كيف تعمل الفرامل ؟
كلنا اتعرضنا
للموقف التالي في وقت معين ، تكون سايق في حالك وفجأة تحصل مشكلة ولازم توقف
عربيتك بسرعة،
في فيديو
النهارده هانتكلم عن الفرامل، وهو النظام المسئول عن ايقاف العربية، وإنقاذك فى
موقف زى ده ، ونعرف ازاي الفرامل بتشتغل.
الفكرة الأساسية
لنظام الكبح أو الفرملة هو ببساطة تحويل الطاقة من صورة لأخرى، الفيزياء هي اللي
بتقول أن الطاقة لا تفني ولا تستحدث من عدم، بمعنى أن الطاقة الحركية بتاعت العربية
(حركة العربية للأمام، او حركة دوران العجل) مش هاتنتهى أو تقل إلا بتحويلها إلى
شكل تاني من أشكال الطاقة، وفيما يخص العربية ... بتتحول الطاقة الحركية إلى طاقة
حرارية عن طريق الإحتكاك ما بين الطنابير والتيل، وأول ما طاقة العربية الحركية
تتحول كلها لحرارة، ساعتها بتقف العربية تماماً.
دي هى الفكرة
الأساسية اللي كل العربيات بتشترك في استخدامها، لكن بالرغم ان الفكرة كانت
تقريباً ثابته من اوائل القرن الماضي، لكن طريقة التنفيذ كانت مختلفة شوية، في
البداية كانت الفرملة بتتم عن طريق قطعة خشبية بتضغط على كاوتش العربية، شبه
النظام المستخدم في القطارات القديمة.
وبعدين تطور
النظام من الشكل البدائي ده اللي بيسبب تآكل بشع للعجلات، لنظام أكثر عملية بيخلي
الإحتكاك بيتم مع طنابير مثبتة على العجلات مش العجلات نفسها، فكان ويلهايم مايباخ
هو أول مُصنّع يحط النظام ده في عربية انتاج سنة 1900، ولأنه نظام كان بيعتمد على
وايرات وقضبان بتوصل ضغط الدواسة للطنابير، ماكنش نظام مثالي وكان لازم ضغط قوي
جداً علشان يكون فعّال ً، غير إنه لازم يتصين بشكل متكرر علشان كل الوايرات لازم
تكون مشدودة بالتساوي علشان العربية تفرمل صح، مش كل عجلة تفرمل بالقوة اللي هي
عايزاها.
وهنا بدأ
التفكير في النظام الهيدروليكي اللي موجود بشكله الحالي بعد ما خاض رحلة طويلة من
التطور والنضج علشان يوصل للكفاءة والفاعلية الحالية، ويتحول من خط احادي للفرامل،
لخط مزدوج، ويتطور من طنابير اسطوانية (زي اللي بنشوفها في الفيرنا ورا مثلاً) للديسكات
اللي موجودة في كل العربيات الجديدة في الأمام،
طيب دلوقتي
عرفنا بإختصار شديد رحلة تطور الفرامل،
نوصل للسؤال
المهم.
ازاى
بتشتغل الفرامل بشكل عملي في العربية؟
أول خطوة لما
بتحتاج توقف العربية هو الضغط على الدواسة، دواسة الفرامل هنا بتتحرك داخل ما يسمى
بمقوي الفرامل (Brake Booster)
أو إللي نعرفه كلنا بإسم سيرفو الفرامل، لما بندوس على دواسة الفرامل في غرف
بتتفتح جوه السيرفوا بتسمح بقوة شفط المحرك انها تعظّم او تضاعف قوة الدوسة علشان
تزود الضغط جوة الماستر بدون ما تحتاج ارنولد شوال بنجر يدوس على الدواسة، وعلشان
كده اتسمى بمقوى الفرامل أو معزز الفرامل لأنه بيستخدم قوة سحب الهوا في المحرك
علشان يضاعف قوة دوستك البسيطة على دواسة الفرامل.
بعد السيرفو ما
بيحول رجل حضرتك الموقرة لرجل كريستيانو رونالدو بيتنقل الضغط للسلندر الرئيسي (Brake Master
Cylinder) أو
المدعو بماستر الفرامل، وده وظيفتة هي نقل الضغط وتوزيعة على خطوط الفرامل
بالتساوي أو وفقاً لتصميم ونظام دفع العربية، علشان مافيش عجلة تمسك بشكل مختلف عن
العجلات التانية، يعني الماستر بيخلي كل العجل يمسك بنفس القوة اللى المفروض ان
المصمم عايزها وفي نفس التوقيت.
طبعاً لو
العربية مزودة بنظام منع غلق الفرامل (ABS) الماستر بيبعت الضغط أولاً لموديول الـ ABS وهو بقه اللي بيشيل المسئولية في توزيع قوة
الفرملة على العجلات،
بعد ما السيرفو
قام بمهمتة، وزود الضغط داخل دائرة الفرامل، والماستر وزع الضغط وفقاً لتصميم
ونظام عمل الفرامل في كل عربية، الضغط بيوصل عن طريق خطوط الفرامل للكاليبرات اللي
مش بتستخدم إلا في نظام الفرامل المعتمد على الديسكات، وهو النظام الغالب حالياً،
لكن لو العربية بتستخدم طنابير مغلقة بيكون فيه سلندر صغير هو المسئول عن النقطة
ديه.
