عربية بسعر موبايل ارخص عربيات مستعملة فى مصر الجزء (2) من 10 الاف الى 20 الف جنية

السلام عليكم ورحمة الله وبركاتة

اصدقائى الاعزاء مرحبا بكم فى الجزء الثانى وفيديو جديد عن السيارات المستعملة  فى السوق المصرى اللى سعرها من 10 الاف الى 20 الف جنية

فى الجزء الاول اتكلمنا عن سعر من 5 الاف الى 10 الاف جنية

المهم بعد مانزل الفيديو بدأت ردرود فعل غريبة لناس بتنكر وجود السعر ده وبتهاجم الفيديو

حاولت ارد عليهم وافهمهم ان اللى بيبيع عربيته حاجة من اتنين

اما واحد محتاج يبيع علشان عاوز الفلوس او عاوز يغير العربية بحاجة اعلى منها علشان معاه فلوس وفى الحالتين هيكون جاد فى البيع

يعنى واحد مستعجل و محتاج يبيع النهاردة  قبل بكرة

وفى نوع تانى وده واحد بيجس السوق وعاوز يعرف عربيته تجيب كام وده للاسف غير جاد فى البيع

فى فرق بين واحد عاوز يبيع فعلا وبينزل سوق السيارات من الفجر يوم اجازته علشان يلحق مكان كويس ويقعد فى الشمس طول النهار وناس تتفرج وماتشتريش وناس تانية تهرج وناس تترسم وتجار تبيع وتشترى فيه ويكرر الموضوع  ده كل اسبوع لحد ماربنا يكرمه ويبيع

وواحد تانى قاعد على النت فى التكييف كبيره بيحرك صوابعه وبيرفع الاعلان وينام

الخلاصة ان اللى عاوز يبيع فعلا هو اللى بيحط السعر المعقول اللى فى الفيديو اما اللى بيحلم وحاطط  مثلا على عربية 128 سعر 50 الف جنية

ده حاجة من اتنين

اما هينام جنب عربيته ومش هتتباع وده اغلب اللى بيحصل او هيلاقى حد غلبان مش فاهم وممكن يشتريها لمجرد ان شكلها عجبه ومعاه ثمنها

انا لما لاقيت الناس بتعلق على الفيديو وبيقولوا مافيش عربية 127 مثلا بالسعر ده بدأت ابعت رد على التعليق واقولهم انزلوا السوق وابحثوا على موقع  اولكس وكونتاكت كارز

لكن برضه الناس مكسلين حتى انهم يبحثوا على اولكس مش ينزلوا السوق

بحثتلهم فى اولكس وحطيت لينكات عربيات بتتباع  بنفس السعر اللى فى الفيديو المهم لاقيت التعليقات اتحولت وبقت

العربيات دى تعبانة وخردة وهتصرف نزلت شوفت كام عربية من اللى فى موقع اولكس رغم انى بشوفهم كل اسبوع فى سوق العاشر  لقيتها عربيات عادية جدا حالتها جيدة بس اكيد مش 100%

واى حد يقولك ببيع عربية من السبعينات او الثمانينات او حتى التسعينات مرفوعه بقالها 3000 سنه وفابريكة وماشية كذا الف كيلومتر

 اهرب بسرعة

مافيش الكلام ده خالص احنا مش فى انجلترا هنا

اللى اشترى عربية فى مصر ركبها هو واولاده واحفاده واصحابه لحد ما خلص على 4 مواتير وحك فى طوب الارض ورشها ومعجنها ومحرها كمان

اى عربية بتشتريها ان شالله موديل 2018 هيبقا فيها شغل على الاقل هتغير زيوت وسيور وبلي وتيل فرامل

انت هتشترى عربية ب 10 الاف جنية ايه المشكلة لو اساسياتها سليمة وعفشتها وموتورها مثلا 75%

متخبطة شوية والبوية مقشرة معلش حقك عليا مشى نفسك بيها لحد ما ربنا يكرمك وتجيب الاحسن منها

لو معاك مبلغ متواضع ومش هتستحمل  قسط عربية زيرو ومحتاج عربية ضرورى … السوق المصرى بيوفرلك عربيات مستعملة بكل الاسعار من 

