تركب إيه بـسعر
من 100 لـ 200 ألف جنيه؟ هقولك (أفضل 10 عربيات
اعتمادية في مصر)
عارف إن الميزانية محكومة، والأسعار كل يوم في حال، بس لسه تقدر تركب عربية محترمة، اعتمادية، ومبتصرفش بنزين كتير!
النهاردة جمعتلك 'خلاصة' سوق المستعمل في مصر في رينج من 100 لـ 200
ألف جنيه.
ركز معايا جداً، لأن الترتيب ده معمول بالورقة والقلم بناءً على: توفر قطع الغيار، سهولة إعادة البيع، وأهم حاجة.. مصاريف التشغيل اللي متقطمش الوسط."
وطبعاً السوق
مليان خيارات تانية في الفئة دي، بس استبعدناها عشان يا إما مصاريفها عالية، أو
مشاكلها في الأعطال والبارومة كتير، أو تقيلة في بيعها.. والانواع دي موجودة قدام حضراتكم في الصورة ... انما ... خلينا
في المضمون!
دوس اللايك المتين واشترك في القناة
وهات مشروبك المفضل ويلا بينا
القائمة: من المركز العاشر للمركز الأول
10- سوزوكي ماروتي (موديلات
2010 - 2014)
دي "ملكة التوفير". بمحرك 800 سي
سي وقوة 37 حصان، بنزينها قليل جداً وصيانتها "فكة" وقطع غيارها مرمية
في كل مكان.
مميزاتها: حجمها الصغير
بيخليها مثالية للزحمة والمناورة في الأماكن الضيقة، وكمان بتمسك سعر وسهلة جداً
في بيعها في أي وقت.
عيوبها: يعيبها طبعاً
إن مفيش وسائل أمان أو رفاهية (لا باور ولا تكييف)،
وضيقة من جوه. وطبعا متفكرش تسافر
بيها، اعتبرها أداة اعتمادية لمشاوير المدينة القصيرة بأقل تكلفة.
سعرها التقريبي من 140 - 170 ألف جنيه.
9- فيات شاهين (موديلات 2000 - 2005)
ودي عربية "المهام الشاقة". بمحرك 1400 أو 1600 سي سي، دفع خلفي وعفشة حديد بتستحمل تكسير الشوارع
مميزاتها
ميكانيكا بسيطة جداً وأي حد بيفهم فيها، صاجها متين
ومساحتها واسعة للعيلة، وقطع غيارها أرخص من أي منافس.
سعرها
التقريبي من 120 –
160 الف جنية
8- كيا سايبا او اللي بنسميها في مصر كيا برايد الإيراني (موديلات 2001 - 2009)
مميزاتها
ان صاجها أنشف من الماروتي وصالونها أوسع ومريح للعيلة، وقطع غيارها
بأسعار معقولة جداً لانتشارها الواسع.
عيوبها ثباتها بيقل في السرعات العالية، وتقفيلها الداخلي الايراني مش احسن حاجة وممكن يطلع شوية أصوات مع الوقت. يعني هي اختيار متوازن
جداً أوسع من الماروتي وأسهل في
السواقة من الشاهين.
سعرها التقريبي
من 130
- 180 ألف جنيه.
7- هيونداي إكسيل (موديلات
التسعينات)
أيقونة الاعتمادية. بمحرك 1300 أو 1500 سي سي، ومشهورة بأنها عملية جداً وسهلة في صيانتها
مميزاتها
صالونها مريح ومساحتها الداخلية كويسة، وإعادة
بيعها "صاروخ"، وقطع غيارها (جديد واستيراد) موجودة في كل حتة.
عيوبها عفشتها
"حساسة" شوية قدام الحفر المصرية، وثباتها مش عالي في الملفات، وصاجها
بيلم بارومة لو مهتمتش بيه. يعني هي بتعتبر اختيار ذكي للي عايز راحة وسهولة في البيع.
سعرها التقريبي من 140 - 190 ألف جنيه.
6- رينو كليو (موديلات
2002 - 2004)
هى دي الشياكة الفرنسية بمحرك 1200 سي سي وقوة 75 حصان
مميزاتها
تعتبر الأفضل في فئتها من ناحية الثبات والاتزان
على السرعات العالية، تصميمها لسه شبابي، وموفرة جداً في البنزين، وعزلها الصوتي
محترم.
عيوبها ميكانيكا
معقدة شوية وكهربتها حساسة، وقطع غيارها أغلى سنة ومحتاجة ميكانيكي
"متخصص" بيفهم فيها لأن العربية دي مالهاش في شغل العشوائية.
