عربية بسعر موبايل؟.. وحوش الـ 100 ألف في 2026

 

أنت عارف إن تمن موبايل ايفون ممكن يركبك عربية بـ 4 عجلات وموتور في 2026؟

أيوة زي ما سمعت.. لو معاك 100 ألف جنيه وخلاص فقدت الأمل، الفيديو ده ليك. هقولك على 5 وحوش لسه صامدين في سوق المستعمل بالسعر ده، بس ركز في التفاصيل عشان ما تلبسش في حيطة!

السوق غلي، والزيرو بقى في حتة تانية، بس الـ 100 ألف هتجيبلك عربية 'لقطة' الفيديو قصير دوس اللايك المتين واشترك في القناة وسيب اللي في ايدك ويلا بينا."

 

العربية الأولى: الأسطورة (فيات 128)

دي مش مجرد عربية، دي مدرسة ميكانيكا متنقلة. بـسعر من 70 لـ 80 ألف جنيه هتركب حالة معقولة، والباقي خليه في جيبك للعمرة الجاية. ميزتها؟ اى ميكانيكي هيشتغل فيها وقطع غيارها بتتباع في السوبر ماركت!

المحرك 1100 أو 1300 سي سي 4 سلندر

مميزاتها  قطع غيار بتراب الفلوس وأي ميكانيكي بيفهم فيها، والضريبة والترخيص مافيش اقل من كده

عيوبها  الشاسيه بيفتح  (وبيحتاج تقوية)، وأعطال الكهرباء متكررة، وناشفة جداً في السواقة

 

العربية الثانية: النملة اليابانية (سوزوكي ماروتي - أوائل الـ 2000)

لو عايز عربية بتشم بنزين ومصاريفها زيرو، الماروتي هي الحل. ممكن تلاقي موديلات من 2000 لـ 2004 في حدود من 90 لـ 100 ألف جنية

صحيح العربية ضيقة شوية؟ لكن هتقضي الغرض وممكن تركنها في الريسبشن

المحرك 3 سلندر 800 سي سي

مميزاتها  ملكة توفير البنزين، حجمها مثالي للزحمة والركن، وأعطالها قليلة لو الموتور حالته جيدة

عيوبها  ضيقة جداً من جوه، خفيفة على الطريق خطر في السرعات العالية ده لو قدرت اصلا تعدي بيها ال 100 كم/س، وعزمها ضعيف

 

العربية الثالثة: الدبابة الروسية (لادا 2107)

عايز عربية خشنة تستحمل مطبات مصر؟ اللادا هي 'الطوبة اللي هتطلعلك عضلات المجانص والترابيس من غير ماتروح الجيم'. العربية دي دفع خلفي، صاج حديد، وبتشيل العيلة كلها. موديلات التسعينات لسه بتلعب في رينج الـ 90 ألف."

المحرك 1500 او 1600 سي سي دفع خلفي

مميزاتها صاج حديد، عفشة قوية جداً للمطبات، موتور "عزمه" شديد وبيستحمل الشغل الشاق.

عيوبها الدريكسيون تقيل جداً (بيحتاج مجهود عضلي)، وصوت الموتور عالي، وبتسخن بسرعة لو الرادياتير مش نحاس.

 

العربية الرابعة: (فيات شاهين - الحالات القديمة)

لو حظك حلو ولقيت حد مزنوق وعاوز يبيع شاهين 

موديلات أوائل التسعينات ممكن تلمس الـ 100 ألف. عربية حمالة أسية وإعادة بيعها أسرع من الصاروخ

المحرك 1400 أو 1600 سي سي محرك تمبرا أو شاهين العادي

مميزاتها  إعادة بيع سريعة جدا  واسعة من جوه، بتستحمل الحرارة والظروف الصعبة 

عيوبها العفشة الخلفية سوست ورق بتخليها تتنطط في المطبات، وتكنولوجيا قديمة جداً.

 

العربية الخامسة: (هيونداي إكسيل - الحالة 'المتوسطة') 

دي بقى 'الجائزة الكبرى'. لو لقيت إكسيل بالسعر ده، فغالباً هتحتاج منك شوية مصاريف في العفشة أو الدهان، بس في النهاية أنت راكب هيونداي، مريحة وشكلها لسه مقبول."

المحرك 1300 أو 1500 سي سي

مميزاتها  أنعم واحدة فيهم في السواقة، شكلها مقبول وعصري شوية، وصالونها مريح 

عيوبها واطية على الأرض وبتحك في المطبات والتابلوه بتاعها بيتشقق من الشمس، وصاجها أضعف من اللادا والشاهين.

في 2026، العربية اللي سعرها 100 ألف جنيه هتكون "عجوزة"، فأهم ميزة لازم تدور عليها هي "نضافة الشاسيه والحوض"، لأن الموتور أمره سهل وممكن يتغير، لكن الصاج لو سرحت فيه البارومة يبقى العوض على الله!

وخد بالك.. في 2026، الـ 100 ألف جنيه بتشتري لك 'حالة' مش 'موديل'. يعني أهم حاجة (كشف الموتور والبارومة). وما تشتريش بكلمة 'حالة الزيرو' من صاحبها، 

او يقولك فابريكة جوه او عاملة 100 الف كم لأن كل ده كذب خد معاك فني يقلبها كويس واعمل حسابك انها لازم تكون راشه بره وجوه ومعجون ومحارة ومغيرة 4 مواتير على الاقل ولازم تركزلأن الغلطة هنا هتكلفك تمن العربية مرتين!

قولي بقا في التعليقات لو معاك ال 100 ألف دلوقتي، تركب واحدة من دول ولا تحوش كمان شوية وتكمل عليهم وتجيب عربية في حدود ال 300 الف؟ قولولي رأيكم في الكومنتات، وما تنسوش اللايك واكتبولي لو عايزين جزء تاني عن فئة الـ 200 ألف!"