5 الاف لحد 5 مليون

انزل سوق الحى العاشر مدينة نصر او اسواق المحافظات ولو مكسل ياسيدى ادخل على موقع اولكس هتلاقى كل اللى انت عايزه

اما بقا لو مكسل حتى انك تدخل على اولكس يبقا انت محتاج عمره ضرورى

عموما فى الفيديو ده انا هنزل العربيات اللى فى حدود من 10 الى 20 الف جنية ومميزاتها وعيوبها وهستعرض السعر مع حضراتكم على موقع اولكس علشان تطمنوا ان السعر موجود بالفعل

فى عربيات مكملة معانا من الجزء الاول اللى كان بيتكلم على سعر من 5 الى 10 الاف بس موديلات احدث

زى ال 128 بس موديل الثمانينات والفيات 127 بس موديل الفيورا والسوبر فيورا والفولكس بيتلز موديل الثمانينات

لو عجبك الفيديو دوس لايك وممكن تشير الفيديو علشان ناس اكثر تستفيد وممكن تشترك فى القناة وتفعل زر الجرس علشان تجيلك فيديوهاتنا الجديدة

نبدأ على بركة الله

اول نوع معانا السيارة فيات 127 فيورا او سوبر فيورا سعرها بيكون من 12 الى 17 الف جنية حسب الحالة والموديل

ودى موجودة فى مصر بمحركات مختلفة فى منها 903 او 995 او 1050 سى سى  الجيربوكس بتاعها 5 غياروفرامل على سيرفو

عربية اعتمادية واعطالها قليلة جدا حجمها صغير بس صالونها كويس ويتسع لعدد اربع اشخاص بالغين  بتجرى على الطريق وممكن تجيب بيها ال 150 كم /س بس مش هتبقا ثابتة بعد ال 120  موتورها اقتصادى فى استهلاك البنزين وبتاخد طبعا بنزين 80

بتجمع بسرعة  يعنى ممكن تشد مع عربية موديل 2019

عيوبها زى اى عربية قديمة صوت الموتور عالى وبتسمعه بوضوح داخل الكابينة
الهواء داخل من كل حتة
 الشاسية ضعيف نسبيا وبتظهر عيوبة فى حالة زيادة الحمل اوالركاب لفترات طويلة
العربية صغيرة وخصوصا الشنطة يعنى لو مسافر مع الاسرة ومعاك شنط كتير هتضطر تشيل على السقف

لكن فى المجمل عربية فوق الممتازة وده عن تجربة شخصية

ومن وجهة نظرى المتواضعة ادائها بالنسبة لى كان اكبر بكثير جدا من اللى  توقعتة من عربية فى  فئتها السعرية

ثانى نوع معانا العربية 128 سيارة الشعب موديل الثمانينات ودى سعرها يتراوح ما بين 15 الف  الى  18 الف جنية حسب الحالة والموديل

تتميز بأنها منتشرة جدا فى مصر وسهلة الصيانة واقتصادية وموفرة فى البنزين  وطبعا بتاخد بنزين 80 وقطع الغيار متوفرة

الفيات 128 انتجتها فيات سنة 1969

اخدت جائزة افضل سيارة فى اوروبا سنة 1970

استمرت الصحافة تحكى عنها طول فترة انتاجها اللى انتهت سنة 1977

واستبدلوها  بالريتمو
لكن لم يتوقف انتاجها فى مصر وكانت ال 128  الشرارة اللى انطلقت منها عدة سيارات مشابهة فى التصميم
زى
فيات او نصر 128 عاده
فيات 128 cl
فيات 128 معدل
فيات 128 ابارث
نصر 128 لوكس
والحمد لله آخر نسخة منها نوفا 128

الموتور بتاعها

راكب بالعرض بزاوية ميل 20 درجه للامام
4 سلندر

1116 او 1300 سى سى
اقصى قدره للمحرك  الـ 1116 55 حصان
الـ 1300 62 حصان
عامود الكامات  رأسى
الفتيس اربع سرعات

بتتميز العربية  بسهولة تعديلها

وقطع الغيار المتوفرة و المحرك البسيط  اللى ممكن أى ميكانيكى يتعامل معاه بسهوله

من عيوبها

وزنها 805 كجم والوزن ده خفيف بيخليها غير ثابتة على السرعات بعد ال 100 كم / س وفى الملفات