السعر التقريبي من 160 - 195
ألف جنيه.
5- اسبيرانزا A113 موديلات من 2008 - 2012
العربية
دي هى ملكة
"القيمة مقابل السعر". بمحرك 1300 سي سي وقوة 87 حصان، وبتقدم لك
كماليات كتيرة (تكييف، باور، سنتر، زجاج كهرباء).مميزاتها
محرك نشيط وأداء قوي مقارنة بحجمها، وقطع غيارها رخيصة جداً وصيانتها
سهلة ومنتشرة.
عيوبها شنطتها
صغيرة، وعفشتها "ناشفة" بتخليك تحس بعيوب الطريق، وجودة البلاستيك
الداخلي بسيطة. يعني هى اختيار تقني ذكي للي عايز رفاهية بميزانية محدودة.
سعرها التقريبي من 170
- 200 ألف جنيه.
4- دايو
جوليت / لانوس 1 (موديلات من 1997 - 2000)
دي عربية "الاعتمادية الأولى".
بمحرك 1500 سي سي وقوة 86 حصان، وأي ميكانيكي في مصر حافظها.
عيوبها انها واطية على
الأرض (بتحك في المطبات)، واستهلاك في البنزين متوسط جوه البلد. العربية دي اختيار
عملي جداً بيجمع بين القوة وسهولة الصيانة.
سعرها التقريبي من 170 - 200 ألف جنيه (للحالات المتوسطة).
3- سوزوكي سويفت (موديلات
التسعينات)
دي هى الياباني الأصلي بمحرك
1300 سي سي، مشهورة بخفة
وزنها وسحبها
النشيط جداً على الطريق.
عيوبها شنطتها صغيرة،
وثباتها بيقل في السرعات العالية بسبب خفة الوزن، وممكن تدوخ شوية على بعض قطع كماليات
الصالون الأصلية. يعني
من الآخر هي اختيار مثالي للشباب
سعرها التقريبي من 150 - 190 ألف جنيه.
2- هيونداي أكسنت -
القديمة (موديلات
من 1998 - 2005)
عربية محترمة بمحرك 1300 أو 1500 سي سي، وبتعتبر من
أنعم وأسهل العربيات في السواقة في الفئة دي.
مميزاتها موتور هادي واعتمادي،
تكييف قوي جداً، وقطع غيارها متوفرة "بتراب الفلوس" في كل شوارع مصر.
عيوبها ثباتها مش أحسن حاجة
على السرعات العالية، وصاجها خفيف وعاوزة
حذر من المطبات والبارومة. يعني من الآخر بتعتبر اختيار
آمن وعملي جداً.
السعر التقريبي من 180
– 200 ألف جنيه.
1- تويوتا كورولا "الملكة" ( موديلات الثمانينات
أو أوائل التسعينات)
العربية
دي هى رمز الاعتمادية اللي
مبيخلصش. بمحرك 1300 سي سي، هندسة يابانية أصلية بتثبت إنها "مبتموتش"
بمرور الزمن.
مميزاتها
راحة قيادة خرافية وعفشة ناعمة جداً، بتمسك سعرها كأنها استثمار في الذهب،
وصيانتها سهلة ومفهاش مفاجآت.
عيوبها ان
الموديل قديم فمحتاج فحص دقيق جداً للصاج والشاسية علشان البارومة، وصعب تلاقي حالات "فابريكا" لقطة بسهولة. انما هى الخيار
الأكثر وقاراً واعتمادية للي بيقدر الياباني.
سعرها التقريبي من 160 - 200 ألف جنيه.
"في النهاية يا صديقي، قبل ما تحط قرشك في أي عربية من دول، أهم حاجة في المستعمل هي 'الحالة'. ، الحالة بتغلب الموديل 100 مرة. اكشف كويس على الموتور والشاسيه عند حد متخصص او مركز صيانة معتمد، ومبروك عليك مقدماً!"
لو عجبك الفيديو وحسيت انك استفدت ماتنساش تدوس لايك وتشترك في القناة علشان تجيلك الفيديوهات الجديدة هنا بنعمل تجارب قيادة للعربيات الجديدة وبنقارن بين انواع العربيات المختلفة وبجيبلك اسعار الزيرو والمستعمل لحد عندك ومن الآخر بقولك الزتونة من غير عمليات تجميل
اشوفكم على خير .... سلام