الكاليبرات أو
الدوشمة زي ما البعض بيسميها، وظيفتها هي نقل قوة الضغط اللي وصلتها لبستم داخلها
بيعصر الديسكات ما بين لقمتي التيل، وديه الخطوة اللي بيرتكز عليها نظام الفرامل
بشكل عام، فإحتكاك التيل بالديسكات هو المسئول عن تحويل حركة العربية إلى حرارة،
وبالتالي ايقاف العربية زى ما اتفقنا.
طيب
ايه هو نظام الفرامل ABS وايه هي
وظيفته وبيشتغل ازاى؟
بالرغم من تطويره في البداية للعمل على
الطائرات، إلا أن نظام منع غلق الفرامل (المكابح) او الـ ABS من اول ما بدأ في الوصول بشكل كبير ومتوسع إلى العربيات منتصف
الثمانينيات، أصبح أحد أهم أنظمة السلامة والأمان حالياً، والكثير من الدول بتحطه ضمن
قائمة التجهيزات الأساسية الواجب توفرها فى اى عربية بتتباع داخل أسواقها، طبعا
ماعدا مصر
علشان كده قررت أنى اتكلم عنه النهارده واشرح
طريقة عمله ووظيفته بصورة مبسطة.
ايه هو نظام فرامل ABS؟
ABS الحروف دى اختصاراً لجملة Anti-lock Braking System وتم تصميمه في الأساس لمساعدة السائق على الحفاظ على قدر من التوجيه
وتجنب الانزلاق أثناء الفرملة، وهو اللى بيعزز استقرار وتوجيه العربية اثناء الفرملة،
وفى نفس الوقت بيعطى السائق القدره على القيام بمناورات مفاجأة لو لزم الأمر تحت الفرامل
القوية.
مما يتكون نظام فرامل ABS؟
بيتكون نظام منع غلق المكابح ABS من كونترول التحكم في الفرملة (ABS Control Module) واللي بيتكون من وحدة بداخلها محرك كهربائي للضخ الهيدروليكي (ABS Pump)، مع سلسلة من الصمامات الهيدروليكية (ABS Pressure
Release Valves) التي
يتحكم بها عقل الكونترول الإليكتروني، والذي بياخد بياناته من حساسات السرعة (ABS Wheel Speed
Sensor) المثبتة على كل عجلة.
بيشتغل ازاى نظام منع غلق الفرامل
ABS؟
عند الفرامل القوية المفاجئة بيقوم كونترول
النظام بتحليل سرعة العجلات بشكل منفصل حسب الإشارة اللى جاية من حساسات السرعة
على العجلات علشان يحدد ما إذا كانت إحدى العجلات أو أكثر بتحاول أنا تنغلق
تماماً، وفي الحالة دى بيقوم الكونترول باستخدام صمامات تفريغ الضغط للحد أو
لتقليل الفرملة على العجلات اللي بتصل سرعتها إلى صفر كيلومتر/ ساعة
وبيعمل الموضوع ده حوالي 30 مرة في الثانية
الواحدة، والكلام ده هتحس به بقوة اثناء الضغط المفاجئ والقوي على دواسة الفرامل،
وبالطريقة دى بيمنع النظام العربية من
الانزلاق بفعل الفرامل، وبيسمح للسائق بقدر ملحوظ من التوجيه لتفادي العقبات اثناء
الفرملة.
طيب ليه انا محتاج نظام ABS في عربيتى؟
وليه انا وغيرى بنحارب مع
التوكيلات علشان ينزلوا النظام ده من اول فئة وفى ارخص عربيات فى السوق المصرى؟
في دراسة نشرت مؤخراً، أكدت جمعية السيارات
الكندية أنه في مسح شمل 1700 مالك سيارة فيها نظام منع غلق الفرامل ABS، أكد حوالي 66 بالمائة منهم أنهم لمسو استقراراً واضحاً على
سيارتهم أثناء الكبح القوي والمفاجئ مع نظام منع غلق المكابح ABS، في حين ذكر 53 بالمائة منهم أنهم قدروا يوجهوا عربياتهم اثناء
الكبح القوي وقدروا يتفادوا العوائق المفاجأة بفضل نظام منع غلق المكابح ABS.
الموضوع ببساطة هو للحفاظ على حياتك وممتلكاتك، لأن وصول
سرعة الإطار إلى سرعة السكون بشكل مفاجئ (غلق المكابح) بيقلل من قوة الجر والتحكم
بالعربية إلى أقصى درجة، والكلام ده بيخلى وزن العربية هو اللى بيتحكم كلياً في
اتجاه العربية بدون ما يكون لعجلة القيادة اى تأثير يذكر، علشان كده وبما أن نظام
منع غلق الفرامل ABS مش هيسمح
بالمأساة دى وهيتأكد من استمرارية دوران الإطارات ، وده هيضمن بقاء نسبة لا بأس
بها من قوة الجر، اللى هتتسبب فى قدر ملحوظ
من التوجيه وتفادي العوائق وفى أغلب المواقف إن شاء الله النجاة بحياتك وحياة اللى
بتحبهم ربنا يسلم طريقكم
فى نهاية الفيديو
اتمنى اكون قدمتلكم معلومة مفيدة
اشوفكم على خير
سلام