الشاسية علب وده بيسبب انها مش بتستحمل الشوارع المكسره واللى فيها مطبات كتير فبتلاقى نفسك كل فترة عند السمكرى علشان تضبط العفشة او تلحم الشاسية من تحت

النوع الثالث  السيارة الالمانية الشهيرة  فولكس فاجن بيتل البطة المستريحة موديل الثمانينات ودى سعرها من 10 الى 15 الف جنية حسب الحالة

العربية دى اسطورة فى كل حاجة حتى فى المبيعات لانها باعت  أكثر من 21 مليون نسخة فى كل دول العالم

هيكلها مصنوع بالكامل من الفولاذ

موتورها مكون من 4 أسطوانات متقابلة بشكل أفقي “منبطحة” وبسعة 1500 سى سى  بيولد 54 حصاناً عند 4.200 لفة  في الدقيقة، وصندوق تروس 4 سرعات  بينقل قوة الموتور للعجلات الخلفية

عربية اعتمادية تبريد هواء ثابتة على الطريق وبتجرى مافيش فيها مشاكل واعطال كتير لانها بسيطة خالص بس محتاجة ميكانيكى خاص ومش اى ميكانيكى يفهم فيها

بالنسبة لاستهلاكها للبنزين فهى اقتصادية وموفرة وقطع غيارها معمرة

اللي بيسوق فولكس بيتل يقدر يسوق اي عربيه تانيه بسهوله و يركن من غير باركنج سنسور زي الفل لانها في سواقتها بتعتمد اعتماد كبير علي تقدير المسافات لانك ببساطه بتبقي آخر حدود رؤيتك الزجاج الأمامي و الخلفي فقط  يعني مش هتشوف الكبوت و لا الشنطه ولا الوراك والفخاد  اللى بيسموها فى العربيات التانية رفارف ولازم تعمل حسابهم و إلا هيتخبطوا منك و انت بتركن

عيوبها ان شكلها خنفسة وصالونها ضيق بس لما بتتروق بتبقا تحفة فنية

قطع غيارها مش منتشرة قوى يعنى بيشتغل فيها تجار قليلين

رابع نوع معانا السيارة الفرنسية بيجو 305 اللى اسمها البيجو الطيارة موديلات 78 – 79 – 80 ودى سعرها من  14 الف الى 18 الف جنية حسب الحالة

عربيه فائقه النعومه علي الطريق وموتورها هادئ هدوء الدايو والهيونداي الجديده..وسرعه صاروخيه وثبات علي الطريق ما حصلش.. استهلاك بنزين معتدل جدا ورغم ان موتورها 1300 او 1500 سي سي الا ان استهلاكها للبنزين يعادل ال 128 ام 1100 سي سي يعنى لو موتورها مضبوط تعمل 220 كم فى الصفيحة

العربية دى مظلومة وبيتقال عنها اشاعات كتير وكلها اكاذيب

يعنى ناس كتير فاكرين قطع غيارها نادرة وغالية لكن الحقيقة ان قطع غيارها متوفرة وبتتباع استيراد وجديد بس أحيانا بعض الحاجات بتلاقيها بصعوبة وسعرها اكيد اغلى شوية من ال 128 بس دى ركوبة تانية خالص وبعدين قطع غيارها معمرة واعطالها قليلة

تعتبر من أجود وأقوى أنواع السيارات البيجو والأكثر تحملا بعد السيارة بيجو 504 لكن مع شكل أجمل وأكثر أناقة وفي الواقع هي تعتبر الأخت الصغيرة للسيارة بيجو 505 الفرق بينهم الحجم و السى سى و ان 305 جر أمامي وأل 505 دفع خلفي

dav

فتيس وموتور بيجو 305 في منتهى السلاسة وبيشتغل الفتيس والموتور والكبالن  بزيت واحد

موفرة جدا في استهلاك الوقود  ومريحة فى سواقتها  ومستقرة عند الملفات على السرعات العالية

صالونها واسع وشنطتها كبيرة وفيها فتحة سقف والدركسيون  ناعم والفرامل قوية

عيبها صعوبة بيعها وده اللى بيخلى سعرها قريب لل 128 مع انها عربية محترمة

النوع الخامس ريجاتا موديلات من 84 الى 87 وسعرها بيكون فى حدود من 16 الف الى 19 الف جنية حسب الحالة

