دول العالم كل ما العربية تقدم سعرها يقل مش زى دلوقتى

اللى شارى عربية ب 200 الف عاوز بعد 10 سنين يبيعها ب250 الف

لو فعلنا المقاطعة الكاملة هنبقى زى السعودية عروض واسعار محترمه وحتى الضمان هناك مختلف

انا اتفاجئت وانا بعمل فيديو المقارنة بين مصر والسعودية  لقيت الضمان عند اخواتنا فى السعودية  500 الف كم او 5 سنين واللى شافوا المقارنة بين الاسعار فى مصر وفى السعودية لمحوا فى الفيديو موضوع الضمان ده وكتبولى فى التعليقات وانا ماكنتش واخد بالى منه

عموما بقولها للمره المليون الاسعار فى مصر حلها المقاطعه الكاملة  لكن كل واحد يقعد على القهوه ويندب حظه وينتقد الدوله والظروف كل ده مش هيجيب نتيجة
الدوله مش هينفع تتدخل فى اسعار سلعه غير اساسية فى سوق حر

ممكن تتدخل فى اسعار السلع الاساسيه وتمنع الاحتكار والكلام ده مش بالامر برضوا لكن بيتم بالطريقة علشان يفضل السوق حر

هما طريقتين اى دولة بتعملهم لو السلع الاساسية زاد سعرها او حصل فيها احتكار

يا اما بتقوم  بتقليل الجمارك على الاستيراد علشان المنتج الوطنى اللى مزود السعر يلاقى منافس اقل سعرا ويبدأ ينزل بالسعر غصب عنه زى ماحصل فى ازمة حديد التسليح فى مصر

او عن طريق انشاء مصانع حكوميه تصنع المنتج وتنزله بسعر قليل فتضطر المنتج او رجل الاعمال انه يقلل السعر برضوا غصب عنه

هى دى امكانيات اى دولة فى العالم وبتتدخل فى السلع الاساسية المؤثرة على المجتمع فقط وبالطرق اللى قلت عليها بس

لكن مافيش دولة بتجبر مستورد او مصنع على البيع بسعر محدد مافيش الكلام ده
الحل فى ايد حضرتك

لو عاوز تجارة السيارات فى مصر حالها يتعدل نفذ المقاطعه الكاملة على نفسك وماتبصش لغيرك

فى نهاية الفيديو اتمنى الناس تفهم وتقاطع تجارة السيارات فى مصر مقاطعة كاملة

قاطع لمصلحتك ومصلحة اولادك من بعدك بدل مايعيشوا نفس العيشه اللى انت بتشتكى منها

شارك الفيديو علشان يوصل لأكبر عدد من الناس يمكن يكون سبب الإقبال على شراء السيارات ان الناس مسمعوش اصلا بالمقاطعة

اشترك فى جروب المقاطعه والله مانا شارى هتلاقى اللينك بتاعه فى صندوق الوصف

لو عجبك الفيديو دوس لايك واشترك فى القناة وفعل زر الجرس علشان تجيلك فيديوهاتنا الجديدة

كل اسبوع بنزل فيديو عن المقاطعه وآخر اخبار العربيات فى مصر ومقارنات بين انواع العربيات المختلفة المستعملة 

واسعار سوق المستعمل ووقفت ريفيوهات العربيات الجديدة احتراما للمقاطعة

اتمنى يكون الموضوع مفيد

اشوفكم على خير
سلام