عربية اعتمادية شكلها حديث وسريعة وثابتة على الطريق لحد 120 كم / س

المميزات
تسارع ممتاز وموتور قوى
ثبات اكثر من ممتاز
عفشة قوية ومناسبة جدا لارتفاع المطبات فى مصر
كماليات كويسة بالمقارنة بالعربيات اللى فى نفس المستوى فيها  تكييف وسنتر وزجاج كهرباء وكمبيوتر اعطال
صالونها واسع ومريح

عيوب العربية
من اكتر العربيات اللى فيها بارومة

اهم حاجة حاول وانت بتشترى تختار عربية كويسة يعنى مافيش بارومة فى حتت و اماكن لو اتعملت تعيب العربية زى القايم والحوض والشنطةقطع غيارها غالية بالمقارنة مثلا بالشاهين او الفيات القديم

وبعض قطع الغيار ممكن تتعب شوية علشان تلاقيهاالتكييف مش قوى وتاثيرة كبير على اداء العربيه كعادة الاوروبى القديم

سادس نوع  فى الفيديو عربيتين الروسية الحربية لادا 1500 موديل الثمانينات ودى سعرها من 15 الى 18 الف جنية

 ولادا 2105 الروسية موديل الثمانينات ودى سعرها بيتراوح بين 17 الف الى 20 الف جنية حسب الحالة

 السياره اللادا منذ اكتشفها احمس الاول وحتي الان كما هي ولا يوجد بها ادني تحديث ومازلت علي قديمه وهي دي المستقبل بالنسبه للميكانيكي القديم الي راح ينقرض مع تطور تكنولوجيا السيارات الحديثه

عربية قوية جدا وموتورها  1200 او 1500 سي سي ومن مزاياها الداخلية الاتساع في المقصورة والشنطة الخلفية الكبيرة, كما أن من مميزاتها رخص تكاليف صيانتها وقوة ومتانة الهيكل وسهولة  تصليحها فى أي مكان. كما أنها مناسبة للطرق المصرية وبتتحمل المطبات بسبب ارتفاعها عن الأرض

ومن قوة الشاسية والهيكل فى ناس بتحمل فيها بضائع وحمولات ثقيلة

موفرة فى استهلاك البنزين وبتقبل اى نوع

كل العربيات ممكن تكون بتاكل بنزين او زيت انما اللادا بتاكل صاحبها سواقتها صعبة وهتغنيك عن الجيم يعنى هتنزل منها عامل فورمة مجانس وترابيس

العربية تقيلة على الارض وثابتة على السرعات العالية وفى الملفات  لو عفشتها سليمة

مشاكلها قليلة واى حد يعرف يشتغل فيها ميكانيكا اوعفشة

الخلاصة لادا يعنى قوة واداء للانسان العملى
بس علشان تريحك

لازم تراجع العفشة  باستمرار علشان الامان على الطريق
كشف دورى على زيت الكرونة
تغيير بيض المقصات كل سنة حتى لو كان سليم

واخيرا بعد ما استعرضنا انواع السيارات اللى سعرها من 10 الى 20 الف جنية

احب اقولكم ان كان فى سيارات تانية كتيرة فى نفس الفئة السعرية ولكن ماقولتهاش فى الفيديو علشان مشاكلها كتيرة وقطع غيارها اختفت من السوق المصرى وحالة المتوفر منها سيئة وهتصرف اكثر من سعرها

 المهم احنا استعرضنا فى الفيديو الفيورا والسوبر فيورا والفيات 128 والفولكس بيتل والبيجو 305 والريجاتا واللادا 1500 واللادا 2105

كلهم فى حدود السعر وشوفنا السعر على اولكس ولو اعرف آخد بإيديكم وانزل السوق علشان ااكد لكم الاسعار كنت عملت

وكل ده علشان ماحدش يطلع يشكك فى السعر اللى بقدمه انا لاعندى معرض ولا ببيع العربيات دى يعنى مش هستفيد من وضع اسعار مغلوطة

فى نهاية الفيديو اشكركم على حسن المتابعة واتمنى يكون الفيديو مفيد

والسلام عليكم ورحمة الله وبركاتة